【校園】想成為您的治癒: 150. 以後再見

殷書賢感覺到突然傳嚟嘅拉扯感，即刻就擰轉頭望，見到邱茗然又一次行番嚟佢嘅身後

「我有嘢比你⋯」邱茗然輕輕咁拉住殷書賢嘅衫袖細聲咁同佢講道，然後拉住佢行到一旁嘅走廊，有嘢遮擋一下嘅位置：「呢個比你㗎！畢業禮物⋯」

「呢個咪聖誕嗰陣去玩嗰個coin？」殷書賢接過邱茗然手上嘅遊戲代幣

「嗯！」邱茗然點點頭，「唔⋯送比你，當係慶祝你第一次去呢啲地方玩！」

「多謝，但我冇禮物回禮比你⋯」殷書賢笑一笑講道，佢稍微思考咗一陣，笑容慢慢咁收起，「不過⋯」





邱茗然聽到殷書賢嘅「不過」嘅時候，心都緊縮咗一下，佢係期待殷書賢有啲咩要同佢講，佢想知道呢個「不過」之後會係啲咩

「嗯？」邱茗然努力地壓抑住內心嘅緊張，微微側着頭望住殷書賢

殷書賢有啲猶疑，明明可以宜家呢個時候開口，以後可能都唔會有機會見到面

就算放榜嗰日番嚟，都好難會有一個時間可以比佢同佢講，但係佢偏偏猶疑緊開唔開口好

「冇⋯」最後殷書賢選擇咗收起唔講





邱茗然嘅笑容慢慢收起，默默咁撅一下嘴，佢本來仲有啲期待殷書賢有咩要同佢講，原來咩都冇⋯

「殷書賢！」張思群喺呢個時候叫咗殷書賢一聲

「嘖！」識趣嘅謝澤謙即刻撞咗張思群一下，「叫佢做咩呀？唔好破壞氣氛啦！」

「佢地叫我⋯」殷書賢當然聽到張思群叫佢，佢回頭望咗一眼同時順口咁講道

「等等⋯！」邱茗然見殷書賢要番去，即刻又將佢叫住





「咩呀？」殷書賢頓時回頭望向邱茗然問道

「快啲講啲咩啦邱茗然⋯！」邱茗然喺心裏焦急咁對自己講道

但當真係企到喺殷書賢嘅面前，佢本來想喺畢業呢一日同佢講嘅嘢都喺佢叫住殷書賢之後講唔出口

「茗然你今日真係唔同佢講呀？你就真係唔怕唔講就冇機會啦？」張萱淇喺番嚟嘅路上問佢嘅嘢喺腦海中浮現出嚟

「睇情況啦～我都唔知有冇勇氣去做～」邱茗然聳聳肩

邱茗然欲言又止，明明想講啲咩，但又開唔到口；佢本來係冇打算要將所有事都講清楚，但比張萱淇講兩句就有啲猶疑

「做咩？」殷書賢見邱茗然叫住自己但又冇再講啲咩

「唔⋯個代幣⋯」邱茗然用一秒鐘嘅時候猶疑，佢本來想講嘅嘢變成用一個遊戲幣嚟代替，「要好好keep住呀⋯」





「嗯，我會⋯」殷書賢笑一笑，對於邱茗然猶疑之後再開口講嘅嘢，佢有少少失望，「你唔介意嘅，我可以將呢樣嘢比你。」

殷書賢掀起畢業袍，手伸入褲袋拎出一直跟喺佢身邊、陪伴佢走過最崩潰嘅時候嘅「好拍檔」

「鎅刀⋯？」邱茗然伸手去拎殷書賢手上嘅鎅刀，「呢個唔係你唔可以失去嘅⋯重要夥伴咩⋯？」

「我收咗你個遊戲coin，冇嘢同你交換唔係幾好意思。」殷書賢諗咗個聽起嚟最合適嘅解釋講道，「你唔要嘅話可以比番我。」

殷書賢伸手想去將鎅刀拎番嚟，但喺佢伸手嘅時候，邱茗然即刻拎住鎅刀側身避開殷書賢嘅舉動

「既然係你最重要嘅朋友，我就⋯好好咁接受啦～」邱茗然臉上掛上開朗嘅微笑，「雖然係鎅刀，不過我都唔介意嘅～」

邱茗然望住拎喺手上嘅白色鎅刀，佢樂意接受好大程度上係因為佢知道呢把鎅刀對殷書賢嚟講嘅意義





