728鏡現場: 3

一次嘅恐怖經歷，實在一次都太多太多。

嗰一晚由紅館慢慢驚魂未定咁離場，去搭隧巴返屋企，返到屋企沖完涼瞓覺，完全唔可以放鬆自主。

成晚都處於驚恐狀態，真係行步路都好驚。

仲要現場有唔少係一家大一齊入場睇，有好多小學生喺度，佢哋嘅心情真係好難平服。

只係想講，現場睇到同睇video（唔建議去睇）真係兩回事。





就算到而家差唔多隔咗一日，腦海裏面重係會不斷閃回。

越想忘記，就越清晰不斷重播。

最令我毛骨悚然嘅，反而係嗰下撕裂嘅聲響。

（我唔係想引起恐慌，我只係想寫出嚟抒發一下）

到而家都仲環迴立體咁響緊。





嗰一晚好唔容易咁瞓着咗。

第二日六點半醒返，好彩好彩冇發到夢（或者係唔記得咗）。

瞓覺真係萬能藥，瞓醒之後心情突然平穩咗好多，唔再膽戰心驚。

雖然遇咗會有好多朋友問我嘢，一開始仲覺得都係唔好提好啲，唔想又勾起返。

但係結果係提起都冇咩事，唔會再覺得好驚好驚。







一場意外，追究邊個嘅責任唔係最緊要嘅嘢。

最緊要嘅係要集氣支持傷者，不論心靈或身體都係。

次要嘅係下次點樣避免再發生。我哋成日話：「錯一次唔緊要，學返精佢就得」「要在錯誤中學習」等等。

雖然今次嘅意外真係一次都唔錯得，但係點都好，避免、糾正錯處係至關重要嘅嘢。

而唔係只係一味識得追究係邊個邊個有問題。