【校園】想成為您的治癒: 113. 「我會在的」

「好攰呀⋯」邱茗然一上到嚟天台，即刻用力呼吸將啖新鮮空氣，「溫書溫到就嚟靈魂出竅⋯」

邱茗然行前兩步，見到殷書賢耷低頭蹲喺矮牆前

「佢喺度做緊咩⋯？」邱茗然一頭霧水咁走近殷書賢，輕拍佢嘅膊頭一下，「你做咩呀？」

「嗯？冇⋯」殷書賢搖搖頭，然後雙手㩒住膝頭借力起身，行到長櫈頹廢咁坐低，「冇嘢⋯」

「真係冇？」邱茗然望住殷書賢嘅表情就有啲半信半疑，「真係冇嘢？」





殷書賢沉默不語，頭靠喺櫈背邊上仰頭望住天空，望住一片一片嘅雲飄過，邱茗然企喺佢嘅面前安靜咁望住佢

「我仲以為你今日會嚟圖書館添～」邱茗然將書包除落嚟放低喺長櫈上

「嗯⋯想休息一下⋯」殷書賢講出完全唔似平時嘅佢會講嘅說話

「咔、咔、咔、咔、咔—」

殷書賢將刀片逐格推出嚟，邱茗然輕皺起眉頭望住鎅刀





正當佢以為殷書賢又要鎅手，想開口制止佢嘅時候，殷書賢刀片一格一格咁推番埋

「你今日唔著冷衫呀⋯？傷痕都露咗出嚟⋯」邱茗然試探般緩緩開口，臉上掛上明顯係有啲勉強嘅笑容

「唔啦⋯」殷書賢冇拉好衫袖，反而將袖口鈕解開，將衫袖摺起，「好似都冇咩必要啦⋯」

邱茗然望住殷書賢將左邊嘅衫袖一下一下咁摺起，每摺一下，露出嚟嘅傷痕就多咗好多，多到邱茗然都忍唔住皺起眉頭

「係唔係發生咗咩事⋯？」邱茗然察覺到有事發生咗，佢嘅眼神即刻夾雜咗有少少擔心嘅感覺





「Miss Hui⋯真係發現咗我鎅手嘅事⋯」殷書賢面無表情咁講道，佢想逃避問題但唔可以

「咁、咁點算呀？我今朝亂講都中⋯？」邱茗然好似比殷書賢更緊張一樣，聽到後即刻難以置信咁瞪大眼行到殷書賢嘅旁邊坐低，「Miss Hui有冇要你見社工？」

「冇講⋯不過佢話要同我媽講⋯」殷書賢一臉沉重，呼嘅一口氣都特登重，「比我媽知嘅話，我媽實嬲死，仲會好失望⋯」

「比人發現咗嘅話，咪即係佢以後連減壓嘅機會都冇⋯？」邱茗然輕皺起眉頭，心入面有啲擔心咁講道

「我媽實話，邊有醫生隻手鎅到咁？你以後點做醫生？」殷書賢提起手，佢望住自己手上嘅傷痕不禁冷笑，「哈⋯我都唔知我幾時有話過要做醫生⋯明明就係單純強迫我嘅願望係讀醫⋯」

「你唔係想讀醫學院咩？」邱茗然不解咁問，「你話你Jupas都係揀咗醫⋯」

「係我媽想我讀醫學院⋯」殷書賢今日出奇地會講自己嘅嘢，邱茗然都有啲意外，「係佢地嘅期望、佢地嘅要求⋯講到最後，我都係按住佢地嘅要求揀咗醫⋯」

邱茗然安靜咁聽住殷書賢講嘅說話，殷書賢嘅苦笑佢都睇喺眼裏，佢好想講啲咩安慰佢，但去到嘴邊嘅時候又唔知應該講啲咩先啱⋯





「我真係唔知有邊日，會因為頂唔住而死⋯」殷書賢輕輕一笑，講出令人無比沉重嘅說話

「你以後好大壓力，好想減壓好辛苦嘅話⋯！」邱茗然嘅眉頭一皺，即刻開口打斷佢呢種想法，「你可以搵我講㗎！我一定聽！我唔會因為你放個負就即刻轉身走！」

「嗯⋯」殷書賢冇講其他嘢，只係露出好淡好淡嘅笑容

佢從來都唔會同人講自己嘅心事，因為覺得同人講咗都冇用，但佢啱啱講咗少少之後，心入面又好似冇咁辛苦

邱茗然安靜咁坐喺殷書賢嘅旁邊，佢啱啱講嘅嘢全部都係發自內心，但佢知道喺佢呢番說話嘅背後，其實似乎有另一層意思

⋯

「冇嘅～朋友都未必係一世，你咪當失去一個朋友囉～」耳機裏頭傳嚟李雨揚悠閒嘅聲線，「人生有得必有失㗎啦～」





「我搵你訴苦，你講咩大道理啫⋯」張萱淇已經夠苦惱，但李雨揚嘅意見一啲用都冇，「我就係唔想冇咗呢個朋友先問你點算呀嘛！」

「咁你講到呢個人咁重要，咁你唔去道歉？」李雨揚嘆一口氣同時反個白眼問一個基本問題，「你唔係話都覺得自己有錯咩？」

「但⋯好難開口道歉啫⋯」張萱淇緊緊抱住床上嘅攬枕

「咁咪冇一個朋友囉，上到大學再識囉！」李雨揚聽張萱淇呻咗成大半個鐘都未有結論，佢都有啲攰，「邊有得兩全其美？」

「唔知點開口同佢講嘛⋯」張萱淇都係有啲糾結，「我地都幾日冇講嘢⋯」

「朋友嗌交好正常，如果咁小事就絕交，呢個朋友要唔要都擺啦！」李雨揚又嘆一口氣，「但要好番就一定要有個人開口㗎啦～你都知自己有錯啦⋯咁say個sorry都唔係好冇面啫。」

「唉⋯」張萱淇聽到李雨揚嘆氣，佢都忍唔住嘆氣，「如果道歉可以好似食生菜咁簡單就好啦⋯」

「對唔住」三個字，點解咁難講出口⋯？明明對住唔熟嘅人，可以好輕易咁講出嚟，但點解對熟悉嘅人就咁難開口⋯？





唔熟嘅人，大概都只有一面之緣，講一句定唔講都冇損失；但喺熟悉嘅人嘅面前，自然會要面子，自然會思考、等待對方做先開口嘅一個

「我知係我錯⋯」張萱淇將頭埋到枕頭裏講道，「但⋯點開口⋯」




IG Link: https://www.instagram.com/nd_cotttoncandy/?hl=zh-tw