【校園】想成為您的治癒: 69. 不情不願

「吓⋯？」張萱淇嘅大腦有少少反應唔切，呆咗兩秒先回神，「係佢？係唔係你認錯人呀⋯？」

「唔會囉！同你著同一間學校嘅校服㗎！」李雨揚肯定咁講，「我認得係佢！前幾日我撞到佢，問佢有冇IG佢仲答我冇！」

因為張萱淇喺story @咗邱茗然，李雨揚好快手就㩒咗入去想request對方

「你唔好搞佢啦⋯！」張萱淇即刻撥番出去story嗰頁，「佢唔會比你follow㗎啦⋯！」

「你同佢講我係你個friend咪得！」李雨揚誠懇咁望住張萱淇，希望張萱淇幫佢一把





「唔要⋯唔會比你禍害我個friend⋯」張萱淇諗都唔諗就一口拒絕，佢拒絕嘅原因唔只係為咗朋友好，亦帶着少許嘅私心

「我request咗先啦！」李雨揚冇放棄嘅打算，直接㩒咗request，「都係識多個朋友啫，又冇壞嘅。」

「壞到極好唔好⋯！？」張萱淇望住佢㩒request嘅一刻，內心都咯噔一下，「叫茗然唔好比佢follow！」

「你唔好叫佢唔比我follow呀～大家咁熟，你唔係唔幫我呀？」李雨揚對張萱淇講道

「我⋯就算我唔講，佢都唔會比你follow⋯！」張萱淇比李雨揚估到之後即刻心虛咗一下，但仍然擺出得戚嘅表情，「佢又唔識你～而且我個friend唔中意渣男㗎！」





「痴線啦！邊個係渣男呀？」李雨揚伸手捏住張萱淇嘅臉頰

「你呀李雨揚！好痛呀⋯！放手呀！」張萱淇將李雨揚嘅手推開，用手機反光嘅螢幕當鏡一樣照

張萱淇望住李雨揚又繼續睇手機，佢真係覺得無奈又好笑

「又會咁啱得咁翹嘅⋯」張萱淇喺心裏默默地講道，「茗然講嗰個怪人原來係佢⋯」

既然知道邱茗然覺得李雨揚係怪人，就更應該叫邱茗然唔好比佢follow





「李雨揚咁中意周圍溝女，陣間溝茗然點算？」諗到呢度張萱淇忍唔住皺起眉頭，「但如果我同茗然講呢個人係我補習同學，佢應該會知我咩意思啦⋯」

邱茗然都估到張萱淇係中意呢個補習同學，張萱淇都覺得以邱茗然對佢嘅了解，應該會明白佢，但張萱淇諗緊要點樣開口

「你個friend有冇男朋友？」李雨揚好奇咁問張萱淇，佢等緊對方嘅request confirm

「冇⋯」張萱淇遲疑咁回答，本來想講個大話等李雨揚放棄，但點知佢開口就講咗真話，「但你唔係佢中意嗰type。」

「等佢confirm咗先啦～」李雨揚卻自信滿滿，「confirm咗咪知係唔係～」

「我知只要係女人都啱你⋯」張萱淇掛上虛偽嘅微笑，但佢嘅心係有啲擔心

「錯晒好唔好？我中意靚女。」李雨揚搖搖頭，輕嘆一口氣，「你太唔了解我啦⋯」

「就係了解所以知你係女就中意⋯」張萱淇講道





張萱淇時不時偷望向李雨揚，佢擔心轉頭就見到邱茗然confirm咗李雨揚嘅follow request，但其實佢又唔可以管咁多，畢竟佢又唔係李雨揚嘅邊個⋯

⋯

「點開口問茗然好呢⋯？直接問佢應該都唔緊要啦～」張萱淇仍然諗緊要點樣開口叫邱茗然唔好比李雨揚follow

張萱淇經過咗巴士站，就望到邱茗然過完馬路行到佢嘅前面

「佢又同殷書賢一齊呀⋯？」張萱淇留意到邱茗然同身邊嘅人講緊嘢，一望真啲就見到係殷書賢，「哎呀～」

張萱淇冇上前叫佢，一直行到去課室門口，張萱淇先拍邱茗然

「淇淇？你幾時喺我後面㗎？」邱茗然比張萱淇嚇咗一跳





「喺學校出面嗰陣已經喺你後面啦～」張萱淇豎起手指公比個like，然後又指一指E班所在嘅方向，「不過見你同人地一齊⋯所以冇叫你咋嘛～」

「諗咩呀你又⋯」邱茗然望住張萱淇臉上掛住嗰個笑容，佢就知張萱淇諗咩

「咁凡事冇絕對㗎嘛～將來嘅嘢，宜家好難講㗎喎～」張萱淇輕撞邱茗然一下

「咁將來係你諗嘅咁先再算啦⋯」邱茗然無奈笑道，對張萱淇講戀愛話題嘅話，邱茗然完全冇勝算可言

「日久都可以生情啦～冇咩冇可能～」張萱淇用指尖輕戳邱茗然嘅臉頰一下

「咁我都唔否認世上有日久生情呢回事～」邱茗然點頭示意同意，但眼見張萱淇一臉期待咁望住佢，邱茗然即刻又開口：「但係！我暫時冇呢個想法囉～」

「睇下點～聽住先啦～」張萱淇笑道

張萱淇望住邱茗然，大腦仲諗緊要點樣開口同佢講先啱，本來掛喺臉上嘅笑容緩緩消失





「果然都真係唔想比佢follow茗然⋯」張萱淇喺心入面嘆一口氣，佢太清楚李雨揚係咩人啦

「做咩呀？」邱茗然見張萱淇忽然間放空，伸手搖一搖佢

「冇呀⋯冇⋯」張萱淇頓時笑一笑然後搖頭

「淇淇係咪有嘢煩緊⋯？」邱茗然本來想再追問，但感覺就算自己再問落去張萱淇都唔會講，邱茗然就冇問任何嘢，「算啦⋯晏啲先再問啦⋯」

一直去到食飯嘅時候，張萱淇雖然冇開口講，但「有煩惱」呢三個字好似刻喺佢額頭一樣，好明顯

「你係唔係煩緊啲咩？」邱茗然直接問出口，佢都已經忍咗一個朝早，嚟到lunch佢一定要問清楚








IG Link: https://www.instagram.com/nd_cotttoncandy/?hl=zh-tw