真人真事改篇﹕師生戀﹕《最接近的陌生距離》: 第二十九章之四
「阿⋯⋯阿嫂⋯⋯」阿波把聲震晒：「對唔住！我唔敢啦！」
「咩話？」Miss好兇狠，但更多嘅係幸福感：「你仲係咁真心架喎！講咗唔准咁樣叫我架嘛！」
食Lunch之後，我地夾手夾腳的咗阿波去天台嘅雜物室。呢度係我地秘密基地，啲違禁品都收埋晒喺度。今日我再一次被阿波Team Kill, 我忍無可忍之下決定執行家法。 順手幫Miss一洩心頭之恨！
「你同我企好啊！」Miss想扮返喺課室入面咁惡，但佢自己講完都忍唔住笑。然後佢問我地：「阿波係咪成日咁樣陷害阿匡架？」
「係啊女王大人！」杰少大大聲咁講，幾個星期前明明佢同阿波都Team kill咗我！佢呢次都算二五喇！
「而家你知道咗我同阿匡嘅關係啦。但你成日都咁『真心』，我同阿匡會好危險架喎！」Miss同阿波講。
係，剛剛屌阿波搞到Miss唔開心時，阿波就戇鳩鳩咁咩都唔知。所以我地上咗嚟秘密基地，然後就同佢地公開咗我同Miss嘅情侶關係。因為阿偉一早估到，所以佢驚喜唔大。倒是杰少同阿波係驚訝到下巴都要跌落嚟！佢地冇諗過Miss嘅男朋友竟然就係我！
「Miss Wong⋯⋯我永遠都記住要叫你做Miss Wong架啦⋯放過我啦⋯⋯！！」
「唔得唔得！」Miss翹埋雙手，擰晒頭咁：「你連續兩日都踩我煮嘢難食，呢啖氣我點都吞唔落架啦！」
然後Miss好溫柔咁同我地三個講：「啊！為咗改善波波嘅真心行為，今日我教大家一個方法呀！好唔好呀？」
「好呀！」我地三個好期待，一定係啲好好玩嘅嘢。
「幫我解開晒波波嘅衫鈕。」Miss笑，但係有滿滿嘅邪惡。
阿波被我地解晒衫鈕，露出肚腩同一對肥仔Lin。我同阿偉、杰少，一人拎住條橡筋，拉到恒晒，等緊Miss落order，我地就執行家法。
「Miss除咗主修中文外，亦都副修心理學同埋輔導。我身為老師，一定要識得用心理學方法去改善學生嘅偏差行為。所以今日Miss想教大家一個好有用嘅行為改變術。」Miss既邪惡又和藹，呢種反差實在太可愛啦！
「就係Behavioral Modification啦！」Miss好似介紹個大人物咗拍晒手掌。
Miss真係好用心咁解釋係啲咩嚟，我雖然唔太明，大概就係要令阿波知道當佢又想「真心」team kill時，就會記得今日承受嘅「後果」！
「痛楚係人類最原始又深刻嘅記憶。所以波波呀⋯⋯」Miss溫柔對阿波講：「我希望你唔好覺得Miss係懲罰你。其實Miss係想幫你架！你再咁『真心』遲啲大個咗就蝕底架啦。」Miss輕輕拍佢肩，一面隱藏邪惡嘅仁慈。
然後Miss用佢好勁嘅說話技巧，設定咗啲情境題再引導阿波回答。當阿波唔小心講咗「阿嫂」時或者陰到佢守唔到我同Miss嘅秘密時，我、阿偉同杰少就會用橡筋彈阿波粒Lin 頭！
笑聲同慘叫聲洩雜埋一齊。係不久之後⋯⋯
「以後喺學校要點叫我呀？」
「Miss Wong⋯⋯」阿波瞳孔好似放大咗。
「嗯！如果喺學校外撞到我同阿匡拍拖時，要點叫我架？」
「Miss Wong⋯⋯」阿波精神恍惚。
「嗯！咁同你女朋友一齊時，會唔會提到阿匡嘅女朋友就係我呀？」
「阿匡冇女朋友⋯⋯阿匡單身⋯⋯阿匡係隻單身狗⋯⋯啊——！佢係單身架！唔好再彈我Lin Lin呀———！唔好啊！！我係人嚟架！」佢精神崩潰。
「嗯嗯！做得好。Miss要問你最後一條啦！」Miss比出食指，好得意咁笑：「咁黃梓盈老師煮嘢係咪好難食呀？」
「黃梓盈老師煮嘢最好食，黃梓盈老師煮嘢最叻。」阿波猛地點頭。
「哇——！你好叻仔呀！」Miss拍手掌，再對我地講：「獎賞，獎賞。」
我地三個收到Miss指示之後就一人嘴咗阿波面豬一啖。呢個就係Miss所謂嘅Behavioral Modification？點睇都似酷刑喎！
但無論點，睇阿波個樣都知佢真係受咗教訓。佢應該會好小心幫我守住我同Miss嘅秘密。
「嘻嘻⋯⋯」Miss好愉快咁坐咗喺棄置咗嘅舊書枱上面，輕輕咁搖腳。
「你兩個真係嚇咗我一跳呀。」杰少到而家都好難以置信：「感覺好夢幻啊！唉⋯⋯早知我聽阿匡講，努力讀好中文啦！話唔定⋯⋯我都可以做到女王大人嘅男朋友啊！」
「冇可能！」Miss打咗個大交叉：「低B仔做到嘅嘢，唔係個個都做得到！嘻！」Miss講完就情深咗望住我，笑得好幸福。
「嗱！講明先呀！你地唔止要幫我保守秘密架！」Miss嘅笑容帶咗份嚴肅同認真：「喺學校我仍然係你地老師，係你地班主任！所有嘢照舊。你地跩犯咗校規、唔交功課、遲到缺席、有違禁品⋯⋯總之Miss一定會揸正嚟做架！」
「係啊⋯⋯我丁屎男朋友福利都冇添呀。」我喺Miss旁邊攬住佢腰：「所以你地都唔洗諗添啦！」
「哎呀⋯⋯我仲以為有著數添！」杰少有啲失望：「不過點都好啦。我真係好替你地開心！由今日開始！我地正式封匡哥係『盈女王騎士團』嘅團長！！」
「Brother!」 阿偉擺個拳頭出嚟。
「Brother! 」杰少。
「Brother!」我，然後我對Miss講：「到你啦！」
「吓？我都要？！」
「你係我地女王嚟架嘛！攞個拳頭出嚟，叫聲『Brother』就得啦。」
「Brother!」Miss將拳頭貼住我地嘅拳頭，吐一吐舌咁問：「咁樣？」
然後我哋一齊望住阿波：「Brother ?」
「Miss Wong ⋯⋯Miss Wong⋯⋯」阿波又比錯反應！
「波波！」Miss瞪大隻眼，聲音都兇惡起嚟！
阿波被Miss嘅聲音叫醒咗，即刻意會到自己又做錯指定動作後就嗱嗱聲擺返個拳頭出嚟：「Brother!」
「Brother!!」
從Miss嘅笑容可以知，佢嘅開心簡單得嚟好純真，好似返去中學時代咁，慢慢地，佢都放低咗做大人嘅壓力。睇嚟佢好享受呢一刻嘅自由自在，喺我嘅朋友面前唔止被肯定地位，亦都可以做返自己。佢呢份快樂都觸動到我，我由心咁替佢開心。
從今天開始，我一定要以令Miss幸福為目標！
== = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師