真人真事改篇﹕師生戀﹕《最接近的陌生距離》: 第三十三章之三
我同Miss繼續行宜家家私, 去咗唔同呃示範單位FF未來嘅生活。期間我地互相了解到大家嘅生活喜好咁。Miss知我想要個display架，可以擺我啲高達出嚟。而我就知道咗Miss想要個畫架。
「呢個幾好喎。」Miss坐喺圓櫈度，模擬畫緊油畫。
我見到畫架前嘅Miss又變咗另一個形象。佢教開中文，開口埋開都有少少文縐縐。特別著長裙戴眼鏡嘅佢更加有一種文青嘅感覺。今日著牛記嘅Miss 配埋個畫架，就咁睇佢真係似一位美術老師。
「Miss你識畫畫嘅？」
「我中學時代有修Art架嘛！ 同埋最近有報下啲Art Therapy 課程 ，搞到我想畫返畫。」
「講中文呀唔該。」
Miss起返身，叉腰講：「即係藝術治療呀。我想更有效咁照顧好似你呢啲Sen學生嘛！所以要進修一下囉！」
Miss仲未講完，示範單位外突然有個女人揮手叫道：「咦？盈盈？！」
Miss 打咗個突，就上前好開心攬住個女人，話：「Ada!!」
「咁啱嘅！係度撞到你！上次見係⋯⋯一個月前囉！我生日蛋糕都未切你就走咗啦！」Ada抱怨咁笑說。
「Sorry呀，上次我學生有事，我要即刻搵佢呀。」Miss應該講緊上次我喺尖嘴搵Miss嗰次。
啊⋯⋯⋯⋯我認得啦。嗰晚Miss比咗張相我睇，佢同一個女仔影相，就正正係呢個叫Ada嘅女人。Ada留住一把又長又亮麗嘅黑髮，黑色嘅緊身上衣、黑色嘅收腳褲、黑色嘅高踭鞋、仲有黑色嘅手袋。佢成個人都係黑色嘅色調，連皮膚都係健康嘅古銅色，令佢塗咗紅色唇膏嘅嘴唇更為突出，更有一種紅唇烈焰嘅感覺。在我望嚟，Ada呢個女人感覺唔多令我舒服，雖然佢有一種貴氣，但更有一種壞女人嘅感覺。而且佢有一種氣質令我好敏感，就係——拜金嘅感覺！佢同Miss泊埋一齊，更顯得Miss真係一個好有教養嘅女仔。
一個文青同一個拜金女⋯⋯大纜都扯唔埋掛？定係未教書之前嘅Miss都同Ada係一樣？
「介紹一下先。」Ada對住示範單位外嘅猛男招手，對Miss講：「我男朋友，Marco。健身教練，嘻嘻！」佢嗰下「嘻嘻」好有一種自信，似乎想喺Miss面前威一下。
「Hi, 阿盈。」
「Hi!」
Ada向我望嚟，就一面疑惑，問Miss：「 咦？個細路係⋯⋯？」
Miss望咗我一眼，我幾希望佢好爽快咗答「我男朋友呀！」但事實Miss係咁皮田講：「佢叫阿匡，係我學生。」
唉⋯⋯雖然預咗。但⋯⋯都sad sad地。 我明嘅⋯⋯我真係明⋯⋯人地擺個健身教練出嚟大佢，唔通Miss會同佢講「呢個係我學生，亦都係我男朋友！」咁樣咩。
我明嘅，明嘅⋯⋯
「Hello。」我向Ada揮下手，就坐喺梳化度聽佢地兩個女人喺度吹水⋯⋯唔係！係聽Ada講自己有幾撚巴閉！
Ada一面奇怪，就話：「盈盈，呢個鐘數都仲同學生一齊嘅？」
Miss笑一笑，處變不驚就話：「佢父母唔喺香港。今日未陪佢食下晚飯囉。我又可以捉下佢啲功課。哈哈⋯⋯」Miss笑住打圓場，好巧妙咁令成件事唔會令人起疑。
