[細思極恐] 不連續人生: 14章 - 屯公夜會

如果讀者喜歡，希望可以點入去俾啲讀數我 (bookmark / like / read都得)，等我有得統計吓，方便日後改進之用

Penana: https://www.penana.com/story/110477/
紙言: https://www.shikoto.com/articles/258948.html

多謝各位嘅支持

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

14章 - 屯公夜會





「下一站，屯門市中心。呢個係本線路嘅終點站，請所有乘客落車，多謝。」

日抖嘅酷熱喺夜風之下逐漸蒸發，嚟到屯門市中心，一落車，我喺炎炎夏日嘅季節打咗個冷震。

「大西北真係好Q遠。」我抱起雙臂。「正常人相約都會喺港島九龍，真係好少嚟屯門呢啲咁山卡啦嘅地方喎。」

唔通周詩靈係屯門人？佢係住屯門嘅？

我︰「如果真係嘅話，都唔係幾想搵佢。講緊一來一回成個幾兩個鐘，戲都睇完一齣食埋個拉麵。呢條囡溝唔過呀。」





加上，佢係痴線嘅，有個咩咩「理解障礙症」嘅病。雖然自己都有個「精神紊亂症」，自己都唔好話人，唔係好得去邊。

一落車，過咗馬路，我向住往屯門公園嘅連接路行。

「喂！睇路呀！」

我︰「嗯？」

聽到一把聲突然大叫，我反應唔切。一抬頭，有架單車停咗喺面前。





單車仔︰「你睇唔到我避緊你架！我扭去邊你就行去邊！」

我︰「呢度行人路嚟架屌你老母！」

單車仔︰「你行晒咩！行路就帶眼啦！」

我真係第一次喺行人路行要俾一個單車仔鬧，有冇道理？

算喇，唔好理佢，約咗人唔好搞咁多嘢。

「不過話說，呢度真係好多單車，此情此境好難喺市區見到。」望住屯門公園北面入口連接路嘅單車停駐場，我感嘆。

慢慢行入去屯門公園，經過鐵路站，呢個時間應該成兩、三個字先一班車，即使路軌係架空，附近依然冇半分人類嘅氣息。呢個時間，可能大部人已經沖好涼，準備上床瞓覺，仲有少少時間，就係新一日嘅到來。山長水遠嚟到，只係為見一個女仔，真係好似一對熱戀嘅少男少女，想念對方到一個地步︰即使千里迢迢入嚟屯門都想多見佢一面，見吓佢青春嘅肉體、浮凸嘅身材，喺白素衣嘅包裏之下比每日幻想嘅甜片女星更誘人。





「白素衣…」諗起呢一點，我嘅淫邪就停咗，充血嘅地方都即刻放晒血。

我鐘意佢？唔好玩啦…

我︰「話時話，陣間點走？」

到咗約定嘅地方——屯門公園北面出入口，望咗兩眼，唔見想搵嘅人。

我︰「佢個死人頭咁易認都搵唔到，佢未到？」

正當我拎部電話出嚟諗住打俾佢，我聽到水聲嘅起盪，清脆漣漪，粼粼碧波悄悄傳嚟耳邊。

有人玩水。

我沿住水聲順藤摸瓜，終於見到嗰笪白色嘢。





「喂小姐，呢度唔俾餵魚架。」去到人工湖邊，我敲響鐵欄，喺了無一人…呀唔係，喺只有我哋兩個嘅公園一角顯得特別清脆。

周詩靈，出咗精神病院只係短短幾日，喺某個意義之下，我「好掛住你」，終於又見面。

「…」周詩靈回頭望咗半眼，我只係見到佢「引以自豪」嘅側面，然後佢就擰番轉頭。「你有冇衝過紅燈？」

仆街…又係呢啲收人皮去合理化自己嘅講嘢方式…

周詩靈︰「你一定有啦，你仲成日打人添。醫院姑娘成日都叫你唔好打人架，你咪又係成日打阿慈。」

我︰「護士就護士啦，姑咩娘！嗰度有一半係男人嚟架！」

女護士叫姑娘，男護士係有J姑娘呀？





周詩靈︰「咁你有冇打人、衝紅燈呀？」

我︰「呢啲點同衝紅燈？」

周詩靈︰「咁唔通餵魚要受死刑？」

我︰「…」

「你拗唔贏我架。」周詩靈將佢手上面最後一小片麵包撕碎，隨風撒落湖面。隨住魚嘅躍動聲，佢將手放喺背後，轉身望向我。「周海問，晚安。」