【校園】想成為您的治癒: 127. 心思思

「霏霏，比你㗎～聖誕卡。」邱茗然喺去上地理堂嘅時候順便將卡比埋許洛霏

「多謝～我都有卡比你～」許洛霏同邱茗然交換咗聖誕卡

「我做咩咁緊張咁⋯？心跳咁快咩事⋯？」行得愈近E班嘅課室，邱茗然就莫名感到緊張

行到去E班門口嘅時候，喺踏入課室嘅前一刻，邱茗然嘅視線好快咁直望去殷書賢嘅座位

「佢居然唔喺度？唔係坐喺位溫緊書？」邱茗然有啲愕然，殷書賢居然唔喺課室，而且枱面上面咩都冇，「唔通冇番？佢唔會自制假期呀⋯」





邱茗然緊張又擔心，雖然話唔信殷書賢會唔番學，但殷書賢嘅座位空空如也，而且連櫈都拍埋咗

「應該、唔會、掛⋯？」雖然知冇可能，但邱茗然都係有少少猶疑，「唔⋯咁張卡點比佢好⋯？」

「你企喺路中心做咩？」一把聲音喺邱茗然身後由上而下傳嚟

「嚇死我⋯！」邱茗然猛然回頭，手放喺心口安撫一下自己受驚嘅心，「比你嚇死⋯突然喺人地後面⋯」

「你企喺走廊中心擋住。」殷書賢行喺邱茗然嘅身後行番埋位





「好彩啫～仲以為佢真係冇番添～」邱茗然喺心裏鬆一口氣暗喜

邱茗然打開schedule book，入面夾咗佢打算比殷書賢嘅聖誕卡

「課室太多人⋯唔好意思比佢添⋯」邱茗然嘅手摸着磨砂質感嘅信封喺心裏道，「其他人見到實會覺得奇怪⋯」

⋯

「殷書賢，比你㗎，你幫我比埋佢地啦，佢地唔喺度⋯」一個女仔行過嚟，手上拎住三張聖誕卡遞比殷書賢





「哦好呀。」殷書賢接過卡後直接擺入櫃桶，佢嘅櫃桶入面已經有好多聖誕卡

殷書賢向右邊微微側頭望一眼櫃桶，佢嘅筆袋隔離只有張對摺咗嘅memo，一打開入面寫住：「仲以為你今日唔番⋯你今日去唔去圖書館？」

「今日呀⋯」殷書賢將memo對摺番放入筆袋，「仲以為佢會擺聖誕卡喺櫃桶⋯」

喺淨係見到memo紙喺筆袋隔離嘅一刻，殷書賢嘅內心稍微咁失望咗一下

「算啦，由佢。」殷書賢微微聳肩

趁住小息嘅時間，邱茗然同張萱淇落去小食部買嘢食，張萱淇一直同邱茗然講嘢，但邱茗然卻一個放空嘅樣

「喂！」張萱淇嘅手喺邱茗然嘅眼前一下子打橫撥過去

「呀？」邱茗然頓時眨一下眼回神，定睛望住張萱淇後咬一啖手上拎住嘅餃子，「冇咩⋯」





「諗緊咩呀？」張萱淇眼見邱茗然心事重重咁就關心問道

「淇淇，你話如果我啱啱當住佢嗰班嘅人嘅面比將聖誕卡佢，會唔會好似好奇怪？」邱茗然嘅提問令張萱淇有啲摸不著頭腦嘅感覺，「其他人會唔會懷疑？」

「唔會呀，點解會奇怪？」張萱淇滿臉問號，「比張卡好正常咋嘛，今日大把人都送聖誕卡啦～有咩好懷疑啫？」

「唔⋯本來我打算擺佢櫃桶比佢，但諗諗下又覺得⋯」邱茗然雙手拎住嘢飲，扁起嘴，猶疑緊要點講先好，「好似親手比佢好啲，不過！又怕睇起嚟好奇怪⋯」

「係你有異心，所以先會擔心呢啲平時睇起嚟平常都爆嘅嘢啫～」張萱淇帶住意味深長嘅笑容講道，「冇異心嘅話，一齊行都唔會諗啲咩；有異心嘅話，對望一眼都覺得好奇怪。」

「係係係⋯」邱茗然沒好氣咁望住張萱淇點頭，但聽起嚟，張萱淇都講得幾有道理

