【校園】想成為您的治癒: 99. 膠布
「邊題？」殷書賢問道，佢又唔會真係咁狠心唔幫佢一把，「邊題唔識？」
「呢題。」邱茗然望咗殷書賢一眼後嘴角悄然上揚，佢就知道殷書賢都係會教佢
「你睇下佢前面呢度，知唔知呢幾個字點解？」殷書賢嘅左手拎起放咗喺左邊嘅筆，佢伸出左手，「嘶⋯」
殷書賢伸手打算用筆指一指佢講嘅字時，放喺面前嘅書嘅書角刮到佢嘅手，殷書賢望咗一眼就冇理
「呢幾個。」殷書賢用鉛筆間低嗰幾個字，「加埋前面呢句，你要知道佢大概講緊咩先。」
「太近⋯！」邱茗然感覺殷書賢忽然間離佢近咗好多，擋住咗左邊嘅光一樣，佢悄悄地望咗一眼，「太近啦真係⋯！」
「你有冇聽我講？」殷書賢發現邱茗然好似冇反應，即刻就問道，「唔明？」
「唔係⋯」邱茗然見殷書賢退開咗少少便回過神搖頭，「我唔肯定係唔係呢個意思⋯」
「你估嘅意思係咩？」殷書賢一臉認真，完全冇走出狀況，邱茗然將自己嘅推測講咗出嚟，「嗯，但文言文要字對字語譯，你譯漏咗呢兩個字，唔夠準確。」
「殷書賢⋯」邱茗然喺殷書賢講到一半嘅時候忽然間拉一拉殷書賢嘅衫袖，「手，流血啦⋯」
殷書賢望一望自己嘅手，原來係琴日鎅嘅傷口又有少少爆開咗，大概係因為啱啱書角刮正傷口嘅位置所以流血
「血滲緊出嚟，我有紙巾⋯！」邱茗然連忙從書包中拎出紙巾對摺兩下比殷書賢，「快啲㩒住先啦！」
殷書賢㩒咗個傷口一陣，拎開紙巾打望一望止血未，但手一鬆開，傷口就滲血
「你琴晚又鎅手啦⋯？」邱茗然嘅眼神中夾雜咗一絲擔心
「用力咗所以鎅得有啲深⋯」殷書賢本來已經因為喺圖書館嘅關係講嘢細聲，宜家佢就好似心虛一樣更細聲
「一直滲血點算？會整污糟衫袖。」邱茗然望住殷書賢手上嘅傷口，又抬頭望一望殷書賢嘅反應，「你要唔要膠布？」
「我冇膠布喺身。」殷書賢又用紙巾㩒住滲血嘅傷口，雖然量唔多，但係都會整污糟白裇衫
「我睇下我有冇⋯因為之前有擺定喺書包⋯」邱茗然打開書包嘅前隔搵，喺暗格入面發現有兩塊膠布，「咦，我有呀～」
邱茗然拎咗一塊膠布出嚟示意，都唔等殷書賢開口，佢就撕開咗膠布嘅包裝：「貼住先啦～免得裇衫整到有血跡。」
邱茗然將膠布嘅膠貼撕開，對準滲血嘅位置後溫柔地將膠布貼上，輕輕力咁將膠布㩒一㩒實
「Okay～」邱茗然笑一笑，將垃圾都先擺入裙袋，「咦？原來係有公仔喺上面㗎？」
邱茗然貼完膠布先留意到膠布上面原來係公仔膠布，上面仲要有一隻隻兔仔嘅公仔
「好襯你～」邱茗然笑道
殷書賢無奈咁望住貼喺自己傷痕累累嘅手上嘅淡黃色公仔膠布，佢一時之間都無言以對
「膠布都可愛過頭⋯邊度襯？明顯係串我⋯」殷書賢喺心入面係咁樣講
邱茗然瞄殷書賢手上嘅膠布一眼，然後又偷偷地喺度笑；殷書賢望住邱茗然自己偷笑起嚟，佢就下意識都笑咗一笑
「咁可愛嘅膠布同殷書賢有好大反差～」邱茗然邊偷笑邊喺心入面講道
「咁可愛嘅膠布真係唔襯我。」殷書賢邊講邊將衫袖拉番落嚟，將袖鈕扣番好
