我個隔離位真係好煩: 終章: 萬中無一的緣分
我本來出身於一個美滿的家庭。父母是專業的廚師。小六那年，他們的事業上了軌道，開了家餐廳。自此，他們便很少回家。
原本已經喜愛說話的我，就這樣，被遺棄在空無一人的家中，對着不會說話的食材和食譜。
至於我因為在家中沒有機會說話，而把所有話留到學校才說。這反而帶來反效果。連我自己都沒有留神，我說話的數量，比起我想像中的多，多得可怕。曾跟我坐在一起的鄰座都對我有很負面的評價，自此我便背負上「嘈喧巴閉」和「好煩」的罪名，沒有人願意和我結交。
我不明白，難道寂寞也是一種罪過？
我渾渾噩噩地度過了兩年中學生涯，直至第三年，我遇上了那個人。
要知道，一間學校有一千幾百人，一個年級有百餘人，一班有三十人。要巧合和他在同一年出生，要巧合進入同一間中學，同一個班別。要在二十九位同班同學中遇到這個新鄰座，當中的概率，我也不懂計算了。
上天讓我遇見了他。
他強大的忍耐力，和他的平易近人，以致他不會像他人一樣，輕易拒絕我眾多的問題。他的認真、聰敏，以致我的學業重燃希望。這個人，從普通的鄰座，慢慢地，變成一個可信賴的朋友。
我們一同經歷了校運會、一同在圖書館溫習，考試後一起逛街，一起看海，他在南豐紗廠拖了我的手。這一切一切，是甚麼呢？
從我遇上他，直至發現自己不知不覺間愛上他，只是經歷了四個月，卻似經歷了四年。
我起初以為自己只是因為孤獨而盲目愛上這個願意接受我的鄰座。
但不是的。
他願意接受我的嘈吵，願意細聽我每一句話，願意在課堂上、生活上照顧我。他的存在，就似是我的天使，照耀我的人生。
既然我遇上了對的人，那麼，那個墮入愛河的「因」，自然就不再重要，不是嗎？
而之後發生的事更印證了我的觀點。這個男孩，還把多年來幾乎不會出現在家中的父母喚回來，把我思念已久的父母喚回我身邊。
在我十五歲生日當天，我有父母，有他。
雖然我們之中出現了大大小小的矛盾，甚至瀕臨分手邊緣。但到最後，回到原點，我們依然緊密地待在一起，不分離。很童話是吧，因為我們從相遇一刻開始，便不斷在譜寫着一篇屬於我和他的童話。
從中三開始，這一位男生默默地陪着我走過青春的每一站。
是你，豐富了我的青春。是你，填滿了我的人生。
~
「老婆，做咩無啦啦喺度睇以前啲相簿嘅？」
「懷緬下過去咁啫，我發現呢，原來我中學時期嘅相，幾乎每一幅都有你份。」
「孖公仔梗係要日日夜夜都痴埋一齊㗎啦，妳話係唔係？」
「仲要係打風都打唔甩嗰隻。」
他從後擁抱着我，真的很溫暖，打從心底的溫暖。
「我都咁覺得。」
「難得你喺度，不如陪我一齊睇相吖？」
「樂意之至。」
於是，我們便依偎着對方，回味屬於我們二人成長的點滴。
「老婆，話說點解會有我F3校運會跑400米嘅相喺度嘅？」
「哦呢幅~ 無呀，當時純粹係因為我地係朋友，所以想影下你咁啫。不過後尾睇番，我發覺你跑起步上嚟個樣真係好型~」
「試下唔好讚我，我驚我怕醜。」
「啊，仲有呢幅，南豐紗廠嘅男友視角，我都好鍾意㗎~ 話哂都係你第一次拖我手仔，真係諗番起都覺得甜。」
「我都好鍾意呢幅。仲記得拍拖十周年嘅時候，我仲專登提議話影多次同一幅相添！」
「你仲好講！嗰日你趁我擰轉面嘅時候靜靜雞攞隻戒指出嚟，搞到我當眾爆喊，不知幾醜怪。」
「咁妳嗰日都好開心吖，係咪先？」
