真人真事改篇﹕師生戀﹕《最接近的陌生距離》: 第三十一章之二

我一邊慢慢退後，一邊指示住蟲蟲：「我地慢慢退後，感受下自己嘅呼吸，試下慢慢咁放慢返。你放心，我幫你望住啲狗。你唔洗望住佢地，你不如⋯⋯試下望住我呀！」

蟲蟲呼吸好急，佢慢慢咁跟住我行。然後佢再望住我，佢一雙淚目變得好空洞，更令我憐憫起嚟，佢真係驚到魂魄都唔齊。呢個時候我望返啲狗，留心啲狗嘅狀況，好彩經過我小心處理後，冇再進一步刺激啲狗。然後我又引導蟲蟲話：「你記唔記得我地第一次見面時你打咗我一巴架，你睇下啲掌印仲係咪度？」

當然啲掌印係散晒，我只係借佢打我呢件事去令佢回憶起我地相識經過，最好喚醒佢其他情緒，令佢慢慢從驚恐中轉移過嚟。

「你當時打我時係咪用盡力咁打架？」

「係⋯⋯係⋯⋯我好用力打你⋯⋯」





「你當時一定好憎我。而家你望下啲掌印係咪仲好紅？」

蟲蟲注意力開始放咗喺第二度，佢啲呼吸順暢返同慢咗好多。同時我見到啲狗只係慢慢進迫，佢地雖然仍然警誡住，但明顯個侵略性冇之前咁大。所以我嘗試大步啲咁向後退。期間我慢慢望實蟲蟲雙眼，我見佢雖然仲係驚到喊，人又震，但情緒冇之前咁波動。於是我話：「你望實我雙眼。你睇下，啲惡狗唔喺度架啦。我地大步啲向後行好冇？」

我引導蟲蟲慢慢將向後嘅步伐踏大步一啲，我話：「做得好。你睇下！係咪冇事呀？」我見而家我地同啲狗嘅距離壓少有十零米，於是我話：「蟲蟲，你而家試下慢慢轉身對正我，幫我帶路行返出村。而我就幫你睇住啲狗有冇追上嚟。」

「⋯⋯唔⋯⋯唔好呀⋯⋯」

「唔使驚。而家我地同啲狗距離遠咗架啦，你只要慢慢咁轉身就得架啦。」





「⋯⋯唔⋯⋯唔要⋯⋯」

「你信唔信我？」

蟲蟲諗咗陣，就點頭：「嗯！」

「好！慢慢轉身，唔洗望住佢地。當佢地唔存在就得架啦！」

「嗯！」





「慢慢⋯⋯慢慢⋯⋯」

蟲蟲照我說話慢慢將身體轉返正面咁對住我。呢個時候佢伸手捉實我，就好似遇溺嘅人抓住水泡咁。

「蟲蟲你做得好好呀！而家你只要幫我帶路出村，我地慢慢加快個步伐就得架啦！」

「嗯！」

蟲蟲可能因為背住啲狗嘅關係，佢狀態慢慢正常返，驚恐嘅感覺漸漸消失，所以可以幫我帶路。我同佢步伐慢慢加快時，我地同村狗嘅距離亦愈來愈遠。然後當我地去到一轉角位時，我就即刻轉返身，拖實蟲蟲隻手，急步咁沿路行返出去！

我同蟲蟲唔想太多，一直行，一直行，速度不斷加快。而我地互相拖住大家嘅手，我感受到蟲蟲握得好實好實，掌心嘅汗不斷冒出。

過咗一陣，我回頭睇下啲狗有冇追上嚟，話：「蟲蟲！佢地冇追上嚟呀！我地安全啦！」我鬆返一口氣。

但係蟲蟲仍然好驚，佢拖實我都仲未夠，仲要行快兩步。當轉多幾個彎之後，我先感受到佢慢慢正常返，步速放慢。我見到佢冇再喊，但成個人精神好差，好似幾晚冇瞓咁。





「喂，你點呀？」

「吓？」蟲蟲遲咗幾秒先識認我，神情恍惚咁望咗過嚟。

「冇事架啦。已經安全啦。」

「嗯。」

蟲蟲放開我隻手，改成橋實我臂膀，成個人好似貓仔咁挨咗落嚟。或者佢要咁樣做，先感覺到安全。

但奇就奇在，我唔係第一次同女性有身體上嘅接觸。當刻嘅親密，唔知點解同Miss嗰份嘅親密係截然不同。

忽然間，我記起阿偉曾經對我講嘅說話——





.

「你同個大人比較就一定點睇都覺自己廢架啦！」

「同返同年紀嘅人一齊，你唔單只唔會覺得自己廢，你仲可以幫佢承擔添。」

.

當時我因為幫唔到Miss而覺得自己好廢，阿偉講咗一句令我唔太明嘅說話。

呢一刻，我好似明白咗。內心有一陣久久不能散去嘅感覺。

= = = = 

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師