【校園】想成為您的治癒: 66. 我沒錯

「今日Chem遲落堂呀⋯我想去食飯呀⋯」邱茗然將頭靠喺張萱淇嘅膊頭上，「陣間食咩好？」

「食老麥不如⋯」張萱淇一臉疲倦

「好呀⋯」邱茗然點點頭，佢都已經有啲攰，上西史堂做咗一題長essay之後手都就斷

「未落堂呀？」許洛霏同佢幾個朋友一齊上完堂番嚟課室

許洛霏自然咁行到邱茗然身旁就停低，邱茗然抬頭望一望許洛霏





「你琴晚最後睇到幾點？」許洛霏問邱茗然

「都係點幾咋～你睇到好夜呀？」邱茗然回答，「但佢真係好好睇，琴晚嗰集真係好正！超想睇下集！」

「我超想知男主嘅秘密係唔係下集會比女主發現⋯！」許洛霏用力點頭示意佢超級同意，「我估佢最後會係Happy Ending！」

「佢應該冇得Bad Ending啦掛！？」邱茗然輕皺起眉頭，「我係女主我都好感動，真係一直做secret angel默默守護住⋯！」

張萱淇喺隔離加入唔到話題，雖然張萱淇超中意煲劇，但咁啱邱茗然追緊嘅嗰套劇佢冇睇





「你地都有睇呀？」張萱淇拉一拉邱茗然嘅手肘問，「咩劇呀？」

「你話唔睇嗰套⋯」邱茗然回頭望向張萱淇

「你走寶啦淇淇⋯！」「你真係走寶啦⋯！」

正當張萱淇想講啲咩嘅時候，邱茗然同許洛霏異口同聲咁講道，張萱淇頓時一怔

「真係呀！」邱茗然同許洛霏興奮咁擊掌





「我中意男二多啲，佢cool得嚟對女二超有愛⋯！」邱茗然一臉心醉，「佢嘅愛喺細節入面⋯！」

「完全就係理想型！」許洛霏興奮附和起嚟

張萱淇喺一旁望住興奮討論劇情嘅兩人，佢忽然間覺得有啲孤單⋯

「咦，佢地落堂啦。」許洛霏眼睛嘅餘光見到課室入面嘅人起身執嘢

「好肚餓⋯終於可以去食飯⋯」邱茗然摸摸自己扁晒嘅肚

殷書賢同謝澤謙佢地幾個一齊行出課室，邱茗然佢地等課室入面嘅人出晒嚟先入到去

殷書賢將眼鏡除落嚟，用冷衫嘅衫袖抹一抹鏡片，佢喺邱茗然嘅面前行過時，兩人下意識對望咗一眼

「快啲番去擺嘢食飯！」「行啦行啦。」





謝澤謙佢地加快咗腳步，殷書賢同邱茗然對望咗一秒之後將視線收回，邱茗然嘅目光卻跟住佢再多行兩步

「哦～」行喺邱茗然身後嘅許洛霏目睹一切，佢細聲對邱茗然笑起嚟

「咩呀？」邱茗然估到佢諗緊咩，露出無言嘅笑容，「諗多咗啦你～」

「Okay～諗多咗～」許洛霏抿着唇打算藏起笑容同笑意，然後比咗個Okay手勢

張萱淇回頭望一望喺度笑嘅兩人，佢都冇留意啱啱發生咩事，只係喺感到好奇嘅同時，啱啱嘅孤獨感又大咗⋯

「茗然，行啦去食飯⋯！」張萱淇拉住邱茗然嘅手臂，將邱茗然拉到自己旁邊

「哎⋯！」邱茗然唔小心踩到張萱淇，「小心呀你⋯！行啦行啦！」





張萱淇拉住邱茗然好快咁行出課室，然後離開學校去食飯

「你做咩行咁快呀？你好肚餓喎真係～」邱茗然比張萱淇拉住行，行起嚟都好似跑咁樣

「嗯⋯」張萱淇慢慢咁將步速調整番去正常嘅步速，佢回頭朝邱茗然一笑，「好肚餓！你話食咩好？」

邱茗然同張萱淇對望着，感覺張萱淇有嘢想同佢講，但唔願意開口講

「你想呢？你係我好朋友，你想食咩我都實同你去㗎～」邱茗然跟上張萱淇嘅步伐行到佢嘅身旁

「哦～好呀～咁我地照舊啦～」張萱淇露出笑容點頭

⋯

喺學校做完功課番到屋企嘅邱茗然，一打開屋企門就見到媽媽喺屋企





「今日咁早喺度嘅⋯？」邱茗然有啲愕然，但係佢冇開口問

屋企嘅大門一閂埋，尷尬嘅氣氛一湧而出

最近兩母女一直都冇講嘢，喺屋企都係各自做自己嘢，其實邱茗然一早冇事，但佢擔心媽媽仲嬲同時佢都覺得自己冇錯

「我又冇錯⋯我都係講事實啫⋯」邱茗然安靜咁行番房閂埋房門，就好似咩都冇發生過一樣

「你番唔番嚟食」邱茗然send咗個message比邱旻顥

「喺地鐵站番緊嚟，做咩？」邱旻顥好快就回覆，「今晚爸唔番嚟食」

「我知呀⋯」邱茗然回覆道，「所以問你番唔番嚟食」





「番緊嚟」睇到邱茗然咁問嘅邱旻顥都估到原因

喺邱旻顥番到嚟屋企一陣之後就已經開飯，邱茗然喺房睇緊片完全聽唔到外面嘅聲

「睇下茗然出嚟未。」媽媽對行入嚟廚房幫手嘅邱旻顥講道

「媽你去叫佢啦。」邱旻顥小心翼翼咁捧住餸行出廳，「你都行到出嚟啦⋯」

邱旻顥講完就行番入廚房，媽媽望一望緊閉嘅房門，沉着氣行到房門前開門：「食飯啦。」

「哦⋯」邱茗然點點頭然後行出廳，坐低喺餐枱前

媽媽行入廚房，邱旻顥行出廚房；邱旻顥行到邱茗然隔離坐低，喺媽媽出嚟之前對邱茗然講：「今晚媽媽煮嘅都係你中意食嘅嘢。」

「嗯⋯」邱茗然唔知比咩反應好，只好微微點一下頭

邱茗然望住枱上嘅飯餸，都係自己中意食嘅嘢

「我係唔係應該要道歉⋯？」邱茗然又不禁思考反省起嚟，「父母有錯，作為子女係唔係應該要原諒⋯？」




IG Link: https://www.instagram.com/nd_cotttoncandy/?hl=zh-tw