我個隔離位真係好煩: 26: 契媽
「芷妹妹，跟我嚟一個地方吖。」我點了點頭，便挽着他，讓他帶我到目的地。
然後，一家小學映入我的眼簾。
咦？這裏不是我們之前當街親吻的地方嗎？我回憶着，下意識地摸了摸嘴唇。
「唔好諗多，我今次唔係專登想錫妳。」他看着我，好像已經預料到我在想甚麼，「我其實係喺呢度畢業。」
「吓？！」我瞪大雙眼看着他。
「我今次嚟，係有一個承諾要兌現。」只見他拼命掩藏心底的秘密。
他把我放在了門口，叫我等一等，再徑自步入小學門口。不消一分鐘，他便一臉興奮地走出來。
「跟我嚟吖！」他捉緊我的左手，把我帶進去。我們在那裏等了一會。
隨着升降機門打開，一個中年女人步出升降機。她一看見我們，好像比看到自己的兒女還要高興。
「顥仔！好耐冇見喇！」她走過來，不斷捏他的面頰，好像當他是初生嬰兒。我看着這個畫面，不禁偷笑起來。
「喂嗰邊嗰個，唔準笑。」只見阿顥用一個兇狠的眼神瞪向我，我隨即被嚇了一嚇。
「好啦契媽，冷靜啲先。您記唔記得之前同我講過啲咩。」
What？契媽？我看着面前卷曲頭髮，戴眼鏡的中年女士，心中浮現千萬個問號。
「我同你講過......」只見她皺着眉頭，認真想了一想，然後難以置信地看着阿顥，再用一個異樣的眼光望向我，上下打量了一會。
「哦！你終於有女朋友喇！」她得出了這個毫無邏輯可言的結論。
「您仲話要帶番嚟見下您添。」阿顥接着說。
「太好啦，顥仔有着落喇！」中年女士狂喜地摟着他，好像比起自己兒女有拖拍還高興。
「好啦好啦，介紹番先，呢個係我前班主任兼自稱係我契媽嘅Miss Fong。」阿顥指了指她，跟我交代說。
「呢個係我嘅女朋友，叫阿芷。」他再指了指我，向那名叫Miss Fong的老師說。我微笑向她點了點頭，打了個招呼。
「阿芷下話。」只見她迅速變臉，以一個凌厲的眼神看着我，像極一隻「老虎乸」。
老實說，她凌厲的眼神，和阿顥的確有幾分相似。
她這樣一瞪，使我不寒而慄，並離奇地開始出手汗。
「唔洗驚㗎阿芷，我初初見到佢都係咁恐怖。」他嘗試緩和我內心緊張無比的情緒。
「作死吖你。」她轉頭怒視阿顥，只見他也乖乖投降，瑟縮一角。
「對唔住大佬。」他不爭氣地作最後掙扎。我忍不住強烈的笑意，竟然在這個劍拔弩張的時刻大笑起來。
「好啦妹妹仔，relax~ 其實我都唔係有啲咩特別要做，只係想問妳幾個問題。」她再變臉，用一個慈祥的面貌對着我。但這樣才更加恐怖。
「你地點樣識。」「我以前係佢隔離位。」
「拍咗幾耐拖。」「一年多十個月左右啦。」
「妳讀書點。」「普普通通，不過有人幫我私人補習，所以一路進步緊~」說罷，我便甜笑看了男生一眼，使他的臉紅了起來。
「平時鍾意做咩。」「煮嘢食，行街，追星，陪我兩個姊妹，陪男朋友~」我再望向男生，向他射了一箭穿心箭，甜死佢。
「追開咩㗎。」「我係hellosss~」
「阿姨我係一粒薑糖嚟~」只見Miss Fong嘴角含春。
「契媽，原來您都迷呢啲㗎，您唔係十八廿二㗎啦噃。」阿顥並不懂生命的可貴。
「呀死仔，你唔俾我有少女心嘅咩？」她以一個鄙視的眼神望向阿顥。
「得得得，您鍾意。」他以九秒九的速度「縮沙」，果然有不錯的求生欲。
