【校園】想成為您的治癒: 74. Déjà vu

「未落堂呀⋯」邱茗然行到E班嘅門口，見到入面未落堂，「手仲係好攰⋯」

邱茗然企喺課室外等，許洛霏攬住地理書行到嚟

「未落堂呀？」許洛霏行到邱茗然嘅身旁問道

「嗯。」邱茗然微微點頭，望住入面嘅同學執嘢起身，「落堂啦～」

邱茗然直接行到佢要坐嘅位置坐低，將西史書收入櫃桶，將地理書放喺枱上





「快啲拎Bio書。」張思群用手肘撞一撞殷書賢

兩人快步行入課室、行番埋自己位；邱茗然見殷書賢番嚟，佢喺殷書賢行到番埋位嘅時候企起身讓殷書賢

邱茗然嘅目光一直跟住殷書賢嘅動作郁；許洛霏見殷書賢番嚟嘅一刻，佢就默默咁留意住邱茗然

殷書賢從櫃桶抽出Bio書，一抬頭就見到邱茗然望住佢手上嘅書，佢仲以為佢拎錯書：「做咩？」

「嗯？」邱茗然好似回神一樣抬頭望殷書賢，然後露出一個微笑，「冇嘢呀～」





殷書賢嘅嘴角以極小嘅幅度上揚，睇起嚟同冇笑完全冇分別；殷書賢行開咗之後邱茗然坐番低，打開上次未教完嘅頁數

「難怪你地咁熟啦～」許洛霏拍一拍邱茗然嘅膊頭細聲笑道，「原來～」

「我都係今年先係坐佢個位。」邱茗然側身笑道，「應該係佢地調咗位，然後我地又調咗位，咁啱我又坐到佢個位⋯」

「呢啲叫緣份呀茗然⋯！」許洛霏果然都係同張萱淇一樣，講起愛情話題會雙眼發光

「你同淇淇一樣，一講呢啲話題就雙眼發晒光⋯」邱茗然無奈咁笑着搖頭





「咁都係女仔嘛～天性嚟～」許洛霏稍微思考後微笑道，然後佢又一臉認真咁湊前湊近邱茗然，「其實我覺得你地都幾襯呀～」

「講、講呢啲⋯？」邱茗然對於呢個突如其來吧讚美有啲慌張，佢同殷書賢真係冇關係，什至連曖昧都冇

「你唔洗咁慌張～我嘅個人想法啫～」許洛霏笑道，喺老師行入嚟嘅一刻佢連忙補充：「但我係真心咁諗㗎！上堂上堂⋯！」

「打開上次未講完嗰頁，今日講埋佢。」阿sir邊拎起遙控打開投影機邊講道

邱茗然拎出原子筆同螢光筆，佢微微低頭望住已經打開嘅課本，等待阿sir開始講書

「真係有許洛霏講嘅咁襯⋯？」邱茗然不禁回想許洛霏啱啱講嘅嘢，大腦忍唔住思考起嚟，「哎！我諗咩呀？」

邱茗然都忍唔住伸手拍自己嘅額頭一下，許洛霏講嘅嘢搞到佢「胡思亂想」

「我對殷書賢冇嗰方面嘅意思⋯真係⋯」邱茗然對自己解釋起嚟，但轉個頭又開始諗，「不過外表嚟講係好睇嘅，人又好聰明，頭腦清醒⋯唔諗啦唔諗啦！」





邱茗然選擇唔再諗落去，因為仲要上堂，佢要聽書啦⋯冇其他人咁叻，唯有比其他人努力

當落堂番課室嘅時候，邱茗然同許洛霏一齊番去課室

「份功課佢係咪話後日先交？」許洛霏以唔肯定嘅語氣問邱茗然

「係呀，唔係聽日交就太好啦～」邱茗然高興咁講道，「睇嚟佢好快又會有小測⋯」

「應該都係，佢都差唔多教完呢課，咁佢應該好快定到小測日期。」許洛霏微微點頭

喺走廊行緊番課室嘅許洛霏見到上完Bio堂嘅殷書賢同張思群，佢偷偷地瞄邱茗然一眼，但邱茗然專心諗緊其他嘢冇留意到

許洛霏喺兩個男仔行過咗之後回頭望一眼，又望一望邱茗然，然後偷偷一笑





⋯

「拜拜～」「拜拜。」

邱茗然回頭對殷書賢揮揮手，殷書賢戴埋右耳嘅耳機，但耳機入面咩都冇播

「今日唔想聽筆記⋯」殷書賢默默嘆一口氣，「聽咩好⋯」

佢拎起手機，㩒開播音樂嘅app，但向來少聽歌嘅佢根本唔知聽咩好；殷書賢手托住下巴合埋眼，腦海中莫名就彈出嗰日邱茗然播嘅歌

「歌名係咩⋯？」殷書賢發現佢唔知首歌嘅歌名，佢幾中意嗰首歌嘅旋律

殷書賢拎起手機，打開IG，send個message比邱茗然：「嗰日你播嗰首歌叫咩名？」

行到番屋企樓下嘅邱茗然見到突然彈出嚟嘅message嚇咗一跳





「佢居然會搵我⋯？」邱茗然有啲意外，即刻就㩒入去：「Have we met before」

邱茗然好快就回覆咗，殷書賢開咗YouTube搵呢首歌，喺巴士到站前先聽一陣歌；邱茗然嘅playlist啱啱好都播到呢首歌

「又會咁啱我都播到呢首歌嘅⋯」邱茗然望住手機鎖屏上嘅歌名

    “Black cup of coffee and a book you're skimming over”

    “You're a stranger but feel closer and when I'm looking at you”

殷書賢聽住呢首歌望住車窗外嘅街景，柔和嘅旋律令人好放鬆，啱啱好可以洗滌心靈，呢首歌好似係佢最近聽過最好聽嘅歌一樣，會令人想一直loop落去

    “Swear I feel you in my memory”





    “I think I've seen you in my dreams”

邱茗然嘅步伐帶着少許嘅輕快，呢首係佢好中意嘅歌之一：旋律好溫柔，歌詞好有意境，嗰日喺天台都係咁啱播到呢首，所以佢先一直播

    “Have we met before?”

    “Maybe in another life I knew you”

    “Maybe if I try I'll see right through you”

邱茗然輕聲唱着歌，微微抬起頭望住離佢好裏嘅天台，黃昏嘅天空好靚，但只會維持一段短時間，然後夜幕降臨

「呀～都好耐冇一放學就番屋企，日日都係睇住日落咁番嚟⋯」邱茗然嘅嘆氣係心情愉快嗰一種

邱茗然唔討厭呢個時間先番屋企，至少喺學校可以專心做功課同溫陣書

「好似第一次喺圖書館見到佢嗰陣，佢都係坐喺角落頭嗰個位溫緊書⋯」邱茗然聽到歌詞嘅時候不禁回想，「學霸嘅氣場真係唔可以睇少⋯」




首歌真係好好聽，推薦大家去聽！！！
大家一定一定要去聽！歌詞都好正！

歌詞版：
歌Link: https://youtu.be/Ge6IyESTVgc

IG Link: https://www.instagram.com/nd_cotttoncandy/?hl=zh-tw