【校園】想成為您的治癒: 90. 外賣
「哦。」邱茗然露出笑容，然後問出略帶點試探意味嘅問題，「你有冇比你啲friend睇過？你地咁熟嘅話⋯」
「冇。」殷書賢將望遠鏡還番比邱茗然，轉身行到長櫈坐低，又拎起中文雞精書，「又唔係話熟就一定要比佢地睇。」
「咁我咪好lucky？」邱茗然笑問道，「唔熟都睇到。」
「咁係我唔好彩。」殷書賢微微聳肩，輕輕一笑
「其實笑容都好啱你。」邱茗然有啲沒頭沒腦咁講道
殷書賢一愣，目光從雞精書上稍微移開一下，然後托一托眼鏡後又垂眸溫書，淡然地開口講道：「還好啦。」
邱茗然笑而不語，佢真心認為殷書賢有笑容都唔錯，笑多啲嘅話心情都會好啲，不過似乎殷書賢唔係咁諗
「呢個人真係，同小朋友一樣⋯」殷書賢抬頭望邱茗然一眼，邱茗然仍然拎住個玩具望遠鏡四處望
「你睇唔睇呀？」邱茗然擰轉頭望向殷書賢笑問道，「可以睇到麻雀起飛！」
「不過，笑口常開都係好事嚟⋯」殷書賢笑一笑，喺搖頭嘅同時喺心裏道，「應該喺邊個身邊都係開心果⋯」
⋯
「今日晏晝不如唔好出去食⋯」趁小息坐到邱茗然前面嘅張萱淇輕輕踢着腿講道，「冇錢⋯」
「吓？點解呀？」邱茗然喺schedule book上寫低黑板上寫咗嘅各科小測嘅日期，「你好大洗咩最近？」
「少少啦⋯李雨揚成日都約我食飯，我又唔好意思推佢⋯」張萱淇無奈地聳肩
自從嗰日之後，李雨揚多咗約張萱淇食飯，就算係補習，佢地都會約埋一齊去；開心還開心，但張萱淇都唔知李雨揚突然間發生咩事
「你係唔好意思推定唔捨得推呀～」邱茗然露出意味深長嘅笑容，「我覺得似係後者多啲囉～」
「又想食我花生？我唔話你知呀！」張萱淇翹埋雙手封口唔講，反而將個波拋去邱茗然身上，「你成日都同人地一齊放學溫書，番學又一齊番，你冇花生派下比我食呀？」
「我可以有咩花生派比你食？」邱茗然笑問，「我地真係各自溫書做功課㗎！」
「你地又會咁有緣日日搭中同一班車嘅？」張萱淇講道，忍唔住發揮佢嘅推理能力，「會唔會係佢搭早一班車就係為咗撞你？」
「應該唔會囉⋯」邱茗然反個白眼搖搖頭
雖然邱茗然搖頭，但心入面卻諗緊有冇可能，邱茗然可以話係由高中開始就係搭同一時間嘅同一班車番學，但以前從來冇遇過殷書賢
「諗緊咩呀～」張萱淇嘅雙手放到邱茗然嘅枱上，左手托住下巴，瞇起眼笑着問邱茗然
「冇呀，不過你咁講起，我以前都真係冇撞過佢。」邱茗然坦白地講道，「最近就真係一直撞到一齊番嚟⋯」
「你話會唔會有機會係⋯」張萱淇故意唔講埋落去，等邱茗然估佢想講咩
「就算一齊番嚟，佢每次都同我保持一定嘅距離⋯唔會係你想講嘅嘢。」邱茗然真係認真回想後答張萱淇，「就算平時放學喺天台，佢都唔會同我企得好埋⋯」
「邊個話佢一定要表現得好明顯先叫中意？」今次到張萱淇忍唔住反白眼，「小姐，佢係代表住完美主義同極謹慎嘅處女座呀⋯而且我話你知，處女座嘅男仔對中意嘅人係超溫柔，認真。」