Ada笑住搖頭，一面佩服咁講：「盈盈你真係唔話得啦，做老師做到咁上心，做你學生真係好幸福！如果要我用私人時間睇住啲學生我真唔得囉！所以我就醒目呢，一畢業就決定唔做老師！下定決心等人養！」
Miss笑一笑，擰晒頭咁講：「你小學已經咁講架啦！咁你另一伴一定都唔差啦！」
Ada好自然咁橋實Marco粗壯嘅手臂，沾沾自喜咁講：「算佢啦！暫時我想要啲咩佢都滿足到我嘅！」Ada靈光一閃咁眼仔碌碌，笑說：「啊——！盈盈，你睇下呢個係咩嚟嘅！」
Ada向Miss展示佢嘅手袋，睇外型好似今朝雜誌見到嗰款Hermas袋。Miss雙眼發光，眼都突埋：「咩話！你買到呀？呢款就算配貨都要六位數架喎！仲要唔一定有你想要嘅款同皮質呢！前前後後加埋⋯⋯要成二十萬架喎！」
Ada微微一笑，但難忍佢炫耀嘅快感。冧晒咁講：「Marco囉，我叫佢唔好買，佢係要買！嘥晒啲錢！」
Marco腼腆咁笑，佢向我望過嚟，我地眼神交接咗下，一種男人嘅默契於一剎那間接通咗——「咪聽佢吹水。」我好似聽到Marco用心電感應同我講。
「啊——我好想要啊！好想要啊！真係好想要啊！Ada!送比我啦！」Miss成個小朋友見到玩具咁開心，同時又羨慕人地有，更心噏自己冇。
我硬係覺得Ada一直向Miss炫耀，以居高嘅姿態應對Miss。 佢接下嚟嗰句，更加令我個心想跳出嚟咁。
「你想要好易之嘛。就算你想要幢幾千萬嘅樓，阿Vick都會買比你啦！手袋呢啲好閒唧！」
聽到「Vick」呢個名，我成個人好似結咗冰咁！
「喂啊！」Miss向我望嚟，即刻收起笑容。佢望返Ada就話：「唔好提Vick啦。我同Vick散咗成個月架啦！」
「散咗未一齊返囉！我唔信阿Vick冇搵過你囉。佢應該想同你喺返埋一齊嘅!盈盈你咁靚又咁好，邊個會捨得拋棄你呀！」Ada個表情直頭似係將「你咪扮晒嘢啦！」呢句寫落塊面度。
「佢去咗外國做嘢啦。」Miss下意識咁再望咗我一眼：「我同Vick已經完架啦！唔好再提佢啦」
「哎吔！你真係好嘥嘢囉！你唔要Vick, 我要啊！」Ada難掩佢一絲興奮：「比佢contact我啦！come on 盈盈！」
我聽到眼突，呢個女人傻架？喺自己男友面前公然講想要人地個Ex嘅contact? Marco又向我望嚟，我又好似意會到佢嘅無奈⋯⋯唉，就算操到Hulk咁又有咩用呀？條女都唔尊重你嘅。
「傻咗咩你？講呢啲！」Miss苦笑:「我已經當冇識過佢！所有contact我都掉晒啦。」
「唉⋯⋯以前我都係靠你先同Vick搭到兩句咋。你知唔知我嗰時幾羨慕你呀！Banker喎！我恨都恨唔到呀！」
「夠啦。你點可以比你男朋友聽到呢啲嘢架？」Miss都開始頂唔順，說話帶有少少教訓嘅意味。
「哼！我就係要比佢聽到，我要佢有啲危機感呀！」Ada一面女權在上嘅姿態去講：「啲男人冇危機感就唔識緊張你架啦！⋯⋯唉，算啦，唔講Vick。咁你有新男朋友未呀？洗唔洗介紹你識？Marco啲朋友個個都好Man同Sexy架！」
「唔洗介紹啦。」Miss苦笑住擰晒頭，然後有禮貌咁講：「我一早有新男朋友啦。而且佢對我好好呀！」
