真人真事改篇﹕師生戀﹕《最接近的陌生距離》: 第二十四章之二

我個世界一日之間冇左。好似有一粒核彈咁炸左落黎，不過喺經歷猛烈嘅轟炸之後，頹垣敗瓦之中都總有一啲事物係冇摧毀度——

——我仲好鍾意Miss。

喊完之後，我頭腦清晰咗好多，心亦都平靜咗啲。我明白我對Miss嘅愛並冇因為周Sir嘅事而摧毁。黎緊⋯⋯我好似諗到我應該要點做。

我諗返周Sir頭先嗰句說話，佢應該借我去威脅Miss，換言之Miss係被迫⋯⋯被迫⋯⋯仆街﹗我真係唔想講「爆房」呢兩個字﹗

點都好，我一定要救佢⋯⋯我仲好愛Miss。我忍受唔到佢要受呢啲傷害﹗





但我可以點救？起碼要日日有人睇住佢喎﹗而且一定唔係學生先，因為周Sir咁大權，學生唔係同佢同一個力量層面又好難做到D咩。呢一個人一定要係老師，但可以係邊個呢？

Miss Lau? 唔得啦，佢分分鐘比周Sir食埋都仲得。而且剛剛喺老師之間八到Miss Lau拎咗病假，至少呢一個星期係冇人保證到Miss安全。

Miss喺學校人緣差，仲可以有⋯⋯

.
「你冇事啦？Lunch啦，我地一齊食呀﹗」黎Sir拎左兩盒飯盒入黎。
.





咦⋯⋯咪住先⋯⋯

「阿匡﹗你做咩呆晒？食飯先啦﹗」黎Sir食到成嘴油，一面傻氣，同琴晚揸車嗰個日系熱血老師形象差好遠。

呢個時候，我大腦深處，有一下⋯⋯有一下⋯⋯

「唔撚係吓話？」我細細聲講。

有一下叮一聲，我知道邊個可以保護到Miss，雖然我唔想認，但⋯⋯呢個人就係黎Sir。





「黎Sir。冇記錯的話，你兼任埋輔導主任？」

「係啊﹗學校本身就想訓輔兩組合拼。但副校就反對，於是就有折衷啲方法，我以輔導主任身份加入訓導組。啊⋯⋯順手一提，訓導組老師有D係兼任埋輔導組。Miss Wong就係其中一位，佢負責照顧SEN學生。」黎Sir真係一D餐桌禮儀都唔識，一路食一路講，噴到成枱都係。