「有反差真係好可愛⋯」邱茗然笑一笑嘅同時喺心裏細聲咁講道，不過咁樣諗完佢就即刻回過神，「嗯？可愛？」
「不過，唔該。」殷書賢整理好兩邊嘅衫袖
「唔洗～」邱茗然連忙朝殷書賢露出笑容講道，「有時有啲反差萌都幾好呀～雖然鎅手唔係好事。」
「冇辦法⋯」殷書賢垂眸，眼神中夾雜咗好多講唔出口嘅無奈
「唔⋯我覺得你冇擔心成績唔好嘅必要，就算你放水都會係第一名。」邱茗然微微聳肩，拎起筆喺繼續做功課前輕描淡寫咁講咗句，然後又笑一笑講道：「畢竟學霸嘅地位冇人可以輕易動搖嘛～」
本來已經耷低頭嘅殷書賢聽到邱茗然冇心嘅一句時，不禁一愣，微微抬頭
「多謝你咁睇得起我。」殷書賢托住下巴，微微轉頭將目光落喺邱茗然嘅身上，「不過都係勤力啲好。」
⋯
唔知係唔係因為愈嚟愈近考試嘅關係，小測、統測嘅數量的確減少咗，但取而代之嘅係大量嘅課堂小測
中六嘅同學嘅臉上除咗疲倦之外就係疲倦，幾乎真係做到每日一測
「陣間嗰堂又小測啦⋯！」張思群嘅額頭貼住枱面，忍唔住抱怨，但抱怨完之後佢同班上嘅其他人一樣，又係繼續埋頭溫書
邱茗然同張萱淇因為孖堂嘅廁所break而出嚟休息一下，經過E班嘅時候，真係會比E班嘅景象嚇親
「佢地班真係好恐怖⋯」邱茗然低聲地對張萱淇講道，「明明係轉堂時間，但冇一個人唔係耷低頭溫緊書⋯」
從走廊望去，E班安靜得可怕，因為安靜而形成嘅壓迫感更能力壓力大；只要當日有測驗，基本上佢地班嘅轉堂、小息時間都會係咁樣，大家嘅默契就係各自坐喺位專心溫書
「喺咁嘅班真係會癲⋯你諗下成績最差嗰個幾大壓力⋯」張萱淇拉過邱茗然嘅手細聲地講道
「考第一嗰個又何嘗唔係好大壓力⋯？」邱茗然望到坐喺後排耷低頭溫書嘅殷書賢，佢同平時喺圖書館簡直一模一樣
「咦～心痛人地呀？」張萱淇即刻捉住邱茗然講嘅一句問道
「吓⋯？我講事實咋⋯！」邱茗然搖搖頭否認，「我真係怕咗你，你個雷達都太勁⋯比你捉到一句就死⋯」
「你唔係有嘢隱瞞嘅話怕咩呀～」張萱淇笑問，佢嘅雷達已經掃描到異樣
「我有咩可以隱瞞⋯」邱茗然加快腳步行前推門入廁所，「冇嘢隱瞞⋯」
⋯
「啱啱第八題你寫咗咩呀？」
「乙部第一題你揀咗咩答案？」
「吓？唔係D咩？」
小測完結後嘅E班就同其他班一樣，要互相對一對答案先可以完全安心
「行未？食飯啦去。」趙遠寧見老師已經準備走，佢都企起身打算走，「今日食咩？」
「是旦啦，你中意嘅老麥都得㗎。」張思群將銀包放入褲袋，喺行之前望一望謝澤謙同殷書賢，「行啦謝澤謙！唔好對答案啦！睇下殷書賢都冇對答案！」
「我又唔係佢⋯！」謝澤謙邊企起身邊慢動作將書合上，臨走前都要望多兩眼睇下寫得啱唔啱，「我估我今次會考得唔錯。」
「你考得唔錯？問過殷書賢未呀？」張思群對謝澤謙輕嗒一下手指，然後對殷書賢嘅方向抬一抬下巴
「殷書賢你做咩唔出聲？」趙遠寧問殷書賢，總覺得今日殷書賢比平時仲安靜
IG Link: https://www.instagram.com/nd_cotttoncandy/?hl=zh-tw