【校園】想成為您的治癒: 42. 早上的筆記

「嘟！」邱茗然行上車拍卡，然後行入車廂

「今日咁多人嘅又會⋯」邱茗然喺心裏道

今日呢班車特別多人，邱茗然本來打算上去上層睇下有冇位，但眼見樓下都咁逼，就唔洗講樓上⋯

「算啦企下啦⋯」邱茗然輕嘆一口氣，然後喺人同人之間開咗細縫中逼到去放輪椅嘅位置企

人一多就逼，你嘅書包撞我嘅書包，一邊行仲要一邊講唔好意思





「嘟⋯！嘟⋯！嘟⋯！嘟⋯！嘟—」巴士閂門嘅提示聲響起，企喺門口嘅人都即刻逼入少少等車門可以閂埋

載滿人嘅巴士緩緩向前開出，邱茗然喺預感到自己會企唔穩嘅時候即刻捉住窗邊嘅扶手

企喺角落位嘅人比邱茗然忽然伸出嚟嘅手嚇咗一跳，緩緩抬頭望向邱茗然

「Sorry⋯」邱茗然連忙一臉唔好意思咁道歉，抬頭之際先見到原來係殷書賢，於是以一大清早吧第一份尷尬微笑道：「早晨～」

「早晨。」殷書賢平靜咁講完就望向窗外





「你都喺度呀⋯？」邱茗然微笑道，佢嘅手捉緊扶手，雙腳就嚟好似要扎馬一樣企穩喺地上

「我番學要搭車。」殷書賢將右邊嘅耳機除落嚟，仍然一臉平靜咁講

「聽緊雞精筆記？」邱茗然見到殷書賢又戴住耳邊就喺度估

「嗯。」殷書賢將手機放入褲袋

「第一次見識嘅人會用搭車時間聽筆記⋯」邱茗然企喺殷書賢面前，手捉住窗前嘅扶手，「通常都係一邊聽歌一邊恰眼瞓⋯」





「冇特別中意聽嘅歌因為。」殷書賢望向窗外，耳機裏仍然傳嚟筆記講解嘅聲音

「你聽開中文定英文？」邱茗然單純好奇咁問

「英文呀，筆記唔聽英文上堂點明⋯？」殷書賢眉頭一皺，擺出理所當然嘅表情

「呀⋯？」邱茗然一愣，回神之後係耷低頭忍住唔笑出聲

「我唔係講事實？笑點係咩⋯？」殷書賢一臉不解咁望住邱茗然，「我上堂係用英文，唔通要聽中文筆記？」

「我、我嘅意思係，歌聽開中文歌定英文歌！」邱茗然一震一震咁笑，雖然話忍住冇笑出聲

「都有聽⋯」殷書賢一臉尷尬，「我仲以為你問我筆記⋯」

「你真係成個腦都係得讀書。」邱茗然又笑道，「不過，你連番學都聽筆記，完全冇咩違和感。」





殷書賢只係為咗自己嘅成績著想，所以先會一直咁努力；有時放空嗰陣都會諗，到底咁努力係為咗啲咩？人嘅前半生都係成績嘅奴隸，後半生就帶住冇用嘅成績成為金錢嘅奴隸，社會就係咁現實，人嘅一生就係咁可笑又可悲

「你有冇補習？」邱茗然隨便咁搵個話題

「冇。」殷書賢搖搖頭

「冇補習仲可以考第一，大腦好強！」邱茗然感歎地講道，「我都只係考到喺中游，你記憶力一定好勁⋯！」

「一般，都唔係特別強，就係⋯正常嘅大腦。」殷書賢稍微思考一下，佢望住邱茗然，佢真係覺得呢個人嘅感歎點真係好低，呢啲正常事都可以令佢嘩一聲一樣，「而且我上堂有聽書，又有預習同溫書。」

「我都有溫書呀⋯！」邱茗然嚴肅地扁起嘴講道，「唔好講到我唔溫書咁！」

「溫書都要用啱方法先有用，死背冇咩用。」殷書賢露出淡淡嘅笑容望邱茗然一眼，佢好多時都會喺圖書館見到邱茗然，所以見過好多次背書嘅邱茗然，「理解咗自然唔洗特登死記都識。」





「呃⋯咁都要背呀⋯冇辦法理解嘅都係要背。」邱茗然窒咗一窒解釋道

「你講緊數學？」殷書賢聽到後忍唔住一笑，每次邱茗然問佢話解唔到唔識做嘅都係數學

「我真係唔識⋯！」邱茗然唔好意思咁笑起嚟，佢望向殷書賢開玩笑地講道： 「咁啱解題係你嘅興趣嘛，你唔介意我問你㗎可？」

「唔介意。」殷書賢回答

「你有嘢唔識問我呀～我識嘅話會幫你㗎～」邱茗然比咗個Okay手勢，露出一如既往嘅天真笑容

「哦，期待你可以教我啲咩。」殷書賢比邱茗然逗笑，邱茗然居然話要教自己，聽起嚟好好笑

「哼⋯唔好睇少我⋯！」邱茗然輕哼一聲撇開臉望出窗外

⋯





當時間去到5點嘅時候，做完嘢嘅邱茗然先一步離開圖書室去到天台

「哼～哼～哼哼～」邱茗然一蹦一跳地行到喺長櫈坐低，細聲咁哼着歌

「咔⋯呯！」天台嘅門被打開後傳嚟嚟閂門聲，邱茗然回頭望，見到殷書賢孭住書包上到嚟天台

「嗨～」邱茗然心情好好咁笑着對殷書賢又打招呼

「你今日心情好好。」殷書賢將書包放到長櫈上，然後自己行到矮牆前企

「嗯嗯！今日派咗上次份聆綜統測～」邱茗然高興地講道，「我考得高分過上次～上次我考38，今次考到42！」

「恭喜晒。」殷書賢露出淡淡嘅笑容講道





「你地班派咗未呀？」邱茗然問道，「你幾多分呀？」

「46。」殷書賢平靜地講道，對佢嚟講都係習以為常嘅事，佢只因為保持成績或進步咗而感覺到少少愉悅

「全級最高唔係46咩⋯？」邱茗然好快就諗起今日派卷嘅時候，Miss按慣例同佢地講全級最高分同平均分，「佢又係最高分⋯」

邱茗然起身行到殷書賢嘅身旁，兩個人之間相隔咗一段距離，邱茗然往下望，今日冇田徑隊訓練，只有空空嘅操場

「食唔食？」邱茗然從裙袋中拎咗包糖出嚟，自己先食咗一粒，然後遞比殷書賢

「咩嚟？」殷書賢問道，佢有見過但冇食過

「糖。」邱茗然講道，拎住糖嘅手向上微微提一下，「食唔食？」

「多謝。」殷書賢拎咗一粒放入口，邱茗然卻一臉期待咁盯着殷書賢

過咗一秒之後，殷書賢皺起眉頭，下意識就單起一隻眼，手提起掐住兩邊嘅臉頰




IG Link: https://www.instagram.com/nd_cotttoncandy/?hl=zh-tw