屋企無啦啦多咗個女仔

「叮噹」門鐘響，我心諗點解呢個時間會有人禁鐘仔，唔好理咁多去開門先。

一打開門，有條友拎住個梳化遞紙同埋個畀我講：「送梳化唔該簽收。」我大嗌：「阿媽你係咪買咗梳化？」老母行出嚟簽收：「唔該曬師傅放喺呢度得喇。」

我問老母：「做乜無啦啦買梳化?」老母：「你係咪盲咗，屋企舊嗰張梳化抌鬼咗，梗係換過張新梳化。仲有你執好你間房同埋張碌架床，有人會嚟我哋屋企住一排，你間房俾人哋瞓，到時你瞓廳。唔好話阿媽對你衰，特登買張梳化床畀你。」

我當場O曬嘴，心諗咁大件事點解唔一早講。我一路執房，心入面有十萬個唔願意，但係我都冇得say no，同老母講話唔要做廳長嘅話，佢叫我瞓街算。

夜晚我打機嗰陣時同fd傾呢單嘢。「So sad要做廳長」「有人夜晚冇得喺房打飛機」「會唔會有囡囡住喺你屋企」「如果有靚女嚟你度住嘅話，瞓廳都抵」





第二朝一起身，老母唔比我出街，要我陪佢去接人，擺到明係叫我幫人拎嘢。去到機埸，老母向兩個人揮手，嗌：「在這！在這！」聽到老母講普通話，我就估到應該係老母啲同鄉嚟我哋屋企度住，點解要啲大陸人嚟呀，點溝通相處，唔通同佢哋一齊做小粉紅咩。

兩個人都係女，我同阿媽差唔多年紀一個同我差唔多年紀，照噉睇應該都係兩母女。兩位大人一見面就攬埋一嚿，老母即刻轉channel同姨姨吹住水咁樣行。我同佢個女而家就非常尷尬，你眼望我眼，佢長頭髮矮矮地一五幾左右，有少少肥，正常樣，見佢除咗同我哋打聲招呼之外面都冇講嘢，唔知佢識唔識講廣東話，唔想講普通話，要講返大陸慢慢講飽佢。

呢兩個就係將會同我一齊住嘅人。