真人真事改篇﹕師生戀﹕《最接近的陌生距離》: 第二十二章之一

「我諗你朋友今晚都唔洗瞓。一定要為最壞情況打算。」

琴晚我瞓唔著，同我好兄弟傾心事，佢第一句就已經咁講。

「周Sir就算冇實質證據喺手，佢點都會搞到你朋友一身蟻先。」阿偉：「所以唔洗驚！冇證據佢冇咩好做，佢拋鳩你架咋！」

「咁我可以點做？」

「以不變應萬變！」





吓？你又係咁？

= = = =

「謝同學⋯⋯謝同學⋯⋯」

當我從阿偉琴晚嘅說話回神之時，副校長已經唔知叫左我幾多聲。

周Sir不忘喺旁邊嘲笑咁講：「都話左身佢有屎架啦副校長。」





我首先望下Miss, Miss驚到唔敢望住我。再環視下四周圍，副校長、Miss個直屬上司麥Sir、周Sir都以獵人望住獵物咁嘅眼光望住我。我暫時未掌握到佢地地已經同Miss講左啲咩。

「謝同學，請你答我你同黃梓盈老師到底係咩關係？」副校長再問多一次。

我唔知道佢地同Miss講左啲咩同問左啲咩。我又冇同Miss夾口供。如果亂答呢條問題，其實都係死。

因為好大機會我個答案係同Miss對唔上，咁就穿煲！

所以⋯⋯





「以不變應萬變。」

啊——！阿偉！你真係我大哥黎架！

「老師同學生囉！」

我唔扮傻，亦唔作懵。我講嘅係事實啊嘛！Miss真係我老師喎！

副校長見到我個樣咁真心，其實佢都冇可能挑剔啲咩嘢。

根據「以不變應萬變」呢個原則，我唔可以做多、講多咗，我就睇下副校長點出招先。

「我唔係指呢啲。你同Miss Wong有冇一啲師生以外嘅關係？」

「關係嘅嘢好闊架喎鍾副校。不如你舉下例子先啦。」





先出擊，再反客為主，只要你將個問題收窄，就好似將目標鎖定，咁我就知自己要打啲咩啦。

「例如你地喺課餘時間去行街咁。」

「哦——!有啊！」

Miss望左我一眼，盡量鎮定，佢真係驚穿煲。不過佢應該好驚訝我點解會話「有」。

在場老師都好驚訝。只有周Sir冇咩表情，可能吃驚我竟然冇比副校長嚇親。

於是我再出擊：「前個星期六，我同Miss去買中文週活動物資嘛！啊！你等等⋯⋯」

我潛個銀包出黎嗰陣，我腦即刻回憶阿偉嘅金句。





.
.

「幫自己製造有利證據！」

.
.

「嗱！我單都有，成七舊水架。」我將水蛇春咁長嘅單交左比副校。

Miss好驚訝咁望一望我。我覺得佢比較驚訝我原來一直都冇比返張單佢。

我又補多句：「Sorry Miss, 嗰日知你忙緊，所以我幫手出錢買左物資先。但我又唔記得比返張單你幫我claim錢。」

我嘅傻笑令到好擔心嘅Miss都忍唔住笑左出嚟。我又瞄到周Sir，佢板起口面個樣變得好難睇。





我又對住副校講：「鍾副校唔好怪Miss， 唔係Miss用學生錢。佢嗰時好似有嘢忙緊，要不斷接電話。」

我努力將成件事嘅焦點放喺處理物資嗰度，應該可以減少佢地嘅懷疑。

副校長同Miss嘅上司方Sir仲有周Sir眼神互相交接，唔知佢地想諗咩。

「點解你地要喺星期六課餘時間先去買物資？」副校長。

「哎吔，點解仲好意思問。」我摸一摸額頭，一面替Miss辛苦咁講：「你地老師咁忙，平日已經要七八點先走得。收工咁累仲要買物資好唔人道唧。Miss唔洗休息咩！平日買唔到，未星期六買囉，起碼冇平日咁辛苦先嘛！」

我瞄到Miss好似想笑咁。

「Miss係我班主任，我一定知佢有幾忙嘛。最慘冇人幫佢！冇人教佢呀！我盡量幫架咋！」我特登望佢上司方Sir講，順手屌鳩個光頭佬，我再補充：「鍾副校，個活動係全校架嘛。咁一定多物資，唔信你問望下張單。Miss點可能一個人拎得晒架？」





副校同方Sir望完張單後再互相對望點頭，應該認同我呢句說話。

「咁點解Miss Wong剩係搵你幫手？而時間上點解係傍晚時分？」

「咁你要問下Miss先。我自己都唔知，我只可以答你嗰個時間我可以幫到手。」

「Miss Wong?」

睇你啦Miss，粒波交左比你。

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師