【校園】想成為您的治癒: 97. 與我無關

「夠鐘走。」殷書賢嘅手喺度執嘢，眼望向正望住佢執嘢嘅邱茗然，「你唔走留喺度瞓？」

「唔要。」邱茗然回過神，拎起書包將書同功課疊好

「嚟緊好快就放聖誕！諗下都開心～」邱茗然忽然笑道，諗到聖誕節就嚟到，佢就好興奮，「你聖誕節打算做咩呀？」

「喺屋企溫書。」殷書賢嘅回答一如既往地無趣且堅定

「你就唔會約你啲friend出去玩？」邱茗然喺心裏忍唔住反白眼





「我地會一齊溫書。」殷書賢答咗另一個破壞節日氣氛嘅答案，「考試啦仲玩⋯」

「咁有啲節日氣氛去玩下都唔緊要嘅～」邱茗然輕輕一跳，直接跨過最後兩級樓梯，「又唔係叫你完全唔溫書～」

殷書賢沉默不語，明明睇起嚟冇嘢好擔心，但又好似好多嘢要擔心一樣

「咁你陣間番屋企又繼續溫書呀？」邱茗然轉身無奈咁望向殷書賢

「嗯。」殷書賢微微點頭，佢都唔知番到屋企除咗溫書仲可以做咩





本來可能可以揀打機，但一諗到眨下眼已經12月，佢就知道自己除咗溫書之外冇其他嘅選擇

「12月，咁又就到考試啦⋯」殷書賢微微抬頭望向前方嘅天空，中六好似啱啱開始，但又準備結束，「最後一個考試，然後就係DSE⋯」

⋯

星期六

「其實都仲有一個月先考試，我今晚先溫書⋯都唔過分呀？」邱茗然望住貼喺書枱上嘅考試時間表，「咁我宜家都係煲陣劇先～」





邱茗然悠閑咁拎起放喺枱上嘅IPad趴喺床上面揀緊集數

「又煲劇，陣間比媽咪見到你就知死。」邱旻顥推門行入嚟，伸手拎放喺上格床嘅手機同袋

「你出去呀？」邱茗然望邱旻顥一眼後明知故問道

「係呀，約咗李逸彤出去。」邱旻顥孭起袋準備行出房

「唉～拍拖真好～」邱茗然莫名其妙地慨嘆起嚟，「咁你玩得開心啲啦～」

「你以後搵到男朋友都可以。」邱旻顥無奈地講道，「我出去啦。」

「冇男朋友。」邱茗然扁起嘴自言自語講道，睇緊集數嘅時候忽然諗起一星期前嘅誤會，「諗起都好好笑，當咗我哥係我男朋友～」

不過，殷書賢誤會咗之後嘅反應，居然係直接狠狠咁劃清界線，呢樣嘢係邱茗然估唔到嘅





「都太狠心啦掛⋯」邱茗然仍然扁起嘢，有啲受傷咁講嘅同時揀好佢要睇嘅集數，「果然佢都係淨係對讀書先熱情～」

「哈啾⋯！」殷書賢啱啱打開堂課簿就打咗個乞嗤

殷書賢今日揀咗溫數學，所以拎咗本有100題MC嘅練習出嚟做，對佢嚟講MC先係比較難嘅一項

拎起筆喺放喺隔離嘅草稿紙上寫完一題又一題，拎起計數機逐步逐步搵出答案，大腦一直無間斷咁高速運轉

一直專注喺做題嘅佢都冇留意過時間，時間一分一秒就流逝，做完第五十題嘅時候，佢決定停落嚟對答案

「時間喺預計範圍內。」殷書賢望向枱頭嘅時鐘，喺心裏計算一下佢花嘅時間，「對埋答案先⋯」

一直埋頭溫書嘅殷書賢都冇留意到外面天色嘅轉變，當佢對好答未做好改正之後再抬頭，夜幕已經悄然降臨





