港足守護神和他背後的守護神: 44 - 我一定會聽

達叔：「好耐冇見喎華仔。」

純姨：「最近點啊你？」

達叔：「聽恩恩講你入咗足球隊，仲踢得好好喎。」

我連忙表示：「邊係，中規中矩啦。」

陳慧恩說：「振華你洗唔洗咁謙虛啊，殺入決賽仲做埋隊長。」





我訝異：「你點知㗎？」

陳慧恩說：「咪玩啦，入八強破紀錄已經傳到周圍都係，更何況係決賽。決賽喎！我敢保證全校都討論緊。」

我表示：「我唔係講緊呢樣啊，我係講緊做隊長。」

陳慧恩回應：「你嗰兩個兄弟講野咁大聲，成個班房都聽到啦！」

此時，純姨插嘴：「嘩，原來華仔你踢波咁勁㗎，真係好叻啊。」





達叔：「咁你第日有冇諗住做職業球員啊？」

我靠，這人懂讀心術嗎？

Anyway.

我回答：「唔知啊，呢啲嘢第時再算。」

同時，我拿起茶壺向他們三位的杯斟茶。





達叔：「唔該你啊華仔，真係有禮貌。我覺得如果你自己真係有志做職業足球員嘅，就即管去啦。其實，最緊要都係要做到自己鐘意嘅嘢。如果你最後咁揀，我實支持你㗎。」

純姨：「華仔，最緊要係自己唔會後悔。不過，你可唔可以應承純姨一樣野？」

我：「係？」

純姨：「如果你真係選擇行職業呢條路，你就真係要付出百分之一千嘅努力，應承純姨得唔得？」

我不確定地回答：「好啊。」

這事情真諷刺：別人的父母比起自己的父母更看得透自己的想法，並且支持我。

在這一餐内，他們問了我很多問題，包括學校狀況、興趣、中學識應情況等。

我發現與他們聊天並不是我想像中這麼大的壓力。





離開了茶樓後，達叔表示：「我哋有啲嘢做，我哋走先喇。」

陳慧恩說：「好啊daddy，咁我同振華周圍行多陣。」

純姨說：「咁你哋兩個慢慢喇，byebye。」說罷，他們便走進了地鐵站。

我們從旺角中心附近走到花墟，沿途上罕有地沒有太多講話。

我沒有主動與陳慧恩答話，主要是因為我在沿途上一直思考着達叔和純姨的說話。

很亂...

我的心很亂，我該怎麼辦。





「喂，你全程粒聲唔出咁，有咩事搞到你年初四咁嘅樣啊？」陳慧恩停止向前行，率先開口。

「唉......」我只回應了一個字。

陳慧恩走到長凳坐下，表示：「係咪關足球事呀？」

我坐在她旁邊，驚訝地說：「嘩，你識讀心㗎？」

陳慧恩說：「都估到啦，頭先飲茶嘅時候一講到足球你個表情即刻唔同曬，好似有好多嘢諗咁。做咩呀？有咩事呀？」

我回答：「冇嘢呀冇嘢呀。」

陳慧恩帶點憤怒地說：「你咁樣叫冇嘢？行咗半個鐘都冇嚟神氣咁嘅樣。答我冇嘢真係有嘢啦，你講啦，我會聽㗎。」

我把球探的事情和盤托出，她聆聽完這件事後表示：





「咁唔係幾好咩，你睇得好到有球探睇中你喎。你唔想踢職業咩？」

我回應：「我就梗係有興趣踢職業啦。但係咁樣，平時老母開口埋口就將成績掛喺嘴邊，我考唔好都畀佢話一餐，我唔係太有信心佢會同意我踢職業。」

陳慧恩表示：「同佢傾下囉！你有冇同你阿媽傾過呀？呢啲唔傾就永遠都冇共識㗎喇。」

我繼續說：「我有同佢講過呀，但係佢好似當我講笑咁。佢完全冇認真看待過我作為足球員守龍門呢件事，自己最親嘅人完全唔重視我嘅努力、或者冇諗過去聽我嘅諗法......」

此時陳慧恩伸手搭著我的肩膊，微笑著說：「其他人唔明白唔緊要，我會支持你㗎，你唔開心嘅時候記得唔好屈住喺個心度。講出嚟會舒服啲㗎，我一定會聽，成日都愁眉苦面咁就唔靚仔㗎喇。」

「多謝妳先。」我沒精打采地說：「男X萃喎，咁多年稱霸學界，點樣打呀？佢哋仲有兩個係港超聯梯隊嘅球員。我要打得贏先至可以同東X U16簽約，有乜可能喎......」

陳慧欣表示：「點會冇可能呢？前兩場有冇人估到你哋會贏先？我信你得㗎！下個禮拜比賽我一定會嚟支持你，等我叫埋我啲friend嚟先。」她站起來，雙手捉住我的膊頭大力搖，「畀啲信心自己，似返個隊長！」