【校園】想成為您的治癒: 05. 後續

喺上堂嘅鐘聲響起後，老師嚟到課室嘅第一件事係派默書紙比大家；當表示可以開始時，張萱淇即刻拎起筆，急不及待要寫低佢仲記得嘅嘢；寫晒記得嘅嘢之後，張萱淇就開始苦惱起嚟

「死啦⋯「吾師道也」之後係咩呀⋯」張萱淇一臉苦惱地托住額，筆尖一直戳默書紙嘅角落，「夫庸知⋯之⋯之後係咩呀⋯？」

「夠鐘，將默書紙喺後面傳上嚟啦！」抬頭望住時鐘嘅老師講道

「夫庸知之後係咩呀⋯」張萱淇喺默書紙一離開枱面，即刻拎中文書出嚟睇，欲哭無淚嘅表情掛喺臉上

邱茗然回頭同張萱淇對望，張萱淇合起雙眼扁起嘴，邱茗然無奈苦笑；邱茗然打開中文書，睇下自己背得啱唔啱





喺中文堂完結前兩分鐘，老師不忘要派功課比佢地做

「今日有份文言練習比你地番去做，短文嚟，聽日交啦～」老師以輕鬆嘅語氣講道，然後拎起白色粉筆，行到寫功課嘅欄位寫下佢派嘅作業

粉筆敲喺黑板上嘅聲音清脆利落，傳眼間又有一份功課要做，邱茗然將功課放好喺功課file入面

隨住落堂嘅鐘聲響起，中文堂亦暫時到呢啲，接住落嚟係大家嘅選修堂；邱茗然拎埋西史書起身離開座位，同張萱淇一齊上去上面嘅課室上堂

殷書賢拎住Chem書行到座位坐低，從褲袋拎出一副黑色幼框眼鏡出嚟戴好，托一托眼鏡；今日化學堂嘅頭半堂係小測時間，老師嚟到後先派小測卷





「第一頁向下傳封後面。」老師吩咐道，喺確保大家都拎到卷後就開始計時

殷書賢掀開卷，將題目都大概望一眼後先開始做題，每一題落筆寫嘅時候幾乎冇猶疑過，一落筆就係寫低答案；喺佢嘅雙眼中唔會睇到一絲唔肯定，小測係測試大家對課題嘅了解程度，愈了解課題，題目就顯得愈簡單

課室裏特別安靜，喺大家都專心小測嘅時候，課室只剩下三葉吊扇轉動所發出嘅吱吱聲，仲有原子筆同紙面磨擦發出嘅沙沙聲

有人喺小測嘅時候特別苦惱，溫咗書但一定會有唔識、唔肯定答案嘅題目，但殷書賢答題嘅時候，從手郁動嘅幅度可以得知佢流暢而且有自信咁寫下答案

⋯





「最後嗰題我都唔識做⋯」謝澤謙講道，然後用手肘撞咗殷書賢一下，「你識唔識做？」

「最尾嗰題難呀，我唔肯定答案啱唔啱。」殷書賢搖搖頭，將眼鏡除落嚟

「陣間食飯食咩呀？」張思群行上前拉開話題，前面兩人講緊小測，佢就上前問食飯食咩

「都係嗰間㗎啫。」謝澤謙講道

三個男仔行出C班嘅課室番到自己E班嘅課室，放好嘢之後就出去食飯；殷書賢喺走廊經過，行到樓梯口時，邱茗然同張萱淇從樓上行落嚟

殷書賢冇見到邱茗然，但邱茗然有見到殷書賢，張萱淇都望到，但邱茗然又冇咩想法，攬住西史書直接番課室；張萱淇將書放番入櫃桶，袋好銀包朝邱茗然嘅座位行去

「茗然你搞掂未呀？」張萱淇嘅聲線裏夾雜少少嘅愉悅，可能因為lunchtime嘅到來嘅關係，但行到去邱茗然嘅座位時，見到邱茗然拎住$4.5，「做咩拎住$4.5？你要買嘢飲呀？我地出去食飯啦喎⋯」

「冇嘢，行啦～」邱茗然將$4.5袋入裙後同張萱淇一齊出去食飯





⋯

喺等緊點嘅餐嚟嘅時候，張萱淇偶然望出去，見到殷書賢佢地幾個喺餐廳外經過，即刻令佢嘅好奇心冒出嚟

「茗然茗然！」張萱淇嘅上身貼近枱邊前傾，邱茗然抬頭望佢，見張萱淇雙眼就嚟閃出光咁，「點呀點呀！有冇下文呀？殷書賢殷書賢⋯！」

「下文喺呢度。」邱茗然將$4.5喺裙袋拎出嚟放喺枱上，「我請佢飲嘢，佢還番錢比我⋯」

「吓～」張萱淇有啲失望，但望一眼邱茗然後又笑問：「佢會唔會係因為同你唔熟，唔好意思接受咋～」

「咁我要點⋯唔通叫佢同我熟呀？」邱茗然無奈地問道，本來靠住櫈背坐嘅佢坐好起嚟，上身稍微前傾、雙手㩒住喺櫈邊，「我又冇咩所謂嘅，宜家都知佢係邊個啦～都多謝咗佢啦～」

「仲以為有花生食下添⋯」張萱淇失望地靠回櫈背坐，「學霸男主同可愛女主嘅感情線～」





「哈哈⋯」邱茗然敷衍地笑兩聲，然後默默地搖頭，「睇太多電視劇啦你⋯上晒腦啦！」

「講開電視劇，我今日唔洗補習～等我番去煲多兩集再溫書先～」張萱淇高興地講道，佢洗最大興趣就係煲劇，每日煲都唔會厭，永遠有新劇煲，「我打算番去煲陣劇先再溫書～個男主角太靚仔啦！」

「唔好幻想力咁豐富啦⋯現實中係唔會有又高大又靚仔又聰明又愛你愛到死嘅男仔⋯」邱茗然深感無奈，佢次次見到張萱淇，張萱淇都要同佢講一次

「我讀好書考上大學之後一定要識個男朋友！」張萱淇堅定地講道，堅定到邱茗然都唔知講咩答先好，「你唔想識男朋友咩？」

「就算想都唔係呢個時候囉！」邱茗然望住張萱淇，「考DSE啦小姐！仲拍拖！我考唔到大學嘅話，唔好話拍拖，我媽一掌拍死我都似！」

「你唔想拍拖咩？哦～你仲對嗰個師兄⋯」「唔係！你諗多咗啦！」

張萱淇都未講完，邱茗然即刻就打斷佢嘅說話；張萱淇抿着唇但嘴角都係不禁上揚，佢望住邱茗然嘅反應，只覺得邱茗然仍然為當時嘅事而傷心

「唔洗傷心嘛～」張萱淇輕輕地用手臂撞邱茗然一下，「初戀本來就係難忘，我明嘅！」





邱茗然望張萱淇一眼，佢都唔想再解釋；其實當初嘅事邱茗然都已經冇放喺心中，嗰份情竇初開嘅喜歡已經過咗去⋯

「我以DSE為中心⋯拍拖嘅嘢以後再算啦⋯」邱茗然對眼前幻想愛情美好嘅張萱淇感到無言以對，對邱茗然嚟講，呢一刻除咗讀好啲書之外冇其他更重要嘅任務




IG Link: https://www.instagram.com/nd_cotttoncandy/?hl=zh-tw