上午嘅時間殷書賢都用嚟溫數學嘅core部分，嚟到晏晝時間，佢要將時間撥去比M2，兩樣都要平衡咁溫先可以

「叩叩—」「你仲溫緊書呀？」

媽媽輕輕地將門推開，殷書賢當冇人一樣繼續溫書，唔想花心思去理會每次都一樣嘅說話

「就嚟考試啦係唔係呀？」媽媽好似習慣咗一樣開口問道，轉身望向殷書賢貼喺衣櫃門嘅考試時間表，「今次考數學先呀？你嘅拿手科。」

「可唔可以唔好喺我溫書嗰陣同我講嘢？」殷書賢嘅內心充滿着不滿

喺媽媽踏入佢嘅房間範圍嘅一刻，即刻有種壓迫感從門口湧嚟將成個書枱位置包圍住，令殷書賢覺得渾身唔自在，坐都坐得唔舒服一樣郁嚟郁去

「不過應該每一科都係你嘅拿手科啦～」媽媽嘅語氣略帶點自豪，「最後先考中文聆綜⋯」

殷書賢嘅大腦忽然間有啲混亂，望住題目嘅英文字同數字，佢好似都唔知佢地嘅意思一樣，思考嘅時間都要多花幾秒





「上次你細姨仲話梓傑科科都叻，叻又點呀～咪又係考唔到科首名～」媽媽輕輕嘆一口氣，「叻極都係考第六。」

「要炫耀唔好喺我房炫耀得唔得⋯？」殷書賢聽到媽媽嘆氣，佢嘅內心都跟住一齊嘆氣

「我個仔科科都考第一，全級都考第一，我都未話佢科科叻。」媽媽行到殷書賢身後，雙手輕輕地搭喺殷書賢嘅膊頭上，「你話係咪？」

「我覺得同我冇咩關係。」殷書賢拎起計數機同時用冷漠嘅聲線表達出佢對呢件事完全冇興趣，「我要專心溫書啦。」

「書賢，最後一次考試啦，之後就考DSE，你要比心機知唔知呀？」媽媽緊張地講道，「醫學院等緊你㗎啦⋯！」

「我真係要溫書啦。」殷書賢回頭望向媽媽，面無表情認真咁再重複一次

「呃⋯好啦，咁你比心機啦。」媽媽望住殷書賢認真又無情嘅態度不禁一愣





「咔嗒—」「唉⋯」

聽到閂門聲嘅殷書賢忍唔住嘆一口氣，似乎就算媽媽出咗去都好，房間內凝聚起嚟嘅壓迫感仍然存在

「哈⋯真係好攰呀⋯」殷書賢挺直腰桿令自己打起精神，「心很累⋯」

殷書賢又一次想要集中精神溫書，啱啱嘅集中都比媽媽入一入嚟打擾而打散；佢望向題目，大腦將題目嘅數字都撈埋一齊，殷書賢嘅大腦內異常混亂，字又開始從紙上逐個飛走

「嘖！又係咁！」殷書賢瞬間覺得煩躁至極，明明佢本來已經專心一致，但突然間比人入嚟問兩句打亂晒，「嘖！」

殷書賢坐好深呼吸嘗試平靜一下，然後伸手拎起擺喺枱上嘅朱古力，撕開一角，食兩粒朱古力冷靜一下

「應該⋯可以啦掛⋯？」殷書賢感覺自己可以集中精神之後，又將目光放到練習題上

紙上嘅字仍然飄浮喺半空冇歸位，殷書賢又食多兩粒朱古力，但係大腦冇變得集中亦冇變清晰，數字同文字仍然係一堆一堆

「嘖！真係好煩⋯！」殷書賢有啲焦急，朝校服伸手拎出放喺褲袋嘅鎅刀，「點解次次都要咁樣煩我？」

殷書賢推出刀片後毫不猶疑咁落刀，手起刀落嘅佢對自己好狠心，但佢只識得呢個方法⋯




IG Link: https://www.instagram.com/nd_cotttoncandy/?hl=zh-tw