【校園】想成為您的治癒: 134. 敞開心扉

「又偷笑？笑咩呀？溫書太開心啦？」邱茗然瞄到殷書賢臉上掛住嘅淡淡笑容

「冇笑咩，只係諗緊嘢。」殷書賢當然唔會同邱茗然講佢諗緊啲咩，一講就可能會令邱茗然有所懷疑

「奇奇怪怪⋯」邱茗然無奈一笑，「肯定又諗緊番去做邊科嘅練習題好啦⋯」

「係諗呢個嘅話應該會好大壓力先係。」殷書賢望向遠處，見到巴士駛緊過嚟

「唔知係唔係我錯覺⋯」邱茗然轉頭望一眼遠處，目光又不自覺咁番到殷書賢身上，「好似喺聖誕假之後，佢有啲唔同⋯我地好似熟咗⋯」





巴士駛到嚟停低打開車門，但佢冇揀第一個上車，反而讓邱茗然上車先

「唔好再拉住我個書包，上車啦小朋友。」殷書賢講出後半句嘅時候好順口，睇起嚟亦冇尷尬

「邊個小朋友？」邱茗然先行上車，拍完卡回頭對殷書賢補充一樣講道：「中朋友。」

「你真係好無聊⋯」殷書賢無奈講道

⋯





邱茗然坐喺書枱前，啱啱放低筆拎起手機想望一陣嘅同時，媽媽就拎住洗乾淨嘅衫行入房，一推房門，下意識就望下邱茗然做緊咩

「就嚟考試，溫書未呀？」媽媽一開口就自然會提起學生必做嘅事

「溫啦。」邱茗然微微點頭，心入面唔係幾想又開始呢個話題，佢默默咁放低手機

自從上次邱茗然發脾氣話媽媽成日拎佢同哥哥比較之後，媽媽就冇咩再提過佢成績好唔好，同哥哥差幾多幾多

「可能媽媽都懶得再講，不過⋯我都好難再發第二次脾氣⋯」邱茗然喺心裏嘆氣





「今次考試比心機，分數就代表你努力咗幾多。」媽媽語重心長咗對邱茗然咁講道，「你宜家考得好，DSE都要keep住，唔好自滿知唔知？」

「嗯，知。」邱茗然乖巧咁點頭，但都唔係佢想聽到嘅嘢，呢啲對佢地嚟講都係口頭禪一樣

「你知就得啦。」媽媽拍一拍邱茗然嘅膊頭，因為佢唔知要點樣開口講啲好鼓勵嘅說話令邱茗然感受到同時，又唔會覺得好大壓力

媽媽轉身行出房，邱茗然先擰轉頭望，喺媽媽入嚟嘅時候，邱茗然嘅心入面有啲緊張，因為佢覺得媽媽又會講啲佢唔中意聽嘅說話

「呼⋯好彩⋯」眼見媽媽冇特別再講啲咩，邱茗然鬆咗一口氣

邱茗然將心思都放喺溫書上，距離考試嘅日子一日一日咁變少，佢可以溫書嘅時間亦會隨之縮短

做下練習又背下書，又或者拎番之前嘅統測卷出嚟再做一次，因為老師都將答案擺咗上校網比佢地用

「希望考試順利⋯！」邱茗然喺再開始溫書嘅時候雙手合十，誠心講道，「好，溫書！」





⋯

「噠噠噠噠噠！噠噠⋯噠⋯」殷書賢好快咁喺cal機上㩒然後計出答案，果然數學類嘅科都係佢嘅最拿手科

計完一題又到下一題，由放學番到屋企，沖完個涼開始，佢就一直坐喺枱前計數

「哎呀⋯做咩又係小數㗎⋯」殷書賢望住cal機顯示比佢睇嘅答案，同答案差得好遠，「但formula一定係啱⋯」

殷書賢嘆一口氣後都係默默咁擦晒啱啱寫嘅嘢，然後又重新逐步小心咁計一次