我聽到之後喺內心暖返啲，但諗起能力上嘅差距⋯⋯我仍然覺得自己好廢。
「有幾好呀？有冇買Hermas袋比你先？」
「我男朋友比我嘅嘢，仲貴過Hermas袋啦！」
「吓？！」Ada好驚訝：「佢送咗層樓比你呀？」
Miss笑而不語，搞到Ada呢個時候個樣變得好驚喜又緊張，不斷問Miss個男朋友係點。兩個女人雖然情同姊妹，但Ada個格擺明就好想乜嘢都要同Miss比一餐。
Miss比佢問到有啲煩，想轉下話題，但啲話題總係被Ada lead鬼住晒。佢個世界就只有「男人、女人、、地位、錢」。漸漸地，Ada講到一啲我冇可能去到嘅領域。
後來我聽到有啲悶悶不樂，Ada講嘅話題都係同錢、地位、成就有關。雖然佢唔係衝著我而嚟，但我總係將Ada嘅說話變成一把把尺。
一把又一把去衡量夠唔夠愛Miss嘅尺。
有冇送Hermas比Miss? 冇。
有冇車？ 冇。
有冇樓？ 冇。
有冇帶過Miss去旅行？ 冇。
有冇學歷？ 冇。
冇、冇、冇、冇⋯⋯樣樣都冇！
就嚟連自信都冇埋。
我灰到眼前一切好似變成黑白色咁。Ada話比我聽成人嘅世界就係咁冷漠同現實，樣樣都同金錢掛鉤。即使係感情都好，你愛一個人都係同錢有關。
Miss同Ada係好姊妹，難道真係唔會受呢啲價值觀影響？我記得Miss講過，當初佢同Vick一齊都係為咗解決學費嘅問題。
唉，明明幾個字之前我被Miss嗰句「等你100年」所感動到。點解而家⋯⋯唉！我好廢添。心情嘅起落，簡直就好似由天堂跌落地獄咁。
「你新男朋友真係咁好？」Ada難以置信。
「嗯！」Miss好有信心咁點頭，個樣好甜好幸福：「佢比我感受到一種同以前拍拖截然不同嘅感覺！嘻！」
Ada好似無法攻陷一座堡壘咁，明顯個氣焰冇頭先咁勁，佢話：「咁好啦，有機會一定要介紹你男朋友比我識添呀！唔傾住啦，我地之後再約飲嘢啦！」
「好呀！」
「咁再見啦！Bye!」
「Bye!」
Miss目送Ada走咗，就回頭對我呼咗一口氣。佢一面疲態，佢應該冇諗過無啦啦要同Ada嚟一場唇槍舌戰。而且開戰理由亦係好撚無聊，全因Ada無端端好勝心作祟要同Miss一比高下！
「你肯定嗰個係你好姊妹？」我感覺唔到Ada嘅真心。
「梗係啦！我地幼稚園已經識架啦！」Miss坐喺我身邊。
「佢講嘢句句都針住你喎。女人嘅友情真係好難明。」
「Ada由細到大都係咁啦。我慣晒喇，Ada佢係冇惡意嘅。」
「嗯⋯⋯」
「你做咩呀？」Miss見我有啲失落，佢擔心起嚟：「悶親你呀？」
「嗯，係呀。你地啲話題我都聽唔明。」
「唔洗聽得明架啦。」Miss挨落嚟，好似想比返啲信心我：「你而家只要專心讀好書就夠架啦！」
「嗯，好啊！」我笑住，但仍然覺得自己好廢。
「嘻！低B仔。」Miss起返身，就拉住我：「行啦！差唔多開場啦！」
於是我同Miss去咗睇戲，但失落嘅心情令我冇心神去欣賞呢套我期待已久嘅電影。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師