執屍執到女殭屍: 廿五．終戰
逐漸迫近Marco同Suki嘅蛟白對自己嘅力量充滿信心，並無急於要攻擊佢哋，而喺諗住用強大嘅力量慢慢令佢哋絶望同放棄抵抗，然後先將佢哋處死。既然對方咁客氣，Marco就卻之不恭，把握先行攻擊嘅機會。佢用盡全身氣力，將長劍向下斬落法。藍色火焰喺空中留低嘅痕跡，好似之前對Jimmy果次咁化成一道劍氣，只係今次嘅劍氣比上次嘅範圍更大，光芒亦更加強烈。
面對撲面而嚟嘅劍氣，蛟白噴出火球攔截。但係全部火球喺接觸到劍氣嘅一刻，都消失得無影無踪。當蛟白發覺唔對路嘅時候，劍氣已經迫近面前，向住三粒結晶嘅位置推進。蛟白試圖移動身體避開劍氣，但係劍氣竟然喺Marco嘅控制之下改變方向，好似追蹤導彈咁追住結晶，迫到蛟白只能夠用龍頭硬碰阻擋。五個龍頭好似紮辮咁交纏埋一齊，每個頭都噴出一個黑色嘅火球，結合埋一齊變成一個大火球。黑色火球同劍氣碰撞，劍氣慢慢斬入黑色火球，被斬開嘅部份不斷向周圍彈出黑色嘅火焰。黑色火球最終俾劍氣完全斬成兩半，跌落Marco佢哋同蛟白之間，地下變一片黑色火海。劍氣斬開黑色火球之後氣勢減弱，但係繼續斬向結晶，緩慢但係確實咁斬開蛟白嘅身體，將兩個龍頭同一隻前腳都斬斷。當劍氣就要斬到水晶嘅時候，剩低嘅三個龍頭一齊咬住咗劍氣。劍氣雖然未消散，但係已經無辦法再向前推進。眼見劍氣最後都無辦法破壞到結晶，蛟白發出巨大嘅吼聲，似乎係嘲笑Marco嘅全力一擊都係徒勞無功。
Marco用盡全力嘅劍氣或者無辦法將蛟白嘅身體一分為二，但係未必破壞唔到結晶。俾蛟白咬住嘅劍氣突然好似被炸開咁，裂開做無數小型嘅劍氣，高速向四方八面彈射出去。當攻擊終於停止，蛟白嘅龍頭到身體都佈滿傷痕，連藍色結晶都碎成兩半。可惜嘅係，白色結晶同深紅結晶避過咗攻擊，依然完好無缺。失去咗一粒結晶嘅力量，蛟白發出瘋狂怒吼，要將Marco碎屍萬段。面對一步一步逼近嘅蛟白，Marco今次真係無晒辦法。剛才嘅劍氣已經用盡長劍嘅所有能量，Suki嘅雙刀亦已經無咗，更大鑊嘅係佢哋想逃走都走唔到。剛才黑色火球彈出嘅火焰，啱啱好形成一個火圈將佢哋包圍住。
當Marco呆企喺度不知所措嘅時候，Suki走到Marco身邊，同佢講一聲：「未完㗎，未可以放棄住。」然後由Marco腰間抽出佢一直掛喺度嘅彎刀。Jimmy呢把強化咗嘅彎刀，威力應該同其他強化咗嘅武器不相伯仲。雖然Marco無辦法通過意識控制上面嘅能量，但係對Suki嚟講可以用嚟代替無咗嘅雙刀。Marco見到發出紅光嘅彎刀，突然諗起一啲嘢，但係望見自己果把黯淡無光嘅長劍，又嘆咗一口氣。但係點都好，為咗自己，為咗Suki，都唔可以放棄住。突然之間，半把長槍由火圈外面飛入嚟，穿過火牆跌咗喺Marco面前。原來係受傷嘅Jennifer一直跟住喺蛟白後面，佢無辦法再作戰，但係知道Marco嘅長劍喺發出劍氣之後會耗盡能量，所以將斷槍交俾佢，希望可以幫到佢戰鬥。長槍同長劍一樣，係吸收咗Marco嘅性興奮訊號而強化過。雖然槍係斷咗，但係槍頭上面嘅能量仲喺度，Marco應該可以控制到呢啲能量，發揮最大嘅效果。