「嘖⋯都係錯⋯」殷書賢計完之後又掀去後面睇答案，但答案就真係得一個數字嗰種，完全冇步驟，「中間錯？應該係啦⋯」

連續計咗四個幾鐘數，對住未知數同大量複雜嘅題目，佢嘅大腦已經高速運算到就嚟出煙超出負荷





「唔得啦⋯五分鐘⋯就休息五分鐘⋯」殷書賢將眼鏡除落嚟，雙手掩住眼阻擋光線，合埋眼閉目養神

溫咗成晚數學，感覺大腦都有啲chur到最盡⋯

「算啦⋯溫書⋯」殷書賢低聲講道，「陣間休息一陣又話成績會跌⋯」

殷書賢坐好起身，未夠五分鐘但佢已經又拎起筆打算繼續，就算已經好攰，但殷書賢都會以「成績會跌」作為理由說服自己繼續溫書

「啪噠！」殷書賢嘅手提起嘅時後唔小心撞到擺喺枱邊嘅cal機，cal機跌落地嘅聲好響，響到足以令殷書賢醒一醒

「嚇死人⋯」殷書賢嘅心都離一離，佢彎低腰去執跌喺書包前面嘅cal機

殷書賢嘅指尖掂到cal機，然後捉實cal機就拎上嚟免得又跌一次

「咔啦—」cal機喺拎上嚟嘅時撞到掛喺書包前隔嘅吊飾，係邱茗然掛上去嘅吊飾





殷書賢起身嘅動作即刻停一停，然後放慢動作咁起身，將cal機擺番喺枱面；殷書賢拎起筆嘅時候，下意識望咗掛喺書包上嘅吊飾一眼，托住下巴時雙眼卻一直停留喺吊飾上

「佢到底幾時買咗呢個⋯？」殷書賢望住珍寶珠嘅吊飾時喺心裏問道，「應該係⋯行喺我後面嘅時候扣落嚟⋯」

唔知點解去到呢度，殷書賢卻諗起邱茗然嘅笑容，佢嘅笑容好似真係好有感染力，有時經過佢嘅課室又或者見到佢嘅時候，都會見到佢同其他朋友笑得好開心，雖然唔知佢地講嘢嘅內容，但感覺邱茗然身邊嘅人都好中意佢

「佢都真係幾易相處⋯」殷書賢望住書包上嘅吊飾喺心裏講道，「至少相處起嚟嘅時候，會覺得佢好值得信任⋯」

殷書賢喺邱茗然嘅面前，其實都算講咗好多自己嘅想法，呢啲想法什至係佢好少同人講嘅想法，但唔知點解有時邱茗然只係好似冇心咁講一句關心嘅說話之後，殷書賢就好容易破防講出自己嘅煩惱

「諗咩喺度⋯」殷書賢回過神，將托住頭嘅手縮開同時坐番好，拎起筆繼續溫書做練習，「溫書，唔諗咁多。」

⋯





喺朝早嘅巴士上，邱茗然喺上車前稍微望一眼巴士嘅輪椅位置，見到殷書賢同平時一樣企喺同一個位置，手上拎住本書

「早晨！」邱茗然穿過人群，從一條人與人之間好窄嘅路行到殷書賢嘅面前

「早晨。」殷書賢點一點頭，佢嘅書包就孭喺前面，邱茗然只要一垂眸就可以見到掛喺佢書包上嘅吊飾

「唉⋯琴晚我溫書溫到差唔多兩點，今日差啲都起唔到身⋯」邱茗然扁起嘴對殷書賢稍微抱怨一下，殷書賢伸手將戴喺右耳嘅耳機除咗落嚟，「今朝早差啲拎漏咗八達通出門口⋯好彩我跑得快，如果唔係就miss咗呢班車⋯」

「食唔食？」殷書賢向邱茗然遞出薄荷糖，「Miss咗呢班車咪搭下一班，又唔會遲到。」




IG Link: https://www.instagram.com/nd_cotttoncandy/?hl=zh-tw