精子is money: 第九十五章 圖書館

「拿，其實……呢條數好簡單咖炸，你唔好俾佢表面呃到。你係呢個位畫返條線上去，將個圖形分開，咁就會易做好多咖啦。」唐梓晴修長的玉指指住檯上既數學題目書，呢本數學書係岩岩唐梓晴係圖書館隨手拎既，

不過呢本數學書已經被唐梓晴翻開左，我望唔到封面，所以唔知呢本係咩野係咩程度，只係知道呢本書上面所有既題目，所有既圖像都俾我非常深奧既感覺。
 
「咁啦，不如我做一次先。」唐梓晴一步一步咁清楚列出所有步驟，同時非常有耐性咁向我詳細講解。

「哦，原來係咁，咁我明啦。」我感覺到周不時都有男同學偷望坐係我隔黎既唐梓晴。

「咁你試下做一次先。」



「其實……又真係幾簡單啵，咁樣既話。」我渣起手上既筆嘗試計算，呢枝筆係唐梓晴既，只係一枝普通既傳統藍色原子筆，但係又有種與別不同既花香味。

「係呀！就係咁簡單啦，所以你都要努力，快ｄ追上我，加油。」聽到呢句既我，個心都離一離，太突然啦唔通女神係到暗示緊？定係我既誤會左呢？
 
正當我想開口問清楚既時候，唐梓晴望一望佢自己手上既錶講左句：「嗯，差唔多上堂啦，下次再溫啦。」之後唐梓晴就將手上既題目書擺返落書架上，上堂鐘聲隨刻響起。


「唉，開心既時間真係過得特別快。」我心諗

「我之後仲可唔可以同你一齊溫書？」



「可以，不過要睇下我得唔得閒先，不過應該大多數都會得閒既。」

「你鐘意既話咪黎囉，我平時無野做都會黎圖書館坐下，睇下書咁咖。」
 
「知識係無窮無盡既，書本可以帶俾人們知識，人類要進步既話就需要更多既知識……」

「喂！打曬鐘啦，夠鐘上堂，你地仲唔快ｄ返去上堂？快ｄ走！」呢個時候有一個圖書館當值老師發話，當值老師打斷左岩岩唐梓晴有感而發句野，其實我都唔係幾明岩岩唐梓晴所講既野。
 
「好既Ｍｉｓｓ，依家即刻走，真係唔好意思。」我同唐梓晴向當值Ｍｉｓｓ道歉然後急急腳咁行走，我臨走既時候回頭望左一眼岩岩擺返落原位既數學書，書名寫住２１１８年香江中學文憑試題。