「訓輔兩組邊一個權大啲？」

「我其實好反對呢個說法，我係幫學生，諗邊個權大啲其實好本末倒置。」黎Sir停一停，又講﹕「不過我可以答你，校長比較重視輔導組。」

我聽到，心下有一絲希望﹕「點解嘅？」

「呢排多學生自殺嘛﹗」黎Sir嘆一口氣，講﹕「仲有一個原因嘅。見係你，唔好同人講呀。」

「保證唔講出去。」

黎Sir壓低把聲咁講﹕「校長其實都不滿周Sir。一來佢處事有問題，二來佢想收返周Sir嘅權。」





然後黎Sir做咗一下鋸頸動作。我隻眼發光，呢次狗周仲唔HIHI？

「校長出手就一刀切就得啦﹗」

「講就易。一來校長係新黎，未打穩呢度D樁腳，未摸清呢度D人脈。二來周Sir同我地辦學團體有密切關係唔係話炒就炒架。」

黎Sir扒咗啖飯，佢傻戇嘅樣有一絲認真同殺意﹕「我都想佢快啲消失﹗」

「咁⋯⋯咁有救。」

「咩有救呀？」

「嗱⋯⋯黎Sir唔好介意。」我諗左一諗，鼓起勇氣咁講﹕「你都鍾意Miss Wong架可？」





黎Sir眼都突埋，差啲鯁死，話﹕「嗱⋯⋯Miss Wong係好同事。喺同事層面來講呢，就⋯⋯」

佢長氣病又發作，激死我﹗我話﹕「你係咪想媾人呀﹗？」

「係⋯⋯係⋯⋯」黎Sir怕醜到，好想將成個頭埋落盒飯度。

我坐埋去黎Sir度，當左佢係朋友咁講﹕「嗱，你拖唔拖到手仔就睇呢次啦。」

「係⋯⋯咪住先，好似唔係傾我⋯⋯可唔可以拍拖喎。」

「我頂你個肺，咪講嘢住啦﹗」對住呢條傻佬有時真係燥﹕「首先，我都鍾意Miss。」

「吓﹗你又⋯⋯﹗﹗」

妖———！！！





「我地成班4A男同學都好鍾意Miss，佢係我地嘅女王大人。我地係佢嘅騎士。明唔明？」

「明！明！」

「我想救Miss，你都知啦，佢比周Sir騷擾緊。」我閃過狗周頭先嗰下下流樣，我就無名火起。

「我知，佢亂咁傳同Miss Wong嘅關係。但我知係假。太過份。」黎Sir聽到Miss被人蝦，傻氣全消。

「頭先周Sir仲特登同我講佢琴晚⋯⋯。」黎緊呢句我需要好大勇氣去講﹕「佢琴晚同Miss爆左房。」

「吓？」黎Sir吃驚一下，但佢唔多相信，佢話﹕「你指頭先我同佢嘈完，佢過左黎呢度講呢件事？」

「係呀﹗」

「好⋯⋯你講埋先。」

「好﹗嗱，你鍾意Miss，我都鍾意Miss。我同你有同一個身份，同一陣線、我地都係女王大人嘅騎士！」我繼續講﹕「我地要保護Miss唔可以再比呢隻狗公騷擾﹗但我冇權冇勢，我唔夠周Sir打﹗所以我需要你幫手。」

「我可以點做？」

「你話校長好重視輔導組嘛。咁就得﹗」我﹕「用你輔導組嘅權，向校長要求Miss幫手照顧多啲學生。總之個原則係唔可以令Miss喺學校被周Sir騷擾。」

黎Sir諗一諗，就點頭﹕「我諗下可以點做。仲有呢？」

「你同社工吳姑娘、陳姑娘都多合作架嘛？」

「係架。」

「比嘢佢地做。仲要係同老師合作搞活動﹗」我停一停，又講﹕「我成日跟青年中心啲社工玩。佢地成日煩點追數。所以你想吳姑娘搞活動，佢一定好歡迎你咁做，因為佢地都要交數架！至於要搞D咩就後話啦﹗」

「呢個⋯⋯可能Work！」

「非常好﹗黎緊呢個，係好急嘅！今日一定要做到。」我抖咗一啖氣﹕「今日無論如何都幫手車Miss 返屋企。」

「吓——！我⋯⋯我⋯⋯」頂你個肺，黎Sir呢個大人比後生仔更怕羞，成塊面紅晒，話﹕「我⋯⋯我對住佢就講⋯⋯講唔停架。因為我⋯⋯其實會好緊張架﹗」

「唔得都要得呀﹗」我而家又急又嬲又傷心，不知不覺眼淚又盈滿左眼眶﹕「真係⋯⋯如果周Sir再手得呈，Miss就咩都冇架啦！周Sir借我去威脅Miss，迫佢去爆房。已經試左一次⋯⋯」

「吓﹗真係爆左？」

「係呀﹗就琴晚我地喺時鐘門口見到周Sir架車嘅 ！佢⋯⋯佢同Miss⋯⋯」我又開始抖唔到氣。

「但係⋯⋯」

「妖！仲但咩係呀？你條女今晚比人屌呀﹗隨時拍埋片，影埋裸照呀！隻狗公咩都做得出架！你係男人嘅就去救Miss Wong啦！！」表面上我鬧緊黎Sir，實際鬧我自己。我⋯⋯真係好冇用。

「我冇把握，佢平時⋯⋯唉，佢當我係瘟神嘅！」

「黎銘賢，你同我聽住！！」我受夠佢嘅無能﹕「你要好似救我咁救Miss！你救我有幾落力，救Miss都要一樣！」

「係⋯⋯係⋯⋯」

「佢一定對你改觀。佢唔會拒絕你架﹗」接下嘅一句，我唔想透露，因為好似將好重要嘅情報話咗比敵人知咁﹕「Miss剛剛同男朋友散左，佢而家單身。你要追到佢其實唔難架！」

我眼角嘅淚水又開始流出黎。

「你上星期三仆出去搵我。前日又為咗我同周Sir據理力爭。所以佢一定好感激你！佢點都對你有好感！因為⋯⋯因為⋯⋯」

我個心又痛，我開始喊⋯⋯慢慢喊得好大聲。

.

「因為我係佢最錫嘅學生啊﹗﹗」1

.

黎sir聽完，拍一拍我肩膀安慰我。

「黎Sir，幫我⋯⋯幫⋯⋯幫我地班⋯⋯救Miss⋯⋯嗚⋯⋯嗚⋯⋯﹗」

其實諗落都諷刺，我愛Miss，但我冇能力救佢。而我竟然求自己嘅情敵去救自己最愛嘅女人⋯⋯

= = = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師