真人真事改篇﹕師生戀﹕《最接近的陌生距離》: 第二章之二

唉⋯⋯⋯

呢次真係失威。身為冧咗莊幾年嘅A班班會會長，竟然喺9月1日呢個咁重要嘅日子，輸比個新班主任！我冇諗到呢個世界竟然會有呢種老師會咁樣拎返班房主導權！

有啲老師會夾硬嚟，同我開晒片。

又有啲老師會食腦，同我鬥智鬥力。

更有啲老師會選擇同我合作，大家好嚟好去。





但好似Miss呢種以本傷人地對我進行心理打擊嘅老師就真係第一次見！

咁樣出其不意嘅一擊，令我招架唔住，我可能因為咁永遠喪失喺4A班手足心目中崇高嘅地位！

最後我拉埋阿偉、杰少落水，再加埋上堂瞓覺嘅阿波，我地四兄弟被Miss罰喺小息時喺訓導室「臭格」外面罰企。

Miss真係識揀地方，搵正周Sir地頭去招呼我地四個。聽住周Sir點樣片到個大隻仔尊嚴崩潰嚎啕大哭，都咪話唔心寒。

呢個時候Miss喺教員室忙完，出嚟招呼我地四個。





「企好啲啦！」Miss仍然好鬼惡死，明明佢唔惡嘅時候好吸引人，做咩搞到自己咁神憎鬼厭呢？

「Miss，我都係fake咗你唧。唔洗咁吓話？」我有啲唔忿氣，以前「廢超」都係咁樣比我玩架啦！

Miss翹埋雙手，冷冷咁微笑，話：「其他老師講過，4A班入面有四個學生最難搞。本來我預咗要花啲時間先觀察到。但估唔到你地四個今日就自己企晒出嚟。」

「Miss！」阿偉舉手：「嚴格來講，係阿匡搞到我地被你spot住咗喎。」

「我最多係瞓覺咋！」阿波。





「我頭先幫手篤灰咋喎。」杰少。

Miss繼續冷笑，睇嚟佢好自信咁以為已經掌握到我地四個，佢繼續話：「其他老師提我，有一位叫謝子匡嘅問題學生好鍾意做風頭躉。佢身邊有三位跟班。只要捉到謝子匡就可以將呢個犯罪集團一網打盡。」

Miss企喺我面前，下巴輕輕咁抬高，好睥睨咁望住我。我梗係不甘示弱，盯撚實住佢。估唔到呢個女人望落好甜好靚原來咁有女王既氣勢。

正正係呢個時候，一把洪亮嘅男人聲介入咗我同Miss之間。

「謝子匡！係咪想入訓導室傾？」呢把男人聲一聽就知係周Sir。佢凶完我之後就懶係好紳士咁同Miss講：「Miss Wong，使唔使我幫手？」

「唔使。」Miss對住周Sir個態度唔同晒，輕輕一笑，然後嚴厲咁望返我，繼續講：「我搞得掂佢。我跟返自己班就得。」

然後周Sir臨走前，向我拎多個尾彩：「你試吓玩嘢，我實招呼你。」

我不忿咁望住離開緊嘅周Sir，之後我聽到Miss嚴厲咁話：「望住我！」





Miss見我望返佢時，佢話：「Miss 其實唔鍾意罰學生。你地四個守返規矩的話，我係唔會為難你地。始終你地係我嗰班嘅學生，我會好好睇實你地。」

Miss呢句聽落係好真心、好令人舒服⋯⋯但係！呢個係佢收賣人心嘅技巧嚟唧！

「好多老師對你地四個好有意見，特別係你，謝子匡。」Miss指一指我，繼續話：「喺我未正識入職前，已經有老師提醒我，你係非常難教。」

「哼！」我冷冷一笑，一面唔在乎地話：「係呀，成間學校最差係我嘛。一早知架啦！」

我之所以唔在乎，因為由細到大我都比老師話慣。即使我冇做錯事，都會將問題推落我度！我諗惟一個原因，係我天生個樣生得串同反叛掛。

「就算所有老師都放棄你。你都唔可以放棄自己！」Miss竟然因為我發悔氣而鬧我：「即使比人睇死都好，你都要爭氣呀！」

然後Miss注意力放返喺阿偉佢地身上，嚴肅嘅神色慚慚消退，我慢慢感受到佢面上有一點寬容。佢話：「我知你地比較跩，但我相信你地唔壞。我一定會教好你地四個！」





唔係吓話，咁熱血？咁有信心？哈⋯⋯果然係啱啱畢業嘅新手。我地四兄弟好自然咁互相望下大家，我地四個應該同一時間心諗Miss實在太天真！

而我……我唔會信佢。呢個世界邊有好老師架。

「首先我要教識你地一件事——責任心！謝子匡！」Miss如鷹銳利嘅眼神望住我：「咁鍾意做大哥啊嗱？你以後就係正式嘅班會主席，我要你做乜就做乜。」

「吓？！咩話！」痴線架咩？咁我未即係啲淪陷國家嘅傀儡元首？幫人管理埋個國家？嘩！呢招好毒！

「你『吓』咩呀？」Miss好不滿我個反應，就話：「係咪想做多D呀？咁你做埋班長啦！你幫埋我管理課堂秩序，以後班上面有咩事都入你數。」

咁即係有咩事要我做二五仔篤啲手足出嚟唧！ 正當我想反駁時，阿偉就頂一頂我手肘，叫我咪咁多嘢講。

然後Miss食埋個勢，要阿偉就做各科科長，杰少就負責課室清潔，阿波就係膳食長專幫手派Lunch。

頂你呀，開學日真係慘敗收場！我唔只喪失咗個主導權，仲要被Miss俘虜，搞到我地四兄弟比佢奴役！





班⋯⋯班長？竟然要我呢個瀟灑嘅浪子做班長？！簡直係奇恥大辱呀！

哼⋯⋯唔係你想話點就點嘅！

我唔返學，你奈得我咩何？

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #Miss故