【校園】想成為您的治癒: 102. 不復合嗎？

「好眼瞓⋯」邱茗然喺心裏道，佢選擇投降，將筆先擺喺一邊然後直接伏喺枱上

殷書賢望咗一眼，見邱茗然伏喺度瞓亦冇叫佢嘅打算，畢竟唔會影響到佢溫書

高掛嘅太陽直接照入嚟，照正邱茗然嘅位置

邱茗然郁咗一郁，下意識迴避光線，枕住嘅雙臂自動地收窄範圍想遮擋陽光

殷書賢聽到磨擦發出嘅沙沙聲，自然反應咁望向邱茗然，殷書賢抬頭沿住光線嘅來源望去，然後又望一望就嚟縮成一團嘅邱茗然





「嗒—」殷書賢伸手拉住控制百葉簾嘅珠鍊，將百葉簾放咗落嚟

「呢個簾嘅設計係⋯得一半⋯？」殷書賢有啲不解咁俯身抬頭望多一眼，「遮到啲咩⋯？」

殷書賢再一次望向邱茗然嘅方向，就算拉咗窗簾都只係遮到少少，但都係照到邱茗然正一正

邱茗然左轉右轉都搵唔到個令佢瞓得舒服唔刺眼嘅位置，最後都好似放棄咗一樣，皺起眉頭瞓就算

殷書賢再次抬頭望一望，窗簾真係只係拉到一半，稍微思考咗一陣，殷書賢自己都唔知點解會諗到呢個方法





佢將放喺最底嘅LS厚身硬file抽出嚟，打開平衡咁棟起放喺邱茗然前面，果然將照落嚟嘅陽光擋住

邱茗然好似感覺到唔再曬，皺起嘅眉頭都慢慢咁舒緩咗；殷書賢見到方法奏效之後就再次專注喺自己嘅學業上

「點解會諗到咁嘅方法⋯？」殷書賢瞄一眼屬於自己嘅file，連佢自己都有啲不解，「順手啫⋯」

喺就嚟5點3嘅時候，邱茗然似乎小睡夠，體力都得到補充，佢緩緩睜開眼，冇刺眼嘅陽光照住佢

「唔⋯幾點⋯？」邱茗然坐起眼揉眼，仍然有啲迷糊





「5點13分。」殷書賢回答佢嘅時候，佢正溫緊書，目光落喺書上

邱茗然坐好，個人慢慢回神嘅時候，佢先發現打開棟喺佢面前嘅file

「幾時有個file喺度⋯？」邱茗然有啲困惑，佢偶然抬眼一望，發現座位前嘅百葉簾拉咗落嚟，「窗簾拉咗落嚟嘅⋯？」

邱茗然回想一下，佢未完全瞓著嘅時候，本來感覺到嘅光忽然間暗咗落嚟，或者就係因為拉落嚟嘅窗簾同棟起嘅file嘅關係

「係殷書賢嘅⋯？」邱茗然有啲愕然，佢唔敢肯定佢嘅想法，於是將file合埋後遞比殷書賢，「唔該⋯」

「唔洗。」殷書賢淡然地接過file，將file放番喺最底嘅位置

邱茗然見殷書賢反應冷淡，但諗起啱啱忽然冇咗刺眼嘅陽光照住佢嘅一刻，邱茗然都係默默咁嘴角上揚

⋯





「食唔食飯？一齊食。」李雨揚邊執嘢邊問張萱淇

「宜家？」張萱淇睇一睇時間，又拎手機出嚟望一望，「都唔係唔得嘅⋯下次打算一齊食飯早講呀！」

「啱啱先諗到嘛～」李雨揚笑一笑，好似慣性一樣伸手勾住張萱淇嘅膊頭，「行未？」

「行啦⋯得啦⋯」張萱淇拎起書包，佢唔會推開李雨揚，畢竟佢中意李雨揚靠近佢多啲

自從公園嗰件事上次之後，李雨揚同張萱淇好似又熟咗好多，李雨揚多咗主動搵張萱淇，但張萱淇又唔敢諗太多

「佢對個個都一樣⋯」張萱淇一直都係咁樣諗，「算啦⋯都慣咗⋯」