「識咗你之後，日日都咁開心~」
「大家咁話。不過妳嗰時估唔到我想求婚咩？」
「其實我都覺得有啲似，因為你嗰日啲言行舉止都怪怪地咁。不過到你真係求婚嘅時候，我都仍然都係咁感動。」
「係我睇到妳嗰期好似好恨嫁咁，所以先揀嗰日。」
「喂喂，衰鬼，唔好賴哂我噃，我睇你嗰期都好似好想娶我咁。」
「都係，話哂一齊咗十年，我覺得都係時候啦。話哂我一直以嚟都好想妳做我老婆。」
「嗯嗯！果然揀你做老公冇錯~ 咁我地繼續睇吖！呢度好多幅都好正㗎，最衰都係你囉，成日偷影人，我溫緊書又影，我追緊星又影，我煮緊飯都影。」
「因為妳cute，所以成日都想影妳。」
「口花花。」
「呢幅都幾好，嗰陣妳阿爸阿媽仲要老屈我同你地一齊影全家福。」
「咁佢地都好信得過你吖係咪？」
「話哂都係因為我咁大膽，先可以令你地團聚番。」
「所以話我老公最叻最抵錫~」
「我真係會怕醜㗎......」
「好囉。啊呢張呢張，嗰陣我喺班房攬住你，之後先知原來俾人偷拍咗。」
「我就覺得呢幅相嘅畫面夠哂溫馨。」
「直程甜到漏啦~」
「仲有呢堆，好似係中五平安夜嗰陣影。」
「係呀係呀！山頂呢幅夠哂靚，仲有彩虹做背景。跟住呢幅呢......又係你！趁我瞓着咗嘅時候偷偷地selfie~」
「妳連瞓着咗都咁Q~」
「嘻嘻~ 嗰日我地一到夜晚十二點就戴咗對方織嘅頸巾影相。你條頸巾仲要織到咁。」
「咁之後有妳教我織，我都進步番好多啦。」
「當我教識完你之後呢，就可以逼你陪我織阿B啲頸巾冷帽~」
「唓。」
這本相簿的照片真的太多太多，我們也只是看了一部分，而前面的照片都很正常。
直到我翻頁一刻，我看見了不應看到的畫面。
「然後就到呢張......喂！點解呢啲兒童不宜嘅相會喺度㗎，好心你收埋佢啦，如果將來俾阿B睇到，就真係大鑊啦。仲有我着裸體圍裙嗰幾幅，都要收埋！」
「Shit，呢層係我大意，對唔住老婆。不過睇番呢，妳副body真係太吸引，睇到我而家都有少少心郁郁。」
「死鹹濕佬！」然後我使勁拍了他一下。
「都係對住妳先鹹濕啫。」
其實不只是他，連我自己看到這些照片後都開始有點想要的慾望。
「咁我地今晚要唔要......」
「妳肯就太好啦，咁我今晚放阿B喺阿爸阿媽度一晚先啦~~」
「衰嘢，一有得做就咁開心。」
「妳都好期待啦，妳個嘴角出賣咗妳。」
「冇冇冇啲咁嘅事！我地繼續睇相！」
「哦，好呀老婆~」
「喂！」
「好啦唔玩啦，跟住到呢輯Sing Con嘅相，都好值得留念。」
「係深情對望啊，超級sweet~~」
「我地而家朝朝都深情對望啦係咪？」
「嗯！日日都咁sweet~」
「有妳真係幸福。」
「我直頭覺得自己係全個世界最幸福嘅人~」
這是真心的，有他在，就是如此幸福。
「好啦，我地就嚟睇完啦。最後呢堆應該係grad嗰日影。」
「Yes~ 我地兩公婆影咗幾張啦，跟住拉埋霖霖兩公婆影幾張啦，跟住我地七個friend又影幾張啦......仲有仲有，我地同晞晞佢地好似都影咗張~」
「Grad啲相真係好多......見到大家着校服嘅樣真係好懷念。而家幾好吖，阿傑佢地上年結咗婚，阿晞佢地就下個月，阿悠晨咁早就去咗閃婚，跟住我嗰兩個毒男兄弟近排都好似搵到女朋友啦。」
「時間真係過得快......啊仲有呢堆！嗰日唱K劈酒影嘅呢，你飲醉酒個樣好好笑㗎！」
