【校園】想成為您的治癒: 32. 初戀

「有冇安史之亂咁亂呀？」張萱淇笑問，佢只係隨口講出記得有個亂字嘅嘢

「有呀！亂過佢添啦～基本上食佢地嘅花生都可以食一日。」邱茗然因為張萱淇無厘頭嘅一句笑出嚟，「呢個同A拍拖，分咗手之後，同一個圈嘅另一個女又同A拍拖⋯佢地好似互相交換咁⋯」

「聽到都覺得攰⋯」張萱淇搖搖頭，「咁樣真係冇問題咩？佢地又唔介意先好嘢！」

總之許洛霏本來嘅圈子就係一個「貴圈真亂」嘅狀態，大家都知佢地係麻煩人，平日冇必要都唔會同佢地行得咁埋咁熟，但許洛霏都算係正常嘅一個

「今晚你想一齊食家你會番屋企食呀？」邱茗然問道，「我未同我媽講我番唔番去食⋯」





「今晚我番去食～」張萱淇豎起大拇指比咗個like，「我媽話今日煎雞排，所以我要番去食～」

煎雞排作為張萱淇最中意食嘅餸，媽媽難得今晚話煮比佢食，佢當然要番去食啦！

「哦⋯」邱茗然冷淡地回應，安靜咗兩秒後，邱茗然忽然諗到另一樣嘢，望向張萱淇：「你確定唔係因為你中意嗰個演員套新劇要上，你怕番唔切去睇？」

「我似啲咁嘅人咩？」張萱淇一聽到關鍵字，嘴角都不自覺微微上揚，但佢好快就收起笑容，一本正經咁咳兩聲，「我番去食飯係免得我媽覺得我成日唔番去食～」

「係咩？以我所知你除咗補習嗰兩、三日，日日都喺屋企食飯仲要煲劇喎～」





「我覺得你將我諗得太差囉⋯」張萱淇假裝失望咁搖頭，「我唔係啲會為咗煲劇而放棄你嘅人嚟！」

「哦好呀，希望你以後唔好重色輕友！」邱茗然瞄一眼張萱淇嘅手機後微笑道，「人地send咁多個message比你都唔睇呀？」

張萱淇嘅手機螢幕上有嚟自signal、WhatsApp同IG嘅通知，張萱淇解鎖咗手機，果然係李雨揚嘅message

「仲未嬲完人地呀？」邱茗然偷笑，佢留意住張萱淇嘅表情

「冇嬲囉⋯只係唔想理佢⋯」張萱淇無奈地嘆氣，拎起手上嘅朱古力奶昔飲咗一啖，「佢大把女可以搵啦⋯」





「哦～」邱茗然緩緩點頭，又瞄一眼張萱淇嘅手機螢幕，「但佢仲一直send緊嘢比你⋯」

「唔好理佢！」張萱淇堅決唔覆李雨揚嘅message，直接收起手機無視佢

「真係唔理佢呀？」邱茗然特登又問張萱淇一次，邊個叫佢咁唔老實，明明想理但又唔理，「你就咁狠心呀？」

「冇咩狠唔狠心，你唔好咁樣嘅懷疑表情望住我⋯」張萱淇指住邱茗然，邱茗然瞄起雙眼一臉不信任，「我唔係中意佢亦冇中意佢⋯」

「哦哦好呀好呀～」邱茗然隨便就敷衍咗佢，下一秒就好close咁挽任張萱淇嘅手臂，「你個同學咩樣㗎？有冇相睇下？」

「冇呀⋯佢最近del晒相⋯我地出去都好少影相，影都影唔到正面⋯」張萱淇搖搖頭，李雨揚有每隔一段日子就刪po嘅習慣，就算有都係啲冇正面嘅相

「呿⋯枉我仲想睇下佢係啲咩天姿國色可以令你呢個顏控咁著迷添⋯」邱茗然扁起嘴扮自己好失望，仲不忘嘆一口氣，「唉～」