「Ok，back to the topic。阿芷妳有冇諗過將來做咩。」「我想做廚師~」
「嗯？廚師？有趣喎，有冇啲咩原因㗎。」「因為我阿爸阿媽都係大廚嚟。」
「哦~~~明喇。」
「咁妳鍾意顥仔啲咩。」「佢好叻，成績勁，又識玩樂器，又係vice-head prefect，跟住佢個樣靚就唔洗講啦，佢好溫柔體貼，真係當我妹妹咁寵愛，佢又肯陪我癲，又忍到我好多嘢講，完全唔怕我煩。仲有仲有，佢成日都知我諗緊咩㗎！」以本人吹水的功力，甚麼「數男朋友十個優點」的問題，不可能難倒我。
「嗯......聽落佢又好似幾好喎。」「超級好！」我腦海中只得出這三個字。
「咁妳唔會鍾意第二個㗎嘛？」「唔會！」我秒答她的問題，「只係......佢就難講啦。」我偶然想起一些東西，心裏好像被石頭壓着。
「拿顥仔我話你聽，呢個係一個好乖好純真嘅女仔，你記住好好珍惜人地。 如果俾我知道你一腳踏兩船，我第一個捏死你！」她以一個充滿殺氣的腔調對阿顥說，只見他已經沒有任何反應。
他到底在想甚麼？
「阿芷，如果妳第日有啲咩感情問題都可以番嚟搵我。撻我個朵就ok。」Miss Fong終於以一個善良溫柔的眼神看着我。
「好，審完，夠鐘放工！」她站起來，「顥仔，番去同你屋企人講，呢個女仔，我approve喇。」
「Goodbye and thank you Miss Fong.」只見阿顥終於回過神來，裝着正經地鞠了個躬，跟Miss Fong道別。
「得閒多啲番嚟探下我呢個老人家啦ok？帶埋我個新抱仔番嚟都得㗎。」她臨走前丟下了這句。
咩新抱仔啫，搞到我塊面紅哂......
之後，他也站了起來，拖着我的手，離開了小學校園。
「點解你無啦啦有個契媽嘅？」離開之後，我終於能夠問他一連串不解之謎。
「佢以前做我班主任嘅時候，唔知點解好鬼鍾意我，又話我咩好乖，又話我叻仔，後嚟索性順口叫我做契仔。」他說，「雖然佢個樣係好惡死睖瞪，但係佢其實好錫自己啲學生㗎。」
「咁點解要帶我番嚟見佢嘅？」
「妳頭先都聽到㗎啦，佢之前話過，如果我有女朋友，就帶番去俾佢睇。但後來我發現，原來實際上係等同見家長，有一次我聽到佢地傾電話先知。」他繼續解釋，「因為我阿爸阿媽都好信得過Miss Fong啲眼光，所以如果係連Miss Fong都通過嘅女仔，就一定冇問題。」
「妳放心，我帶得妳去，就有哂心理準備。而且我揀得帶妳去，唔會有第二個。」他以一個肯定的眼神看着我，此刻的他，莫名有點男人味。
我沒有以言辭表達我的感情，只是用手把他的頭拉過來，深深吻了他一下。
然後對上一次大街擁吻的情節便再次發生。
「哈......哈......」我們同樣是忘形地接吻，直至我們需要呼吸。換氣過後，他再捉緊我的頭吻下去。在冰冷的十二月二十四日，我們再次站在小學的門前，燒得滾燙，燒得火熱。他的雙唇，他的真心，他的全部，我還想感受清楚。
我和他鬆開了彼此的嘴巴，然後充滿默契地伸出了舌頭，再纏繞了一下，互相吃對方的「口水尾」，然後同時陶醉一笑。我們站在平安夜的大街上，額頭互相緊貼對方，在寒冷的街上呼着暖氣。就這樣，我們定睛望着對方的臉龐，視線不能移開半响。
這個，便是當刻的我們，最有力的答案。