Jennifer嘅呢份禮物嚟得正係時候。Marco執起斷槍，喺Suki耳邊講咗幾句，然後集中精神控制槍上面嘅能量。蛟白已經嚟到佢哋面前，噴出黑色火球。眼見火圈入面嘅Marco同Suki已經無路可走，要俾火球燒熟，Marco用斷槍揮出一道劍氣。威力遠遠比唔上剛才嘅劍氣，但係已經足夠消滅彊屍嘅能量所產生出嚟嘅黑色火焰。Suki嘅速度同劍氣幾乎一樣，同劍氣一齊穿過火墻。黑色火焰接觸到劍氣之後就消失得無影無踪，Marco跟住喺Suki後面，由火牆嘅缺口衝出去，避開咗火球。
劍氣繼續向蛟白嘅身體飛過去，Suki亦都緊跟喺後面。劍氣嘅威力比之前實在差太遠，即使蛟白因為無咗一粒結晶，力量已經弱咗好多，但係劍氣都只係僅僅斬入佢嘅身體，做成好輕嘅傷口。喺一邊嘅Jennifer雖然為Marco同Suki暫時脫險高興，但係更為之後嘅戰鬥擔心。而家所有由Marco強化過嘅武器唔係無咗，就係已經用盡能量，短時間內都回復唔到。即使有Jimmy嘅彎刀喺手，Marco都無辦法可以充分發揮到佢嘅威力。呢場同蛟白嘅戰鬥，結果睇嚟已經相當明顯。
但係Suki仲未放棄。佢攞住Jimmy把彎刀，喺劍氣做成嘅傷口上面，用盡全身嘅氣力斬落去。照計Suki無辦法控制彎刀上面嘅能量，彎刀喺佢手上並唔會有太大嘅威力。但係當彎刀斬入蛟白身體嘅一刻，佢嘅身體就發生巨變。傷口周圍嘅地方開始連環爆開，仲迅速咁漫延到全身。呢個情況正正符合Marco嘅估計。當佢見到Suki攞住Jimmy嘅彎刀，就記起當初佢同Jimmy一齊同殭屍化咗嘅女性3P，係因為佢哋兩個人抑壓活屍指數嘅能力會相輔相成，爆發性咁增強，咁先可以將殭屍化逆轉。如果將擁有自己力量嘅劍氣，同擁有Jimmy力量嘅彎刀，一齊攻擊殭屍，咁兩者消滅殭屍嘅力量，應該都會相輔相成，發揮出爆炸性嘅效果。所以佢同Suki夾好，叫Suki趁住劍氣打中蛟白，即刻用彎刀斬向同一個地方。眼前所見嘅，都算係Marco同已經被消滅咗嘅Jimmy一場合作嘅成果。
當蛟白身體入面嘅爆炸伸延到結晶所在嘅部分，白色結晶同深紅色結晶，連埋已經碎咗嘅藍色結晶，都一齊化為粉末。蛟白嘅身體自內部被挖空，全身都開始崩塌。無辦法相信眼前事實嘅蛟白，諗住對Marco同Suki作出最後一擊。但係佢身體崩壞得太快，仲未發動到攻擊，已經跌咗落地下，化為一大灘黑水。
Marco，Suki同Jennifer仍然小心翼翼咁睇住黑水嘅動靜，直至幾分鐘之後先至確信已經消滅咗蛟白。三個人企係黑水前面，Marco首先開口：「係咪終於都結束喇？」受傷嘅Jennifer扶住Marco一隻手借力，一如平時咁淡定：「同蛟白嘅戰鬥的確係完咗。但係呢個世界仲有好多殭屍，同殭屍嘅戰鬥係未結束㗎。」Suki都跟住搭嘴：「仲有要幫Jennifer，我同其他戰鬥員整返啲強化武器用嚟對付殭屍，有排你做呀，伙記！」Marco諗到強化武器嘅過程，的確係有排「做」，嬉皮笑臉咁同Suki講：「咁你都會幫手一齊強化㗎嘛，係未？」Suki知道Marco諗乜，口窒窒咁答：「幫，幫咪幫囉，驚你咩…」然後「 呀」一聲叫咗出嚟，向Marco投訴：「喂，你講還講，做乜搣人屁股喎？」Marco隻手仲係喺Suki屁股上面遊走，而喺另一邊嘅Jennifer，亦烘埋Marco耳邊同佢講：「我都會幫手㗎。」
睇嚟，Marco之後都仲有排忙，仲會忙得好興奮。