明明大節日，送張聖誕卡就係好普通嘅事，人人都係咁做，個個都係當面咁樣比，邱茗然都係咁樣，男女一樣





但偏偏當張卡係要比殷書賢嘅時候，邱茗然就思前想後、諗嚟諗去、擔心嚟擔心去，就係冇送到張卡出去

「哎！」邱茗然大聲咁嘆一聲氣，張萱淇望住邱茗然呢個苦惱樣就覺得想笑

「哎～食花生好開心呀茗然～」張萱淇仲企喺一邊，邊笑邊講風涼話，「好耐都冇見你咁苦惱，你食太多花生啦～係時候貢獻下啦～」

「貢獻少少⋯咁多啦！」邱茗然嘅嘴角自動上揚，然後拉住張萱淇就同佢講琴日發生嘅事

喺小息之後係邱茗然同張萱淇嘅西史堂、殷書賢嘅Chem堂

「你快啲趁冇咩人睇到比佢啦⋯！」張萱淇拉住邱茗然喺locker前面細聲講

此時張萱淇眼尾留意到窗外嘅走廊，見到殷書賢同謝澤謙佢地行緊過嚟準備上堂

「快啲啦快啲啦！」張萱淇仲緊張過邱茗然，佢推咗邱茗然一下，示意邱茗然快啲番埋位





「唔得呀⋯！佢啲friend喺度⋯！」邱茗然即刻攬住西史書行番轉頭拉住張萱淇嘅手

「你比聖誕卡咋嘛！情書咩你估⋯！」張萱淇忍唔住直接就反個大白眼，「你睇下，夠鐘啦⋯！又失去一次機會啦⋯！」

殷書賢同謝澤謙一樣坐喺位打開Chem書，殷書賢看似放空，實際上個腦又係重溫緊Chem嘅嘢

殷書賢聽到兩個女仔嘅笑聲，抬眼望就見到邱茗然同張萱淇喺佢面前行過，雖然唔知講緊咩，但兩個女仔笑得好開心就係

「都話算⋯」殷書賢喺心裏默默咁講咗一句，然後緩緩咁搖一搖頭，「溫書。」

⋯

聖誕假前嘅最後一個上學日，喺放學嘅鐘聲一響起之後，大家嘅情緒好似都特別高漲，有啲人已經講緊轉頭去邊度玩





「放假啦～好開心呀～」張萱淇比咗邱茗然一個大大嘅擁抱，「雖然番嚟就要考試⋯」

「哎⋯今日唔好提呢啲傷心事好唔好？」邱茗然搖搖頭，「今日提啲開心啲嘅事嘛～」

「你今日要留學校定番屋企？」張萱淇問道，佢問完都覺得係廢話，但都順口問一下就係

「番屋企啦梗係⋯」邱茗然無奈咁講道

「咁你咪見唔到佢，比唔到聖誕卡佢⋯」張萱淇講道

「佢話咗佢番屋企。」邱茗然一臉自豪咁聳肩，因為佢收到殷書賢嘅memo回覆

「哦～好啦～」張萱淇笑道，佢偷瞄向走廊嘅方向見到殷書賢喺佢地課室門外經過，連忙拉起邱茗然嘅手，「行啦⋯！」

「本來都係等緊佢走⋯」邱茗然喺心裏講道，「係因為要比聖誕卡呀⋯！」

邱茗然行喺殷書賢嘅後面，喺行到去巴士站得番殷書賢一個人嘅時候，邱茗然先行上前拍佢嘅膊頭

兩個人對望咗一眼，但都冇講嘢，連基本嘅開場白「嗨」都直接省略，用眼神表達就算

「我有嘢要比你！」邱茗然即刻講出佢嘅重點，然後打開書包拉，拎出夾咗喺佢schedule book入面好耐嘅聖誕卡遞比殷書賢

邱茗然抬頭望一望殷書賢，佢唔知殷書賢猶疑緊啲咩，做咩唔伸手接佢嘅卡

「多謝，我仲以為你會擺櫃桶之類，要比我嘅話⋯」殷書賢伸手接過邱茗然手上嘅聖誕卡，感覺喺指尖掂到聖誕卡嘅信封時，殷書賢有種指尖都喺度發熱嘅感覺




IG Link: https://www.instagram.com/nd_cotttoncandy/?hl=zh-tw