「喂衰婆，又唔諗下我幫妳擋咗八成酒。」
「嘻嘻，有男朋友就係咁用㗎啦~」
「啊妳真係。」
我們就在歡樂的氣氛之中，重新看一遍屬於我們二人的甜蜜過去。
「咦？時間唔早啦，妳快啲去換衫啦，今日我地好多節目。」
「Yes？」
「今日首先要去母校open day探下班主任啦，再之後約咗契媽飲茶啦，晏晝又要帶阿B去母嬰健康院......」
「嗚哇~~~~~」房間裏，忽然傳出嬰兒的哭泣聲。
「死啦老公，我地出咗門口，阿B點算呀？」
「我叫咗阿爸阿媽嚟陪佢玩住先，放心。」
「咁就好啦。乖啦阿B，等媽咪錫番妳~」
阿B真係超級無敵可愛~ 每次望住佢圓咕碌嘅面豬登，都會覺得好窩心、好治癒。
當然啦，我嘅老公仔都一樣咁可愛。
「佢就好啦，有媽咪錫。」
「傻佬，你走嚟呷阿B醋？」他吃醋的樣子，同樣很耐看。
「妳囉，有阿B就冇老公。」
「哈哈哈，傻豬嚟嘅，咁等我錫你一啖啦，顥哥哥~」
我甜絲絲地抱着他，吻他的雙唇，而這一吻，持續了十秒。
「犯規呀妳......到而家都仲咁叫我。」
佢個傻佬竟然面紅！咁睇嚟我要再整蠱下佢啦 :)
「你唔鍾意咩，顥哥哥，顥哥哥~」
「妳個衰妹，同我過嚟！」然後，我們便圍着客廳的桌子繞圈追逐。
眼前的他，總是願意陪我瘋。
「仲捉妳唔到？」過了一會兒，他終於能夠捉住我。他伸出了雙手，把我擁入懷，抱得緊緊。
「俾我攬住係咪好正呢，我嘅芷妹妹~」他在我的耳邊以極其溫柔的聲線說道。
我終於明白，當他聽見那個稱呼時，有甚麼感覺。
是心臟幾乎想跳出來的感覺。
「正衰人。」
每天都能抱着他，還有我們的小寶貝，是我人生最快樂的事之一。
「嗚哇~~~」女兒的哀號又再傳來。
我看着她，初步估計她應該是肚子餓。
「阿B似係想食嘢啦，嚟吖阿B，夠鐘飲奶奶啦~」於是，我拿出了奶瓶。果不其然，她很愉快地在享用瓶內的食物。
「妳連佢肚餓都睇得出，睇嚟妳真係幾有做媽咪嘅潛質。」
「你就唔應該啦，仲話係醫生，竟然連阿B想飲奶都唔知。」
「好囉，係我錯，咁俾我抱下佢補番數啦。」
「好啦，咁你抱下佢吖！」
「唉唷唷，阿B乖乖，等爸B攬下妳啊下~」
看着兩父女溫馨的畫面，我竟然有點感動。
他們，是我最愛的家人。
「你都幾識做人老豆吖，睇下佢，笑得幾開心~」
「佢真係好似妳，一樣咁可愛，望極都唔厭。」
「好啦你，咪鬼賣口乖啦，又話要出門口。」
「妳唔鍾意我賣口乖咩？」
「唔係唔係，其實我好鍾意，你都知㗎~」
「咁妳快啲去換衫啦，我嘅靚女老婆~」
「好呀，我嘅靚仔老公~」
之後，被稱讚得意亂情迷的我便一邊傻笑，一邊準備外出。
隨着他父母的來到，我們起行離開。
出門之前，我回頭看着櫃頂的相框，裏面有一張照片。他身穿筆挺的黑色西裝，而我身穿優雅的白色長裙。他用手溫柔地托着我的下巴，而我微微抬高了頭，我們深情對望着，眼中好像只有對方的俏臉。
「林芷如小姐，妳再唔行呢，我就走先㗎啦。」我一轉過頭，只見他向我伸出了他的手。
「嚟啦！」我會心一笑，便捉緊他的手，隨着他的腳步，離開家門。
~
即使我們的年紀大了一點，即使我們的身分跟以前不一樣，但他永遠都會是那個寵愛着我的顥哥哥，我永遠都會是那個依靠着他的芷妹妹。
我想，我們二人當初都沒有預計過，從當年偶然相遇的一刻起，便是一輩子。
謝謝你走進了我的人生，鄒家顥。