真人真事改篇﹕師生戀﹕《最接近的陌生距離》: 第六十八章之四

Miss見到我個奸笑嬲到塊面紅晒！家姐可能係成家人中比較清醒一個，佢知咁玩會玩死Miss，於是跳出嚟話：「阿爸呀，盈盈點會有細佬件衫呀！」
 
家姐一講完就知奶嘢，連忙雙手揞口！Miss諗都冇諗過，佢都有被Team Kill嘅一日！
 
「盈盈？」老豆望住家姐，指住電話中嘅Miss話：「你做咩叫佢做盈盈呀？一早識架？你頭先又話細佬咩『盈盈係煙幕』咁即係點呀？」
 
「啊～～～！」家姐好內疚咁望返Miss，好彩家姐轉數都快，連忙話：「其實⋯⋯就咁嘅！我真係一早識Miss Wong 架啦！佢係我大學師姐嚟架！香港大學，中文系，Yeah!」家姐望返Miss話：「就⋯⋯之前傾上莊時，你返過嚟幫我地手嘛⋯⋯哈哈⋯⋯所以就識咗囉⋯⋯係咪呀，盈盈⋯⋯」
 
「啊⋯⋯係呀！係呀！世界真係細呀可！」Miss好尷尬講。
 




「哎吔！原來咁有緣呀！」阿媽唔知點解好開心，就話：「黃老師你唔只係匡仔個老師！原來仲要係子榆嘅師姐呀？哎吔，你食咗飯未呀？過埋嚟一齊食呀！加雙筷就得架啦！」
 
阿媽酒後吐真言，佢真係好鍾意Miss Wong，所以佢係真心想叫Miss嚟食飯。Miss本來尷尷尬尬咁，但感受到阿媽嘅真誠後，佢就面露笑容，有啲怕醜咁婉拒：「我食咗啦，唔使客氣啦Auntie 。」
 
「Auntie？！」仲唔畀我捉到你？！我瞪大眼，大笑出聲。Miss都知奶嘢，又嚇到hang機！因為只有一個情況佢先會叫阿媽做「Auntie」——佢呢刻唔覺得係我老師，佢做緊我女朋友！
 
我知！Miss一定係一時忘形，亦表示佢都有呢份心意。我見住Miss個樣，由本來慌寸大亂、驚穿煲，到而家好似有啲釋懷。佢依然係好惡瞪住我，但嘴邊嘅笑卻好sweet。
 
我收起嬉皮笑面，好認真同佢點頭，讓Miss意會到我嘅心意——我就係想畀呢個屋企你。
 




家姐呢個時候出嚟打圓場，拍我一下頭就話：「妖，有幾出奇呀。盈盈係我師姐嘛！叫阿媽做Auntie 都得啫！」
 
「鍾意嘅叫埋媽咪都得添。」阿媽古古惑惑咁笑，飲咗啖酒。
 
「呃⋯⋯！」Miss面都紅晒！
 
「吓？！」家姐望實阿媽！
 
「嘩⋯⋯痴撚線架⋯⋯」我都嚇親！
 




「你個衰婆講乜撚嘢呀？」係得老豆乜鳩都唔知。
 
「你講咩話？！你叫緊邊個呀？！」阿媽啲氣場爆緊出嚟！
 
「對唔閪住老婆。」
 
「黃老師係子榆嘅師姐，咁一定情同姊妹啦！叫我做媽咪都得架！」感覺阿媽好似上晒身咁，佢咁識抽水架咩？重點係⋯⋯佢都抽得幾準喎！
 
「啊⋯⋯哈⋯⋯哈⋯⋯」Miss尷尬笑，又好惡瞪我一眼，好想我快啲救佢。
 
我繼續笑咪咪，眼神話佢知「我嘅屋企人就係咁可愛。」
 
「唉⋯⋯掉你老味，都唔知你地搞乜閪嘢⋯⋯明明講緊個閪仔係咪基架嘛！講到咁閪遠！」老豆飲到醉晒，打咗個長嗝就拎返主導權，話：「子榆！你老實答我！呢幾日細佬根本冇去你度屈蛇係咪？佢去咗男朋友度吉屎忽！係咪？」
 
提到我個「男朋友」時，Miss「哈！」一聲大笑，掃走尷尬嘅感覺，就好似喺現場同我地食飯咁。突然佢兩眼發光，靈光一閃話：「Uncle呀！其實子匡呢排鍾意睇Gay Porn架！」




 
「雞⋯⋯雞⋯⋯咩話？」
 
「喂！盈盈講還講呀！呢個唔講得架！」仆街！有位被Miss反擊添！
 
點知家姐同Miss一個眼神交接，好似打藍球交波咁，家姐即刻補多句：「Gay Porn呀！基佬四仔呀老豆！細佬應該當係做功課，學下嘢同男朋友玩咁啦！」
 
「謝子榆！！」我怒吼！
 
「你個仆街仔呀！」老豆激到就嚟爆血管，就咗納起個滷水脾想打我。
 
「哎呀，阿爸呀。呢個時代男仔鍾意男仔，好閒啫！」家姐恥笑咁講。
 
「閒你老母！」老豆。
 




「喂！死佬做咩鬧埋我呀！」阿媽好惡咁鬧。
 
「對唔閪住老婆。」老豆180度即刻收掣。
 
「啊⋯⋯⋯哈哈哈⋯⋯」Miss 好似都豁出去，漸漸融入我地呢個咁撚痴線嘅大家庭。
 
「咁⋯⋯黃老師！我個閪仔唔係基架話，咁佢同邊個女仔拍拖呀？」老豆塊面愈來愈紅。
 
Miss微笑住，想講又唔講咁。我知佢呢一刻都掙扎緊好唔好公開。我知Miss唔鍾意被人迫，所以我頭先都係玩下膠，踩下線，畀佢知我心意就算。但我冇諗過Miss呢一刻竟然諗咗幾秒咁耐。
 
佢好想講，好想講，於是佢準備開口：「其實⋯⋯」
 
「衰佬！唔好再搞到黃老師咁尷尬啦！」
 
Miss被阿媽截住咗，一面錯愕咁望住阿媽。




 
「我地個仔一定唔係基！我信黃老師！」阿媽鬧完老豆後，慢慢回望我部電話，好和藹親切對視象裡嘅Miss講——
 
 
.
 
「年三十上嚟食飯啦，盈盈。」
 
.
 
Miss吃咗一驚，一時間反應唔嚟。過咗一兩秒佢先識「嗯！」一聲微笑點頭，笑容中帶住感動。