真人真事改篇﹕師生戀﹕《最接近的陌生距離》: 第三十五章之二

今日心情都幾複雜。李Sir一日都唔夠就搞到我囉囉攣。我又唔可以嬲Miss，嬲Miss即係唔信佢。而家鬱悶嘅感覺都仲煲緊，個腦仲係記起Miss同李Sir互動嘅畫面——

「哎呀！」

頂！分咗心！切親手！！啲血啡到巴巴聲！就七點鐘，咩都未煮添！

叮噹——！門鈴大響，唉⋯⋯

「你放工啦？」我開門，用柒血嘅手同Miss揮手。





本來Miss係一面期待嘅笑容，佢見我成手血，即刻緊張咁叫：「你切親手呀？」

「哈哈⋯⋯係呀。」我單手開鐵閘。

「你真係呀！」Miss一入門口就掉低晒啲手袋，望下我隻手傷成點。佢話：「睇少你一陣都唔得嘅！好彩切得唔深咋。First Aid呢？」

「冇呀。」

Miss一聽就好惡咁睥我一眼，又嬲又緊張咁講：「你⋯⋯你⋯⋯激死我啦？！唉！止咗血先！」





「盈盈唔洗啦！少少血唧！」

我叫唔停Miss，佢帶咗我去梳化坐低，同時已經拎咗紙巾出嚟撳住我傷口。Miss個樣又嬲又緊張，佢個注意力喺晒我受咗傷嘅手指頭度。一時間我內心百感交集。更有一股難忍嘅衝動，我按奈唔住就想錫佢一啖。

Miss見我哄咗埋嚟，就縮咗一下，話：「喂！你做咩呀？！」

我再進攻之下，Kiss咗佢嘴唇。

「喂呀！你仲流緊血架！」Miss縮開，鬧咗我一句。





我唔理佢，再錫一下，又一下錫，最後變咗熱吻。受傷嘅手都唔理仲有冇流血，十指緊扣咁握住Miss隻手。

錫完佢之後，佢好似一面飲醉咗咁，成塊面紅晒。我見Miss又怕羞、又嬲又擔心咁望住我，我唔知點解會同佢講咗句：「Sorry。」

然後我明白咗我係為今日呷咗一大樽醋而道歉。

「你做咩切親手咁唔小心呀？」Miss咁問，其實我感覺到佢都知道答案。

「我分咗心囉。」

「點解分心嘅？上堂都算啦，切嘢都係咁！」佢好似家姐咁鬧我。

「我呀⋯⋯Sorry。」

Miss冇點講咩，就繼續幫我止血。然後佢就話：「你真係好大反應喎。」





「嗯？」

「因為Alex呀。」

「嗯！」

「你唔信我呀？」

「唔係。」我搖頭：「我唔信我自己唧。」

Miss忽然停低手，滿面怒容咁瞪我一眼，鬧咗句：「低B仔！」

我唔好意思咁低頭，唔敢望佢，好怕比佢鬧。但Miss突然攬住我：「今日要你驚咗一日，對唔住⋯⋯」





佢喺我耳邊用把喊聲咁講。唉⋯⋯又搞喊佢。

「你估我唔知咩？你份人咩都寫晒喺塊面到！」Miss忍住唔想喊，但忍得好辛苦：「我知你唔開心！放學我想咩都唔理即刻嚟陪你。但⋯⋯對唔住⋯⋯我⋯⋯仲要⋯⋯」

我知佢有工作在身，唔係話陪我就陪我。所以我輕輕拍佢肩表示我明白佢苦衷。我更明白佢一見我死頂嘅樣，佢就唔開心。

「盈盈，我冇嘢呀。」我拍佢肩安慰佢：「我都知你要做嘢，臨近考試又忙。我冇嬲你陪唔到我呀。」

「嗯！」Miss點咗下頭，話：「其實你係咪真係好介意我同Alex太熟呀？」

唉，可以點答呀大佬？我心諗：「係！你地最好絕交添呀！」。但係李Sir一早識Miss，咁做會對Miss好殘忍。

我諗咗陣，諗到個比較好嘅說法。

「盈盈，只係我唔慣唧。」





「嗯？」

「我由識你到今日剛剛兩個月，平時見開你唔係對學生就係對老師。你點同朋友相處我係一啲都唔知。今日見到李Sir，我就知道你同男性朋友原來可以好close。我又唔熟李Sir，加上我係有啲比較嘅⋯⋯咁⋯⋯加加埋埋，我有啲唔知點應對同唔開心囉。」

「嗯。」Miss明白我講咩，點一點頭。

「唉⋯⋯你知我想像力豐富啦。你話佢係你姊妹嘛。我就諗到你同佢食lunch嗰時會唔會好似一般閨密咁手拖手。或者有冇一齊去過日本，一對閨密除晒衫一齊浸溫泉咁。」

「低B仔！」Miss突然笑咗出聲：「你咁好想像力，你不如去做小說家啦！」

一聽Miss笑，成個氣氛就唔同晒，我笑住講：「都好喎！我同你嘅故事應該都幾精彩！值得寫！」

「咁你同我操好啲作文先呀！成日寫錯字！又鍾意寫口語！」Miss抹咗下眼淚，漸漸平靜返咁講：「低B仔，我知你今日忍耐緊。我諗返起以前啲Ex其實係迫我同Alex絕交架。」





哇⋯⋯好彩我冇咁做咋。

「其實我係好擔心你會同佢地一樣迫我咁做。」Miss講完，好似鬆晒，錫咗我面龐一下：「我好開心你冇迫我！你係最錫我嘅男朋友呀！」

聽到佢咁講，我放心咗。今日見李Sir搞到我成個人陣腳大亂，又亂諗嘢，可能真係諗多咗啦。

「咁我聽日都係唔搵Alex食Lunch。反正咁忙。不過⋯唉，佢冇朋友又好慘嘅。」

「唔洗擔心喎！我相信佢好快會識到好朋友。」諗起黎Sir，我就忍唔住要奸笑。

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師