【校園】想成為您的治癒: 34. 名字是⋯
殷書賢望住邱茗然嘅舉動，邱茗然蹲喺簿櫃前將E班嘅文言簿放番喺櫃中，然後拎起自己班嘅簿
「任務完成！」邱茗然喺心裏興奮地講道，一下子就抬起頭，「呯！」
邱茗然嘅後腦勺撞上簿櫃頂，大家嘅視線頓時聚集喺佢身上
「嘶⋯」謝澤謙目睹呢一幕，忍唔住喺心入面比反應
「原來係個天然呆⋯？」張思群輕皺着眉頭，喺心裏道
「呀⋯！尷尬死啦真係！」邱茗然喺心裏大聲嗌出嚟，然後拎起疊簿就即刻朝住課室門口行去，「唔該！」
殷書賢望住邱茗然嘅小狼狽，佢只覺得邱茗然有啲天然呆又有啲好笑
喺邱茗然離開咗E班嘅課室之後，殷書賢就繼續專心上堂，就好似啱啱嘅事冇發生過一樣
「頭好痛⋯！」邱茗然喺行番課室嘅路程上摸着自己嘅後腦勺，「尷尬死啦真係！」
邱茗然整理好自己嘅情緒先踏入課室，感覺啱啱尷尬到面都紅晒，個人都好熱，一入課室就即刻派簿
「呼⋯」邱茗然派完簿番到埋位就即刻拎先水樽飲啖水，「冇事冇事⋯」
小息嘅時候，邱茗然離開課室去廁所，連經過E班嘅時候都好尷尬，一行到E班嘅課室門口時，邱茗然就自動加快步速向前行
「啱啱過嚟嗰個女仔係咪嗰日同你一齊嗰個？」一放小息，謝澤謙嘅好奇心就即刻出嚟
「嗯。」殷書賢嘅手喺功課紙上寫緊題目答案，視線偶爾望向放喺左邊嘅中文筆記
「佢叫咩名呀？好天然呆。」趙遠寧笑着拍一拍殷書賢嘅膊頭問
「唔知⋯」殷書賢稍微諗一諗，佢宜家先發現佢原來唔知對方叫咩名
「吓？你同人地又講嘢又影相咁，但你連人地叫咩名都唔知？」趙遠寧有一刻懷疑自己係唔係聽錯，殷書賢居然連人地個名都唔知，「你冇留意㗎咩？」
「冇。」殷書賢平靜地回答，心思仍然放喺功課上，沉默咗一秒之後佢望向趙遠寧，「你想識人嘅咪自己去問佢叫咩名。」
「你同佢好似好熟，但你連人地個名都唔知，唔覺唔好意思？」趙遠寧搖搖頭無奈道，「你真係都唔留意下⋯」
「冇特別留意⋯」殷書賢聳肩
「得閒幫我問下，唔該兄弟！」趙遠寧喺企起身後伸手拍兩拍殷書賢嘅膊頭
喺趙遠寧同張思群去咗買嘢食之後，呢個話題亦隨之而結束，與此同時，殷書賢亦開始思考起嚟
「冇留意到名都唔出奇，邊個會特登去睇人地叫咩名⋯？」殷書賢心諗，因為趙遠寧咁樣講一講，所以佢都忍唔住諗呢個問題，「雖然話Chem堂坐佢個位，但我又唔會特登去掀佢嘅嘢，唔知有幾出奇？」
殷書賢對於學習以外嘅嘢，可以話冇咩太大興趣，就算係男仔成日閒暇活動—打機，佢都好少打，最多都係一星期兩日會打陣
「上次佢好似拎住數簿問我嘢，不過我真係冇留意佢叫咩名⋯」殷書賢又喺心入面道，「算啦⋯同我冇咩關係⋯」
⋯
放學後嘅圖書館
邱茗然嘅指尖快速地落喺cal機嘅制上，邱茗然望一眼cal機最後顯示嘅答案，又望一望數學書後面寫嘅答案
「唔⋯點解唔啱嘅？」邱茗然扁起嘴細聲地道，然後又重新計一次，「呢度唔係咁樣計咩⋯？我計到無盡小數嘅⋯」
邱茗然無奈地又重計一次，但計嚟計去總有啲位唔啱，好似數學存心同佢作對咁，計極都係有小數點又或者係直接彈一個error出嚟
「吓～點解嘅～」邱茗然一臉困惑
佢真係唔明白數學點解要學埋呢啲，學加減乘除唔好咩？呢啲考完有咩用？去街市會用到咩？去食飯會用到咩？
買餸要計咗體積先定係要計一元二次方程？定係打波射波前要計一計個拋物線？
「真係完全唔知做咩要學⋯」邱茗然獨自抱怨，「但問題係我宜家學咗都唔識⋯」
邱茗然又再重睇一次題目然後又再計一次，都係唔啱
殷書賢將眼鏡除落嚟抹一抹鏡片，此時一張摺成方型嘅紙仔隨住「啪」一聲從旁邊飛到佢嘅筆記上
「咩事⋯」殷書賢無言地停低手上抹眼鏡嘅動作，戴番好眼鏡之後拎起眼前嘅紙仔打開
「Help！！！」紙上寫住一個簡單直接嘅單字
殷書賢默默地望向邱茗然，邱茗然拎起數學書，用原子筆嘅筆尖指住佢唔識計嘅題目
殷書賢指一指數學書然後灘開手，邱茗然連忙推開櫈拎住數學書同堂課簿行到殷書賢身旁
「我會唔會阻住你⋯？」邱茗然有啲明知故問，雖然口係咁問，但手就將書同堂課放低喺枱上
「唔會。」殷書賢將數學書拉到自己面前，咁啱佢就想做啲可以令大腦轉下彎嘅題目，做數學題就再好不過
「計極都計唔啱⋯」邱茗然拉開櫈坐低，然後將堂課簿遞比殷書賢，「小小咁請教一下⋯」
殷書賢睇咗一次然後就拎起筆圈咗錯嘅位置，又將題目裏嘅重點圈起嚟分part講解
「你計咗呢度先⋯」「嗯，計到，啱？」
「啱啦，然後搵呢個，咁計落去啱㗎啦，自己計埋佢。」「哦。」
喺殷書賢耐心且詳細嘅講解之後，邱茗然好快就明白然後就計到答案出嚟
「哦～計到啦！」邱茗然高興地講道，「你都幾識教人～」
「都係數學一題。」殷書賢將自己面前嘅書掀到下一頁，喺邱茗然做緊題目嘅時候佢都已經溫完一頁
IG Link: https://www.instagram.com/nd_cotttoncandy/?hl=zh-tw