真人真事改篇﹕師生戀﹕《最接近的陌生距離》: 第四十章之二

我喺學校入面徘徊遊蕩，去下唔同嘅地方，唔同嘅課室、空中花園、band房、秘密基地、操場⋯⋯所有我地四兄弟去過、玩過、搗亂過嘅地方。最後我返去自己班房出面嘅走廊。

眼前嘅一切看似冇變，但其實已經變晒。呢度再冇我地四兄弟兄身影同歡笑。我依住走廊嘅欄杆上遠望街境，我唔知望咗幾耐，只覺得天色開始變，天邊慢慢滲出橘黃嘅顏色。然後停車場傳嚟電單車嘅怒吼，我見到一架戴人嘅電單車從學校離開。

電單車上嘅背影，我一望就知係邊個——Miss坐李Sir車走咗。

我深愛嘅人坐另一個男人車走咗，佢⋯⋯冇問我喺邊，冇問我心情點、冇問係咪仲喺學校⋯⋯冇問⋯⋯一句都冇問⋯⋯

同好友決裂、心愛嘅人唔當我係一會事⋯⋯一日之內我全部經歷晒。





= = =

我好似痛到冇晒感覺。個喉嚨好似頂住頂住，唔知想點，好似有嘢想叫出嚟咁。只知道我斷晒片咁，當我有返啲知覺時，個天已經黑晒。我面前係海港嘅景色，身邊全部都係歡笑嘅聲音——原來我不知不覺地行咗去觀塘海濱公園。

人來人往，船來船去，我望住眼前嘅景色咗好耐，但我個腦係白。成個感覺好夢幻，日頭發生嘅事好似夢一場咁。但心入面嘅痛話比我知，一切都唔係夢。

我望一望手機，得返最後10%電,有十幾個未接來電，全部都係家姐打嚟搵我。Miss嘅Whatapp同未接來電就一個都冇⋯⋯咁代表緊啲咩？我地係咪⋯⋯係咪分咗手呀？

.





「Happy Birthday !」

.

真係諷刺！喺我最唔開心嘅時候，身邊竟係有人喺度慶祝。

我搵返Miss嘅number出嚟，正想撳撥出鍵時，我心又猶豫一陣⋯⋯我唔想再痛一次。

萬一佢唔在乎我感受、佢只顧自己嘅工作，又或者佢而家其實同李Sir一齊緊呢？！唔得⋯⋯我⋯⋯我會頂唔順架。





我個世界開心變緊、崩潰緊、開始——

——崩——！

「哎吔！」我大腦內先一下聲音，緊接一陣劇痛，然後感到天旋地轉。

我摸住發痛嘅後腦，話：「邊個亂掉嘢呀！我仆你個街！排球？」粒排球喺我腳邊一彈一跳。

「唔該——！可唔可以掟返個波比我地呀？」

頂你個肺呀！掟親人都唔識道歉。我燥燥地就求鳩其向後面掉。屌你，呢個公園好似唔比玩呢啲喎！不過話說回來，頭先把聲有啲熟嘅？

我掟返粒波過去後，身後嘅歡笑聲又再響起。但好快又——噗——！

「嘩——！」又嚟！呢次波餅食得仲應！好似拍龜頭咁，喺頭殼頂咁拍落嚟，痛到我即刻標眼水。





「Sorry呀！Sorry呀！」把好熟嘅女仔聲由遠至近咁埋嚟。

屌，我燥燥地拎起粒波，轉個身就屌：「喂！屌你！呢度唔可以玩排⋯⋯咦？」

「啊——？！」埋緊嚟嘅女仔見到我之後驚訝起嚟。

.

「蟲蟲？」

「阿匡？」

= = = =





ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師