【校園】想成為您的治癒: 26. 口不對心

「嗨～」邱茗然笑道，佢心中嘅小算盤打得愈嚟愈快，「哥哥你番屋企呀？」

「比你嚇死⋯仲以為邊個打劫⋯」邱旻賢嘅心都未平靜落嚟，輕拍心口兩下，啱啱差啲就嚇到連手機都跌埋落地

「嘻嘻⋯」邱茗然嘻嘻笑，趁未番到屋企，邱茗然即刻提議：「哥哥你想唔想食薯片，不過屋企好似冇啦⋯」

「唔想，太熱氣。」邱旻顥估到邱茗然想講咩，即刻就拒絕咗先

「但我想食，你要唔要陪我去買？」邱茗然問道，「我一個人拎唔晒。」





「你自己比錢，唔好叫我比。」邱旻顥先聲明，佢真係怕咗佢個妹

「Okay～Let’s go～」邱茗然都唔知有冇聽到，拉住邱旻顥就朝住超級市場嘅方向跑去

邱茗然先拎晒自己想食嗰啲零食放到購物籃，薯片同糖佢見到想食就拎，但當然佢冇比錢嘅打算

「哥哥你想食邊隻呀？」邱茗然拎住兩筒唔同口味嘅薯片問邱旻顥，「你想食忌廉洋蔥定係燒烤呀？」

「左邊。」邱旻顥指住綠色嘅一筒





「好啦～」邱茗然將綠色嗰筒薯片放入籃

去到比錢嘅時候，邱茗然抬頭望向邱旻顥，兄妹二人對望嘅時候，邱茗然眨一眨眼，然後笑起嚟

「哥哥你比住先呀～」邱茗然笑道

「都估到你啦⋯」邱旻顥無奈地攞出銀包，佢都估到邱茗然叫得佢一齊嚟實冇好嘢

「耶～同你一齊買嘢食真係好呀～」邱茗然見奸計得逞，連忙拉住邱旻顥撒個嬌，「多謝哥哥～」





「得啦得啦⋯我怕咗你呀⋯」邱旻顥無言地望邱茗然一眼，「你根本係嚟打劫⋯」

「哥哥你有番part time有錢呀～我冇嘛～」邱茗然講道

「得啦得啦⋯啲嘢食你攞番去先，我攞嘢比李逸彤。」邱旻顥將裝滿零食嘅膠袋遞比邱茗然

「好呀～」邱茗然點點頭，滿心歡喜地拎住零食番屋企

另一邊廂，殷書賢少有咁放學即刻番屋企，番到屋企換咗件衫就灘喺床上面打算瞓陣

「4點半⋯較定鬧鐘⋯」殷書賢閂上房門拎起手機較鬧鐘，將鬧鐘嘅時間較喺6點正，然後將喺屋企著嘅薄外套搭喺櫈上

喺屋企冇人嘅時候，殷書賢先將外套除落嚟，屋企人一番嚟佢就會著住外套，所以先要連瞓晏覺都要較鬧鐘，喺屋企人番嚟前起身

「終於可以瞓陣⋯」殷書賢側身瞓喺床上合起雙眼，下意識拉高張被遮住露出嚟嘅左手，「眼瞓死啦今日⋯」





⋯

中午lunch time

「點呀？今日sports day有冇拎到獎呀？」張萱淇拎住手機send message比李雨揚，今日係李雨揚學校嘅sports day

「跟住呢佢話⋯」本來興奮咁講緊嘢嘅邱茗然發現張萱淇好似冇聽緊自己講嘢，連忙扁起嘴，「淇淇呀⋯你有冇聽我講嘢㗎⋯」

「呀？呃⋯」張萱淇回神，抬頭望住邱茗然尷尬咁笑一笑，「sorry～」

「又係嗰個男仔呀？」邱茗然望住張萱淇甜甜嘅笑容都知道對方係邊個，「人地唔係sports day咩？」

「佢一直都冇覆我機⋯」張萱淇無奈咁聳聳肩同時細聲地輕嘆一口氣





「都話你係中意人㗎啦又唔認⋯」邱茗然帶着微微上揚嘅嘴角搖搖頭，卷起一啖小小嘅意粉放到口中，「你想對我講大話呀？係唔係太睇小我啦～」

「講呢啲⋯我唔係中意佢，只係我地⋯」張萱淇邊講邊㩒開IG，見到冇覆佢嘅李雨揚po咗story

「咩呀？」眼見張萱淇臉上嘅微容逐漸消失，邱茗然嘅眉頭輕輕一皺，「做咩咁嘅表情？」

張萱淇將已經過咗去嘅李雨揚嘅story再播一次，李雨揚真係拎到獎牌，story中嘅佢拎住獎牌同一個女仔合照，story上亦寫住caption：「呿，一個獎牌啫，送比你咪送比你！我再贏多個！！！」

「淇淇⋯？」邱茗然望住張萱淇失望又有啲難過嘅表情，小心翼翼咁叫佢一聲

「嗯？」張萱淇目光離開手機，迅速望向邱茗然，望住張萱淇嘅邱茗然擔心又疑惑，「唉～佢真係中央空調嚟～」

張萱淇笑着講道，佢本來都冇將李雨揚嘅說話放喺心上，但見到李雨揚將獎牌送咗比另一個女仔，張萱淇覺得有啲好笑

「就係咁。」張萱淇大概咁講咗上次李雨揚同佢講嘅事，然後假裝自己冇在意，輕鬆地笑着聳肩，「佢就係中央空調一個。」





拎喺手上嘅手機一震，上方彈出一個message，係李雨揚嘅回覆，張萱淇見到彈出嚟嘅通知嗰陣，大腦諗到嘅係啱啱李雨揚嘅story

「中央空調⋯！」張萱淇喺心入面略帶怒意講道，然後將手機嘅螢幕鎖上，「啪！」一聲將手機放到枱上

「淇淇嬲啦⋯？」邱茗然唔敢出聲講嘢，「都話佢係中意人，又唔認但又自己嬲⋯唉～」

邱茗然聽住張萱淇講補習嘅時候嘅事，關於嗰個男仔嘅事⋯望住張萱淇明明在意但又要扮唔在意嘅樣，佢諗起當初知道潘景諭拍拖嘅時候嘅感覺

見到佢po咗story，但㩒入去之後見到嘅係佢同女朋友一齊嘅時候嘅種種甜蜜，佢都只可以一笑然後滑走睇下一個人嘅story

「心怡姐姐眼中嘅諭哥哥，同我眼中嘅諭哥哥⋯應該係兩個好唔同嘅人⋯」邱茗然喺心入面默默地講道，雖然已經唔再中意，但當初嘅感覺，佢仍然記得

沈心怡眼中嘅潘景諭，係嗰個為咗追佢可以放低面子、可以一直主動、會借意撒嬌嘅人；邱茗然眼中嘅潘景諭，係嗰個顏值高、好charm、好溫柔、閃閃發光一樣嘅人





「可能喺呢度，就注定諭哥哥中意嘅人只會係心怡姐姐⋯」邱茗然悄悄一笑，「希望我以後遇到嘅人都會淨係特別咁對我就好～」




IG Link: https://www.instagram.com/nd_cotttoncandy/?hl=zh-tw