行到佢地打算食飯嘅餐廳門口，張萱淇就見到清菁都喺呢間餐廳，正同另一個女仔一齊食飯





「喂⋯」張萱淇拍一拍李雨揚，「你個Ex喺度。」

「係喎。」李雨揚同張萱淇望住同一個方向，李雨揚嘅反應好冷淡

「洗唔洗食第二間？」張萱淇拉住李雨揚嘅衫袖問道

「吓？我點解要去食第二間？我今日就想食呢間。」李雨揚對張萱淇反個白眼，伸手就搭喺張萱淇嘅膊頭上，「有你怕咩？」

「我又唔係你嘅水泡，關我鬼事？」張萱淇撥開李雨揚嘅手，「不過你唔驚見到佢啦？」

「我冇驚見到佢，只係⋯係囉。」李雨揚用冇重點又冇頭冇尾嘅一句總括咗佢所有想法

「放低咗啦？」張萱淇好奇咁問，除咗係好奇，都係佢自己想知嘅一大重點

「係掛⋯？」李雨揚猶疑咁講道，然後一笑，「唔知。」





「你唔想復合啦？」張萱淇問嘅呢個問題，係代表佢心中嘅一絲期待

「本來就唔可能⋯」李雨揚望向坐喺餐廳裏嘅清菁，呢個令佢難以忘懷嘅人正同朋友有講有笑，「所以，諗通咗，就放棄啦。」

「咁你⋯宜家有冇中意嘅人呀？」張萱淇試探般問道，喺問出口嘅一刻，心臟緊張咁噗噗跳

「冇喎。」今次李雨揚答得好爽快，「唔想拍拖住，一齊咗要煩好多嘢，我唔想煩咁多嘢住。」

「都⋯都係嘅～」張萱淇失望咗一個瞬間，但為咗唔比李雨揚睇穿佢，佢即刻露出笑容附和，「你都係中意自由自在嘅人。」

「比起拍拖，現階段我寧願同人曖昧。」李雨揚嘅手搭喺張萱淇嘅膊頭上，張萱淇好似有啲察覺到李雨揚嘅意思

「唔⋯」張萱淇有啲遲疑，佢都唔知要答啲咩好，但思考咗一陣之後，佢都係緩緩開口：「嗯。」





張萱淇望向李雨揚，李雨揚就同平時一樣，佢對於自己啱啱講嘅嘢完全冇咩反應，就好似只係日常對話嘅一部分一樣

「佢係察覺到我中意佢所以先咁講⋯」張萱淇都係忍唔住猜測李雨揚嘅想法，「都係，佢點可能會察覺唔到⋯？佢係要劃清界線比我⋯？」

有時佢好似好了解李雨揚，但有時又好似一啲都唔了解，李雨揚好似只係中意暖人，唔中意拍拖一樣

其實李雨揚啱啱講嘅嘢對女仔嚟講，大概係又賤又直接，好似要講明比張萱淇聽，無論佢地嘅關係再親近都好，佢地都會喺曖昧嘅狀態停留

「最絕嘅係，講到好似不留餘地但又⋯唔係完全冇彎轉⋯」張萱淇不禁一笑，佢嘅一笑，係自嘲嘅一笑，佢望向李雨揚伴隨一聲冷笑，擺出鄙視嘅表情：「難怪比人話你渣男。」

「吓？不嬲都係。」李雨揚爽快承認，挑起眉望張萱淇，「你知㗎。」

「你呢個樣，真係令人想打你一拳。」張萱淇反一下白眼，雖然佢係真係知道李雨揚係渣男

李雨揚同平時一樣調皮咁笑着，拉一拉張萱淇嘅馬尾又拍一拍張萱淇嘅膊頭，但李雨揚講嘅嘢，張萱淇真係會放喺心上面

「算啦⋯一直咁樣都唔緊要⋯」張萱淇說服自己去接受李雨揚呢個想法




IG Link: https://www.instagram.com/nd_cotttoncandy/?hl=zh-tw