「放心放心呀～我以後識咗男朋友一定同你講～」張萱淇嘅手放喺邱茗然嘅頭頂上，因為邱茗然比佢矮，佢好自然就會咁樣摸摸頭





邱茗然同張萱淇對望，兩人默契地對望然後笑起嚟，大家都熟對方嘅性格，唔洗多講都了解對方嘅想法

⋯

邱茗然行喺番屋企嘅路上，因為張萱淇番屋企先食飯，所以邱茗然都只好番屋企食；喺通往出口嘅路上，邱茗然見到有兩個好熟面口嘅人迎面行嚟

「茗然！」潘景諭大步向邱茗然行嚟，喺佢身旁嘅係沈心怡

「嗨～」邱茗然笑着打招呼

「補完習呀？」潘景諭自然地問道，「番屋企食飯？」

「唔係，同friend去完街，番去食飯～」邱茗然一個乖巧嘅模樣，「你地唔洗番學呀？」





「今日day off，唔洗番去上堂。」潘景諭講道，「好啦，你快啲番去食飯啦，DSE加油呀！」

「茗然DSE加油！」沈心怡都為邱茗然打氣

「收到！」邱茗然做出敬禮嘅動作，「我一定會加油㗎！唔會嘥咗哥哥留比我嘅筆記！」

「加油啦，拜拜。」潘景諭對邱茗然講道

邱茗然點點頭後從潘景諭嘅身邊行過，行咗幾步之後又慢慢咗將腳步一步一步咁放慢，然後回頭望

「真係好⋯」望到佢地嘅甜蜜，邱茗然喺心入面不禁有少少嘅羨慕

潘景諭嘅身影一直都刻喺邱茗然嘅心中，佢一直都係邱茗然心入面嘅初戀⋯

喺佢身上著住畢業袍嘅一日，佢鼓起勇氣對佢講出佢想要講嘅說話， 就算知道冇可能，佢都選擇講出口⋯





「我想話你知我中意你⋯！」「吓⋯？」

「真係㗎！但我知你有女朋友啦⋯我知你當我係妹妹一樣，我都知道⋯所以我⋯只係想話你知⋯」

「諭哥哥你咩都唔洗講⋯！我都知道！我冇其他想法，只係決定喺你畢業嘅時候要講比你知⋯」

「我知你有中意嘅人，亦知道你有女朋友，你同心怡姐姐好襯嘛～」

當日著住畢業袍嘅佢聽住佢對自己嘅表白，佢係愕然亦係意外，但佢同佢始終唔可能⋯

喺嗰一晚番到屋企，邱旻顥從潘景諭口中得知呢件事，同大家食完飯番到去見到邱茗然嘅時候，總覺得邱茗然係唔開心

「我知道啦，佢同咗我講⋯唔好唔開心好唔好？」邱旻顥閂上房門免得爸媽聽到，亦係為咗邱茗然嘅小女孩面子





「嗯⋯」邱茗然點點頭，本來收起嘅感覺又因為哥哥嘅一句關心而湧出嚟，連同眼淚一齊從眼眶滲出

「咁以後，會再搵到個好過佢㗎嘛⋯」邱旻顥蹲低喺櫈前，佢嘅溫柔，係因為喺佢嘅家庭中有妹妹所以刻喺骨裏，「大把人追，唔洗要潘景諭。」

「嗯⋯！」邱茗然點頭，因為邱旻顥一句搞到佢又喊又笑咁

「點呀？係唔係要食雪糕？我出去攞比你。」「嗯！」

邱旻顥作為哥哥，喺邱茗然有咩困難嘅時候都會幫佢；潘景諭作為初戀，邱茗然亦唔會將佢徹底忘記，就算唔再係嗰種中意，都唔會忘記

「唉～算啦～」邱茗然收回目光，帶住輕快嘅小跳步向前行，「哥哥講得啱呀～以後要搵個好過諭哥哥嘅～」




IG Link: https://www.instagram.com/nd_cotttoncandy/?hl=zh-tw