「你幾時對星座咁有研究⋯？」邱茗然見張萱淇講得咁有道理，「你信㗎咩？」
「幾啦～有時都幾準～」張萱淇比咗個okay手勢，「咩都識啲，食花生先可以更開心㗎嘛～」
「你真係為戀愛話題付出好多努力⋯」邱茗然無奈咁望住一臉高興嘅張萱淇
「佢就冇做過啲好溫柔嘅事咩？」張萱淇唔忿氣咁追問，「係咪你冇留意咋？」
「如果佢教我做數嗰陣唔係好似惡魔上身咁，就係對我最溫柔嘅事⋯」邱茗然一諗到殷書賢每次教佢做數嗰陣嘅嚴厲，佢就忍唔住要嘆一口氣
「哎呀好sweet呀～佢肯教你做功課，作為學霸見到你呢種數學白痴計極都錯嗰陣冇躁底算係咁啦～」張萱淇笑言
「淇淇咁樣講起，殷書賢好似又真係冇因為我計極都錯而發過脾氣同唔耐煩⋯」邱茗然因為張萱淇嘅說話就諗起，「不過佢真係好中意計數都係真⋯」
邱茗然搖搖頭，將佢頭上嘅回想畫面甩走，佢比張萱淇咁樣一齊就喺度諗，簡直就係比張萱淇說服緊一樣
「所以晏晝喺學校食啦係唔係呀？」邱茗然趁張萱淇未繼續就先轉移話題，「如果係嘅我就叫飯啦⋯」
⋯
中午嘅lunch time
「唉～成日出去食飯都食到唔知可以食咩⋯」張萱淇頹廢地行落樓梯，「食下學校飯啦～好耐都冇食學校飯～」
「都係嘅，喺學校食都好嘅～」邱茗然同意地點頭
「你打算食咩呀？」張萱淇好奇地問，「諗好未？」
「嗯？我唔洗買飯呀～我叫咗我哥帶飯比我～」邱茗然一臉自豪咁笑道，「佢應該就到啦～」
「你阿哥咁好嘅～肯帶飯比你食，佢唔洗番學咩？」張萱淇一臉羨慕地講道
「我今朝問佢，佢好似話今日冇堂，係day off。」邱茗然聳聳肩，佢都唔太清楚邱旻顥嘅上堂時間，但邱旻顥咁講，咁佢就信
「唉～我都想有個阿哥呀～」張萱淇慨嘆道，邱茗然只係一笑
喺張萱淇買完Lunch之後，兩人要經過學校門口上前梯，邱旻顥手上拎住一個裝住飯盒嘅膠袋推開學校嘅大閘門
「嘩～唔該哥哥～」邱茗然以輕快嘅步伐行到邱旻顥嘅面前接過飯盒，「你今日唔洗番學呀真係？」
「都話冇堂上。」邱旻顥講道，「買咗叉燒飯比你。」
啱啱落堂嘅殷書賢同謝澤謙佢地一齊落到嚟，佢地正準備要出去食飯
「你又知我想食叉燒飯嘅～愛死你啦～」邱茗然興奮地講道，殷書賢同謝澤謙喺佢地身旁經過直行出學校嘅大門
「得啦得啦，你少啲打劫我就得，我走啦。」邱旻顥淡然地講道，然後就轉身行出學校門口
邱茗然滿心歡喜地拎住飯盒同張萱淇一齊番課室；剛踏出校門行咗冇幾遠嘅謝澤謙回頭望一眼，見到啱啱喺學校門口行出嚟嘅邱旻顥
「男朋友？應該唔係掛⋯」謝澤謙冇將呢個天大嘅誤會想法講出嚟，只係自己喺心入面諗，謝澤謙悄然望一眼殷書賢，但又冇太多嘅表示
IG Link: https://www.instagram.com/nd_cotttoncandy/?hl=zh-tw