我嘅職業係專溝人地個女朋友: 4.9

中六果年，我地級都曾經發生過一件幾轟動嘅事，就係我地一個女同學未婚懷孕，然後就突然再爆出衣個女同學原來一直同好多學校嘅男仔都有發生過關係，甚至有d遮左樣嘅影片開始相繼流出。
 
衣件事傳出黎果陣，衣位女同學其實已經返大陸落左個bb，但消息就唔知係邊度傳出黎，而個女同學亦無點否認，淨係選擇冷處理。
 
本身初初淨係傳佢有左bb果陣個問題都唔係咁大，因為佢已經落左所以無証據，學校可以做嘅野除左搵家長傾偈其他都唔多，而同學除左私下談論對佢亦無咩話特別唔同。
 
不過之後當再傳出佢同好多男仔都發生過關係再加埋一d打格遮左樣嘅影片出現後，衣位女同學剎那間就慘變成過街老鼠咁不斷比其他女同學排斥話佢淫亂不知廉恥，而男嘅亦唔敢接近佢驚比其他人誤會自己對佢有興趣甚至同佢有染係片中嘅男主角。
 
自此衣位女同學方圓一米內都再唔會有其他人，除左佢嘅一位女同學，亦係我嘅青梅竹馬-鄺善柔。
 




喺衣段時間，佢一直都陪住衣位女同學，甚至因為咁，佢都曾經受過其他人唔少嘅攻擊同批評，仲會話佢都實係同一類人。好彩佢本身人緣唔差，所以亦有部份同學幫佢講說話情況先未至於太差。
 
而亦幸好因為衣件事喺中六中後期發生，捱過左衣段時間後個女同學就去左外國讀大學，應該可以忘記衣度嘅一切重新過新生活。而亦係佢走左後，善柔先肯開始同我講返佢同衣位同學嘅事，亦知道左原來當日係善柔陪佢返大陸落BB。
 
「你贊成佢咁做? 」我不解咁問。
 
「我個人係唔贊成架，始終都係一個生命… 但當時佢好堅定，而理性上我亦明白格硬生出黎佢同個BB將要面對d咩。當時佢已經無咩朋友，所以我唯一可以做嘅就係陪住佢，等佢唔駛獨自面對衣件事…
 
始終我相信衣件事最難受嘅點都係佢，其他人邊有資格去批判佢? 其實佢都算係一個受害者，個人男知佢有左bb後就消失左…」講到後面善柔略帶憤怒。
 




「咁到底BB爸爸係邊個?」我八掛一問。
 
「唔知，佢唔肯講…」
 
「咁點解你肯幫佢隌佢嘅? 其他女同學好多都好不屑佢咁…」我又問。
 
「咁我問返你轉頭，其實佢做左d咩壞事其他人要咁對佢?」善柔反問。
 
「…亂搞男女關係?」衣個問題真係考起左我，諗左一陣後我先答。
 




「點為之亂搞? 你情我願，又唔係呃又唔係搶又無傷害到人，其實關其他人包括你同我咩事? 講到佢好似唔知做左d咩傷天害理嘅事變左個十惡不赦嘅壞人咁…
 
係咪有左婚前性行為就要好似古代咁浸豬籠大家先安落?」善柔略帶激動咁講。