【校園】想成為您的治癒: 12. 不信任

「補習同學咋！意咩中人呀⋯」張萱淇即刻否認，收起手機唔再覆李雨揚，「之前冇同你提過咩？」

「有呀～你提嚟提去都係嗰個㗎啦～嗰個「恃住自己生得唔錯就周圍溝女，次次借咗你支筆又唔還，都唔知佢係嚟溝女定嚟補習」嗰個呀嘛～我知呀～」邱茗然洗手同時抬頭望鏡，從鏡中留意張萱淇嘅表情

「叻啦叻啦！最叻係你啦！」張萱淇先反個白眼再讚邱茗然，「不愧係我嘅好朋友～」

「當然啦～我不嬲都好了解你㗎啦～」邱茗然自豪地抬起下巴，雙手喺洗手盆上甩兩下，將手上嘅水珠都甩走，「行啦～番去啦～」

「搞掂⋯」張思群合上自己嘅A簿同殷書賢嘅A簿，打算將A簿還番比殷書賢，先啱啱起身就發現殷書賢唔喺位，「人呢⋯？」





邱茗然同張萱淇行出女廁，朝課室嘅方向行咗兩、三步，邱茗然仲好奇緊張萱淇口中講嘅補習同學

「有冇相睇下？」邱茗然挽住張萱淇嘅手臂好奇地問道，「睇下睇下～」

「轉頭食lunch嘅時候比你睇～」張萱淇笑道，「陣間陣間～」

邱茗然嘅餘光見到迎面而嚟嘅殷書賢，兩個人對望咗一眼，張萱淇見到邱茗然望殷書賢，佢下意識都好奇咁望向殷書賢

「望我做咩⋯？」殷書賢見到兩個女仔都望住佢，心裏陣陣疑惑感覺飄過，忽然有種不安感冒出，「佢唔係講咗比人知⋯掛⋯」





三人擦身而過，張萱淇伸手喺伸茗然嘅面前晃兩下，邱茗然望向張萱淇，張萱淇臉上露出一知意味深長嘅笑容

「得啦你唔好講嘢⋯我知你想講咩，唔好諗太多。」邱茗然搖搖頭，以佢對張萱淇嘅了解，佢都已經知道張萱淇接住落嚟想講啲咩

「哦好囉⋯」張萱淇因為比人睇穿咗，只好扁起嘴將想講嘅嘢吞番落肚，「跟住咩堂呀？係唔係X1然後英文？」

「呀⋯西史堂呀⋯」邱茗然聽到之後無奈地講道，「最近嘅西史堂都好悶⋯聽書都聽到我想瞓⋯」

「是旦啦～我上完西史就上英文～」張萱淇行喺前面先一步行入課室，邱茗然前腳啱啱踏入課室，上堂嘅鐘聲就響起，「打鐘啦⋯拎埋書就行啦。」





殷書賢坐喺邱茗然嘅座位上Chem堂，喺等緊老師嚟課室前，殷書賢從左邊嘅褲袋拎出眼鏡戴上

「佢會唔會真係同其他人講咗⋯？比人知嘅話點算⋯」殷書賢嘅大腦淨係諗到呢個問題，諗起啱啱張萱淇望佢，佢就有啲擔心邱茗然會唔會同咗張萱淇講，「死啦⋯上次比佢見到真係失策⋯搞到我宜家食唔安坐唔落咁⋯」

殷書賢垂低頭、左手托着額，右手插喺右邊嘅褲袋，摸到喺褲袋嘅鎅刀後將手抽番出嚟；殷書賢拎出比佢對摺放咗喺筆袋嘅memo紙，上面仲寫住佢之前同邱茗然嘅對話

「問唔問佢⋯？」殷書賢望住張memo紙，心入面有啲猶疑，「會唔會好似好唐突⋯但係佢講咗嘅話，就好容易愈嚟愈多人知⋯比人知嘅話，好容易有老師會知⋯」

諗到比人知道之殷會帶嚟嘅麻煩，殷書賢就更擔心，佢望住手上嘅memo紙思考⋯

「叮噹叮噹⋯叮噹叮噹～」X1堂啱啱完結，殷書賢將眼鏡除落嚟，拎埋今堂派番嚟嘅筆記一齊番課室

「今日冇功課係唔係？」喺門口等埋殷書賢同張思群嘅謝澤謙喺兩人行到門口時問道，「好難得今日嘅chem堂冇功課。」

「LS堂呀，你行去邊呀？」趙遠寧用書輕輕拍謝澤謙嘅手臂，「課室上呀⋯」





「係喎，行啦行啦。」謝澤謙一笑，然後轉身跟趙遠寧行番去課室嗰邊

邱茗然同張萱淇行番嚟，行入C班嘅課室，邱茗然行番埋位坐低，將西史書先放入櫃桶放喺最底，然後拎出放喺最上面嘅英文筆記

「嗯⋯？」邱茗然將筆記一拎出嚟，就見到貼喺簿面上對摺咗嘅memo紙，「殷書賢⋯？」

邱茗然連忙將memo紙從簿面迅速撕落嚟，望一望周圍後先將memo紙打開，喺memo紙嘅中下方寫住一句：「你真係冇同人講？」

「講緊咩⋯」邱茗然本來都唔知殷書賢講緊啲咩，但仔細諗一諗最近見到殷書賢嘅時候都發生咗咩事，邱茗然就知道佢呢句所指，「我似啲咁口疏嘅人咩⋯」

邱茗然抬頭望一眼黑板，見到晏就有一堂X2，佢拎喺筆喺memo紙上寫嘢

晏就番嚟上X2堂嘅時候，邱茗然行入E班嘅課室，同要去其他課室上Bio堂嘅殷書賢擦肩而過，兩人對望一眼，又若無其事咁行開





「我先冇咁得閒周圍同人講⋯！」坐喺殷書賢座位嘅邱茗然將memo紙按住本來嘅摺痕對摺起嚟，然後放喺殷書賢嘅櫃桶裏，順手寫道： 「你sports day報咗咩？」

喺X2堂完結之後，邱茗然拎住自己嘅書、筆記同筆袋番課室上下一堂；邱茗然番到課室將啲嘢放番入櫃桶

⋯

「今日有功課，聽日又有測驗⋯茗然你係唔係留低呀？」張萱淇喺等埋邱茗然嘅時候問道

「嗯⋯係呀⋯做埋先番去⋯」邱茗然一個攰樣點點頭，「唉～冇計啦～番到屋企就唔想溫書⋯」

「咁好啦～我都要快啲番去溫書先得！」張萱淇拍一下手，佢已經plan好佢今日嘅行程，「做完功課就溫書，咁今晚就哥以睇埋剩低兩集啦～」

「你真係劇迷⋯咩劇都睇。」邱茗然無奈地閂上書包拉鍊，孭起書包，「你真係會睇到上腦。」

「冇計啦～現實中冇嘅嘢，就要睇下啲電視劇睇下漫畫孭說嚟滿足下～」張萱淇輕嘆一口氣





「有冇咁慘呀？你有我呢個好朋友仲唔夠咩？」邱茗然輕皺起眉頭，雙手叉住腰扮嬲

「夠～當然夠！」張萱淇用力地點頭，雙手搭住邱茗然嘅膊頭，「但友情愛情兩樣都有就最好啦～」




IG Link: https://www.instagram.com/nd_cotttoncandy/?hl=zh-tw