真人真事改篇﹕師生戀﹕《最接近的陌生距離》: 第十一章之三

終於，最後一個留堂做功課嘅同學都走左。 Miss示意我將啲中文週物資搬過去佢個位隔離比佢檢查下我做成點。

「喂——！你——！」Miss隨手拎起一啲剪好左嘅資料就好嬲咁講：「有冇搞錯呀！剪得咁樣衰嘅！！ 點貼出黎呀？」

佢怒啤左我一眼，Miss就好累咁嘆左口氣，成個人趴左喺枱度。唉⋯⋯激嬲咗佢添。拿拿聲講句笑話先啦——

「Miss, 從前呢⋯⋯」

我聽見佢好用力咁踏左一下腳，呢下力度我知道佢情緒爆緊，搞到我唔敢搞爛gag。當佢抬返起頭時，佢已經面紅耳赤，準備爆我獲金。





「你剪少少野都⋯⋯」Miss想鬧又唔想鬧咁，可能佢都知我其實冇做錯事，佢知道我本身就係SEN，小手肌唔發達搞到字又醜、剪野又一塌糊塗。 但佢忍又忍唔住，雙眼忍左泡眼淚，就黎流出黎。

唔係下話，平時好惡好強勢嘅女王大人，竟然想喺學生面前喊？其實我見過幾次佢想喊嘅，但每次佢一係好快冷靜，一係就自己行開。但面對面咁忍住泡眼淚嘅都係第一次見。

Miss知道自己就黎要喺學生面前喊，於是行左去窗邊抖下氣，望下遠景。

過左一陣我聽到Miss用一把震震地、想喊嘅聲同我講：「六點啦，你返屋企啦。」

難得獨處，我點會咁易走呀。





「Miss，對唔住呀。我幫你再做過呀。我今日留到幾耐都得架。」

Miss搖一搖下手，就話：「唔使，其實剪黎都冇意思。 中文週不嬲吸引唔到同學參加。 我唔想你為左我啲無聊工作浪費時間。」

「咁又係呀，年年中文週又真係幾悶。」我停一停，諗一諗，又講：「其實年年啲老師都hea做啦，我覺得你⋯⋯hea左佢都得架唧。」

Miss回個頭黎，眼神好不滿。不過眼框裡面嘅眼淚想流又唔流，又嬲嬲地嘅樣⋯⋯真係好可愛。

「我唔係你可以話hea就hea呀。」Miss:「你唔明架喇。 你係學生唔洗知咁多嘢。你返屋企啦。」





任我點努力氹佢，根本冇辦法幫佢分擔到工作壓力。睇嚟中文週活動對佢來講唔係搏好成績咁簡單，於是我同佢講：「 啱嘅，老師點可以學我地做野hea架？ Miss，多口問句呀，如果今次中文週你搞唔掂，你係咪會好大鑊？」

「試用期。」Miss嘆左口氣：「中文週活動係我過唔過到試用期其中一個嘅指標。」佢難過咁望咗我一眼：「你知架⋯⋯我嘅事⋯⋯唉⋯⋯算啦，你唔洗知咁多。你返屋企啦。」

「咁唔得啦！咁大件事唔幫手點得呀？」

Miss眼紅紅咁用好懷疑嘅眼神望住我：「咁你可以點幫我呀？今次唔係幫我搞下壁布，幫我追人功課咁簡單喎！係全校活動呀！」

「全校活動，咁即係要玩啦！哈哈⋯⋯Miss你真係問啱人。我係學生，我可以答到你我地最想玩咩。」我：「Miss老實講，呢啲貼壁報板唔Work架。冇人睇架。垃圾黎架。」

「你夠啦吓。」Miss不滿我踩緊佢嘅工作，眼神一厲。

「你地個個老師都係咁。以為你地諗嘅野就對我地最好！其實我地好簡單之嘛，兩個字：好玩！你本身想喺Lunch搞？」

「一星期五日嘅Lunch活動。」Miss再補充：「負責老師各自負責兩至三個活動。 我負責其中兩日活動。即係要諗兩個活動。」





我諗一諗，以前喺青年中心都玩過唔少活動應該可以抄下橋。

「其他老師打算點搞？」

「都係書法比賽、朗誦、問答比賽呢啲。」

「咁食得屎啦。」

「死仔！尊重啲啦！」Miss唔耐煩講：「咁你諗到未呀？」

「哈哈哈哈！嗱！你要多謝我啦！」

「講啦死仔！」





「第一個活動，玩Check Point! 例如將一啲字拆開，啲部首喺學校周圍放，要班友仔走暈全校咁解下迷咁囉。中文組有冇錢比你搞活動？」

「有呀。」

「咁得啦。嗱!準備定啲禮物。吸引同學去玩。」

Miss沈一沈默，點左一下頭，好似幾認同。佢又話「咁第二個呢？」

「哈哈⋯⋯」我好得戚咁笑：「搞棟篤笑。每人五至十分鐘講關於中文同中國文化嘅棟篤笑。」

「吓？得唔得架！」Miss：「講棟篤笑呀？」

「得架啦！黃子華都係咁架啦！」我：「信我喎Miss, 嗱!最多我而家表演一個比你睇⋯⋯」

如是者，我唔理Miss反對，我即席表演棟篤笑比Miss睇。





「漢字係好博大精深。 如果要講最重要嘅字就係「愛」！世間萬物都係圍繞呢一個「愛」字！。 點解人類會繁殖？因為人會做『愛』囉！」

「喂啊！作死你咩！不過⋯⋯」Miss忍唔住就「噗！」一聲笑咗出嚟：「哈哈⋯⋯嘖！死低B仔！唔得呀！出唔到街架！」

「咁我再度多個囉⋯⋯你知唔知中文字其實有分性別？」

「係咩？」Miss苦笑。

「4男1女！就係——」

「謝子匡！你咪借啲意講粗口呀！！我記你小過呀！」

「但你笑喎！」





「冇⋯⋯冇⋯⋯哈哈⋯⋯冇啊！」

「你仲笑？仲笑？！」

成間課室充滿住Miss笑聲。

其實第二個活動我真係鳩吹水。我其實唔係想幫Miss諗下橋。我只係當左佢係一般女仔咁，見佢唔開心想佢笑返。見佢壓力好大，就幫手分擔下。

我只想好好去愛護佢。

「Miss Wong！ 我都話咗架啦！」

「又點呀？」

「你唔開心時，我總有方法令你開心，令你笑。」

我講完之後慢慢收起笑容，用一個好認真嘅眼神望佢。好想講佢知，我係真心。真心想佢感覺到同我一齊時候係好輕鬆、好開心。

Miss表情呆咗一下，然後微微一笑，輕輕咁鬧一聲——

.

「低B仔！」

= = = = 

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學