真人真事改篇﹕師生戀﹕《最接近的陌生距離》: 第三十三章之一

嗶⋯⋯嗶⋯⋯嗶⋯⋯

電話嘅鈴聲就好似死神嘅催命號角咁令我緊張萬分！

如果比Miss知係蟲蟲打嚟，咁就穿晒！佢好憎人呃佢，咁樣實分手都似啦！唉⋯⋯！點解我要咁蠢作咗個大話出嚟呀！

而家部電話係咁響，唔接就一定出事。但係硬接嘅話我又可以點保證自己唔會穿煲呢？

Miss好疑惑咁望住我，死得啦！比Miss感覺到我想拖添！



唔理咁多啦！接咗先講啦！

「喂？」

「喂！」

咦⋯⋯

「喂！你係邊個呀！你頭先打嚟做咩？！」



咦？！

仆你個街！男人嚟嘅？！

唔係蟲蟲？

啊——！係啦！因為最尾嘅數字唔知係0定9，所以我保險咁入晒兩個號碼！言下之意呢個9字尾嘅電話唔係蟲蟲嘅！

呢個時候我唔止鬆咗口氣，我仲靈光一閃，將錯就錯咁將電話另一邊嘅男人當係陳婆婆嘅親人啦！



「你係咪陳四妹嘅仔？你媽媽佢入咗院，我地義工搵咗你成日都搵唔到呀！」呢招順水推舟應該可以過到骨嘅？

「你老母就入院！邊撚個陳四妹呀？！痴線！」對方爆完粗後就cut咗線！

「嘩！家陣啲人咁惡嘅？」我好巧妙咁將部機較咗靜音收喺褲袋度，萬一蟲蟲真係打嚟都唔會咁危險嘛！

「做咩呀？」Miss似乎都理解唔到呢個畫面搞緊咩。但至少佢一定唔會懷疑。

「唉⋯⋯我入錯電話囉。」我攤開掌心上嘅號碼比Miss睇，話：「我蠢囉，抄號碼抄得衰。唔知最尾嘅係0定係9。所以入晒兩組號碼，再撥咗出去。等陳婆婆啲家人返搵我嘛。」

Miss彈一彈我額頭，笑說：「都叫咗你寫好啲字架啦！」

「嗯！」我見佢笑晒咁，我個心就定晒。

總算過到骨。



諗返起真係好似行鋼線咁凶險。萬一真係蟲蟲打嚟，我真係唔知點拆。

以後唔好再講大話呃Miss, 真係唔好再係咁。

= = = =

食完飯之後，我同Miss去行下宜家家私。

以前細個好怕同老豆老母嚟，一來啲示範單位好靚，覺得自己呢世都唔會住到呢啲單位。二來同老豆老母行街真係好悶。不過，我又冇諗過同Miss行宜家家私會有唔同嘅體驗。

「啊⋯⋯」Miss打咗個長長嘅喊露，庸庸懶懶咁話：「好想瞓啊。」

「啊——！我都係。」我都被佢傳染咗打咗個喊露。



我同Miss當正自己屋企咁攤咗喺張床上面。我地對住大家倦曲個身，一時點一點佢個鼻，佢又搣返我個面珠。細細聲講下情話，就好似一對新婚夫婦咁。可能呢個鐘數冇咩人行宜家家私，Miss好放膽同我親暱起嚟。

「其實你想唔想同我一齊住呀？」Miss開口問，我見佢好認真。

「梗係好啦！可以日日同你——」啪啪啪，我古惑咁拍咗三下手掌。

Miss瞪一瞪眼，就一拳哼落我頭頂。

「哎吔！」

「唔准咸濕呀！」Miss指一指我，然後又溫柔咁問：「我認真問架。」

「想呀！」我撥下佢頭髮，圈喺耳背度：「我仲想快啲可以擺低師生嘅枷鎖，好似一般情侶咁同你相處。」

「嘻—！」Miss掩嘴微笑，就坐返直個人，拉返我起身坐喺床邊：「好快架咋。你考完DSE之後，我地就可以做一對好平凡嘅情侶。」我同Miss kiss咗一下，又一下。



而家中四，仲有兩年多少少，長又唔係好長，應該捱得過嘅！

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師