「畢竟佢對你嚟講，好重要嘛⋯」邱茗然講道

「所以好好keep住。」殷書賢將邱茗然啱啱同佢講嘅嘢原句還番比佢，「冇血，乾淨㗎，我只係慣咗將佢帶喺身。」

「知啦！我會⋯」邱茗然抬眼望向殷書賢，眼神中夾雜咗一絲嘅不捨

「你會考到你想去嘅大學。」殷書賢講道

「有學霸大人嘅加持，我一定會考到～」邱茗然露出同平時一樣嘅笑容

「既然係咁，咁⋯希望喺9月開學嘅時候會見到你。」殷書賢笑道，然後半開玩笑咁又講道：「介意嘅話，可以順手還番比我。」

邱茗然聽到殷書賢嘅說話後一怔，殷書賢回頭望咗一眼，確定一下佢嘅朋友嘅位置，然後提手，手溫柔咁放喺邱茗然嘅頭上

邱茗然嘅心噗噗跳，雙眼因為殷書賢突如其來嘅舉動而瞪大，喺佢嘅印象中，殷書賢從來都唔似係會做呢種事嘅人





「轉頭畢業禮見。」殷書賢講嘅時候，視線都冇同邱茗然對上，而係將臉撇開

殷書賢唔等邱茗然嘅回答就縮手，轉身行番去搵謝澤謙佢地，邱茗然望到佢嘅耳根同臉頰都泛紅起嚟

喺殷書賢行開咗之後，邱茗然雙手掩住臉無力蹲低；張萱淇見到只有殷書賢一個人番嚟，而且反應都有啲異常，佢就直接去搵邱茗然

「茗然你做咩呀？」張萱淇一行到，就見到蹲喺地上嘅邱茗然，「你同佢講咗啦？成功咗啦？」

「佢點知我最後揀咗同佢一樣嘅大學⋯？」邱茗然都唔知係自言自語定同緊張萱淇講嘢

「吓？呢個唔重要，重要嘅係講咗未呀所以？」張萱淇一頭霧水咁回頭望一眼行遠咗嘅殷書賢，「講咗啦？」

「唔係⋯」邱茗然望住張萱淇，緩緩搖頭，「我冇同佢講⋯」





「吓？」張萱淇一臉震驚，「點解呀？咁佢啱啱嗰個反應係咩意思呀⋯？你又係咩事呀⋯？」

「講完啦？」謝澤謙抱住一半關心一半想食花生嘅心態問道，「你嘅畢業祝福～」

「嗯，講咗一半。」殷書賢微微一笑講道

「吓⋯？有得淨係講一半㗎咩？」謝澤謙一頭霧水，「你祝佢畢業但唔祝佢快樂咁樣？」

「唔係啦⋯」殷書賢無奈一笑，輕嘆一口氣，「冇辦法啦～要以後見到佢再講。」

雖然冇100%嘅把握，但殷書賢嘅直覺覺得，佢地都係會再見，到嗰一日再見嘅時候，佢再同佢講就係

「唔⋯以後再見嘅時候再講啦～」邱茗然笑一笑，然後拍一拍佢嘅裙袋

「吓⋯？」張萱淇一頭霧水，「你兩個搞咩呀⋯」

「我之後同佢講咗嘅話會話你聽㗎啦～」邱茗然邁步行，經過張萱淇身旁嘅時候拉起張萱淇嘅手，「淇淇，今日天氣真係好好～所有嘢都100分！」

「99分咋⋯」張萱淇無奈咁跟上邱茗然嘅步伐

「嘻嘻～淇淇呀淇淇～我信佢講，我地會再見。」邱茗然望向張萱淇笑道

今日嘅邱茗然嘅笑容睇起嚟，就好似糖一樣咁甜







〈完〉

⋯

咁又完結咗一個故，多謝大家一直嘅支持！！！

殷書賢同邱茗然嘅故事就喺呢度先停落嚟啦～

多謝您一直嘅支持

想知嚟緊出咩新故，嚟緊會唔會有番外篇！？

記得Follow我IG呀～




IG Link: https://www.instagram.com/nd_cotttoncandy/?hl=zh-tw