真人真事改篇﹕師生戀﹕《最接近的陌生距離》: 第二十四章之四

同Miss分手第三日，我繼續被隔離。

剛剛收到消息，下星期四家長教師會有活動。好似話同幾間小學嘅家教會合作過黎學校參觀。都係嗰啲拉新客仔嘅宣傳活動。周Sir話我呢啲搞事份子唔好走出黎影衰學校，所以延長咗我個隔離令，費事我影響學校來年收生。至於肥B佢地⋯⋯哈，一啲事都冇。

唔緊要啦，我當喺精神時間房修煉唧！而且⋯⋯唔知點解，今日我唔係好想上中文堂⋯⋯或者咁講，今朝起身當我見到Miss未睇Whatapps時，我個心除咗痛之外，就有一種好似⋯⋯嬲？嬲嘅感覺？

可能，我開始有少少嬲咗Miss？

分手為咗保護我？





我嘅痛苦你感受到嘛？

唉⋯⋯

心煩嘅唔只呢樣，仲有⋯⋯

「嗰時開完會，我鼓起勇氣問Miss Wong。知唔知我幾驚？」

黎Sir竟然喺空堂時間黎同我講佢點送Miss返屋企！聽情敵講佢點樣追我心愛嘅人⋯⋯天啊！有冇咁痴線呀！





「本來佢惋拒架。後來我決定出絕招！」

「咩呀？綁佢上車？」我已經唔想再理佢，努力咁清功課。

「你囉！」黎Sir嘅說話令我差啲跌筆。

「吓？！」

「我同Miss Wong講係阿匡請求我咁做架。」黎Sir回憶一下之後再講：「我話你喊晒咁請求我，話好擔心Miss Wong會被周Sir騷擾。然後佢好爽快咁上左車。」





「竟然⋯⋯係因為我？」我實在理解唔到，明明係佢要同我保持距離，但點解一聽到係我求黎Sir佢就二話不說上車？

救命，呢個女人究竟諗緊咩？

「然後你地上車有冇傾計？」

「梗係有啦！」黎Sir好興奮，唔知佢有冇開心到扯旗。佢話：「傾左好多嘢添。」

十成九都係有你講冇人講啦。

「佢有問我你今日點。我話你驚被人記大過驚到喊添。」

妖⋯⋯你有冇咁真心呀？

「佢⋯⋯有冇咩反應？」我。





「唔知啊。我掛住揸車都冇細心留意到佢表情係點。」黎Sir：「但我感覺到佢好似好關心你。提到你喊時佢不斷問我你有冇事。但唔知點解，我覺得佢對你嘅關心好似⋯⋯好似隔開左好遠咁。」

「即係點呀？」

「簡單講，你隔離咁多日其實佢可以黎探你。直接關心你，洗咩搵我傾你嘅事呢？」黎Sir。

聽到呢度，我呆咗一下，我理解唔到佢嘅舉動。即係佢仲好在意⋯⋯我？

謊⋯⋯謊謬。又要保持距離，又要關心我，分咗手架啦！又唔係想同返我喺一齊！咁算點喎？

我壓一壓個憤怒，再聽黎Sir講：「我有同佢提到我將會調節訓輔兩組嘅工作比例。佢好奇咁問點解。咁我就話⋯⋯」

「又入我數啦吓話？」我反眼上太空。





「係啊！我係話你唔想佢喺工作上被周Sir騷擾。」黎sir好自豪咁講。

咁真係抵你仲係青頭，比晒靚牌你都唔識打⋯⋯不過，都好嘅。黎Sir老實到唔識拎光環，佢唔單止可信仲保證佢一定媾唔到Miss。

「佢一定又冇咩反應啦？」

「唔太清楚。但我感覺到佢有好多壓抑。」黎Sir:「過左一陣，佢就話唔洗擔心周Sir會對佢點，佢話佢已經——」

講到我最想聽嗰part時，有校工黎敲「臭格」度門。

「黎Sir, 中一有學生同老師發生爭執。需要你幫手！」

「阿匡，咁傾到呢度先。我去做嘢啦！」

我同黎Sir道別。估唔到可以喺黎Sir收到咁多料。其實Miss，你到底諗緊啲咩？





如果真係要保持距離，可唔可以比我專心咁慢慢離開？

= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師