愛上身邊陌生的女孩: 第二十章 – 小美的回信
第二十章 – 小美的回信
姨媽的葬禮
葬禮就是給離世的人最好的道別，離開的人不再記掛塵世，在世的人也要走出傷痛走以後的路。
這個星期六我們一家也帶著半悲傷、半平復的心情出席了姨媽的葬禮，表哥的心情也平復多了，雖然從他疲倦的眼神，就知道他應該睡得很少，希望今天以後儘快回復正常生活。路，應該由餘下來的人走下去。
我們一早便到達了附近的和合石火葬場，進行簡單的火葬儀式。雖然我們親友不多，大概只有數十位出席，但是大家都是為了送別姨媽的最後一程，場面十分傷感。親友們都帶著欲哭不出的眼神前來，而表哥跟表嫂一家就在門前接待每一位親友。
他們都時哭時笑，哭的，是為了離別的母親、外母、婆婆帶來的傷感；笑的，是為了一切在生時的畫面及很久不見的親友到來送程。這種複雜的心情，每個人都會經歷，希望這天不要來得太快。
時間一分一秒的過去，轉眼已到了吉時前的五分鐘，一眾親友們很多都忍不住淚水，哭泣聲為了這個場面變成了灰色的奏樂，大哭著的表哥沉思了十秒左右，終於按下了紅鍵，姨媽的遺體就在空氣中化作塵埃了。
這個埸面，實在過份傷感，我也落淚了，實在不忍心看下去，於是便跟媽媽說了有點不舒服，需要回到車上休息，媽媽也明白這種埸面，誰也不想再看下去，就叫我到車上等他們完成儀式後回來。
於是，我便獨自一人回到大門外的停車場，如果現在是晚上，一定是一個很恐怖的情景，因為從火葬場走到停車場，必定會經過數排墓碑，而且人煙稀少，總是覺得陰風陣陣。
正當我走到接近第二排墓碑的時候，遠處望到當中有一個墓碑被紅紙包圍著，特別顯眼。突然，不知何處吹來一陣怪風，好像有沙入眼，這個環境下，內心非常害怕，一連串的妖怪鬼怪都在腦海中徘徊，嚇得我臉色一白。
當我再次睜開眼睛的時候，那一個墓碑的紅紙被那陣怪風吹開了，雖然真的不想打擾先人休息，但好奇心的驅使下都不禁看了墓碑的內容。
這個墓碑有點古怪，沒有黑白照，看不到先人的樣貌。可能是建立不久的墓碑，所以還未有黑白照。墓碑上寫著：「愛妻陶美之墓，生於『XX九四年X九月XX日』，卒於『XX二二年X八月XX日』。」
豈不是這位女士剛離世不久？這也太年輕了，不到二十八歲就離開了人世。這個時候，腦海中出現了Yannis的名字，慢慢聯想到Yannis失蹤的時間跟這個墓碑上，這位女士卒於的時間有點吻合，內心寒了一下。
由於太過害怕的關係，我不禁大叫了一句：「依個一定唔會係Yannis，一定唔會！」
一定不會是Yannis，我估計Yannis最多只有二十四歲，不可能是二十八歲呢。雖然我不知道她現在身處何方，但是我相信已經找到她工作的地點，星期一下班以後，再到那間店看看，說不定便會看到Yannis的出現。
小美的回信
經過了一個傷心的週末，總算平復了心情準備上班，夏季的陽光特別熾熱，汗水開始滿佈在臉上，夏天等待巴士真是一件令人痛苦的事。
不久，巴士終於到來了，遠處看到這是舊款的巴士，豈不是巴士上有著以往的短人座？已經不記得多久，沒有踏上這輛舊款的巴士了，說不定Yannis也在車上，就是是美好的一天了。
於是，拍過八達通咭後，看到有一位男士身影在粉嶺站下車。奇怪，這個站不可能有人下車，要付二十多元由華明邨到粉嶺站，可能是漏帶東西吧，我也沒有加以理會。
我慢慢地走進車箱內，一直幻想著走到最後就會看到短馬尾的背影，一直走一直走，最後還是落空。今天坐巴士上班的人十分稀少，在巴士的末端一個人也沒有。
在短人座上，看到了一封信，不會是剛才的男生留下來吧，而信封面寫著「致：溫暖的哥哥，小瑜」。嗯！這一封信，不就是給我嗎？該不會是剛才那個男生代Yannis交這封信給我吧，為何不是Yannis親自交給我呢？我有點疑惑。
不管怎樣，既然信封寫了我的名字，那應該就是給我的，我打開來看便是了。於是我便打開信件，這件的確是Yannis所寫的信，內容是：
「致小瑜：
對唔住啊，要用依個方法回信比你，原本打算响我地認識咗嗰個星期二同你講，但係又唔知點解嗰日唔見你，又無留低聯絡電話，你封信又話第二日巴士到見，仲以為你唔想同我做朋友。
不過，我估你可能有急事，所以我依然相信你會搭依班車，唯有叫我朋友交依封信比你。而嗰日星期二可能係我最後一次坐依班車喇，所以你唔洗再等我喇。
我睇左你封信，估唔到你寫我嘅故仔都幾得意，最後我地都成為咗一日朋友。或者我都講返一個有小小關於你嘅故事，可能你會明白我嘅諗法。
其實我响幾年前，嗰時治安唔係咁好，一次意外，被人打傷咗個頭，昏迷咗幾日，醒返之後，醫生話有血塊留咗响個頭入面，嗰時無生命危險嘅，只係需要長期食藥，以免血塊久而久之變成癌症。當時醫生都建議做手術攞血塊出黎，但我真係好驚唔敢做手術，所以拖咗好耐。
而我每朝早都需要食藥嘅，每一次食完之後都會迷迷糊糊咁。所以，你依家明白，點解每朝早見到我嗰時，我都會fing黎fing去啦。我並唔係有心咁訓，只係因為啲藥力嘅問題。我都知好危險，所以我咪戴上安全帶囉，以免有意外。
我知道你第一次見到我嘅嗰一日，你襯我訓著咗偷偷地望住我，但係都唔夠你個傻佬傻，連褲鏈都無拉到，哈哈！究竟係你望我覺得傻，定係我望住你覺得你好好笑呢？
之後，好似一段時間都無見過你喇，無諗過你突然間又再出現返。我知道你係特登坐响我隔離嘅，仲要扮哂左望右望，你都幾傻下。後來，你每一次上車，都好快翹埋雙手就訓，古古怪怪咁，唔通你真係返工好攰？
其實唔係每個陌生嘅男仔都係好人，我知道架，我都試過有啲男仔會越黐越埋，我醒返就會避開佢，咁都無事發生過，而且你成日都望住我，嗰啲男仔都唔敢亂黎啦，所以我知道你係想保護我嘅，多謝你。
後來，巴士壞車嗰日，我終於都見到你翹埋雙手嘅秘密，就係你手上嘅戒指。我唔知點解嗰時我真係好嬲，但係其實又無咩好嬲。可能係因為覺得有女朋友就唔好望第二啲女仔啦，但其實我地都唔識嘅，又有咩好嬲呢？可能自己諗多左，我地都只係陌生人。
去到聖誕節嗰陣，我真係好開心，我男朋友終於同我求婚喇，我一口就認承咗，都估到佢响平安夜嗰晚會求婚。求婚之後我地就去咗海旁到行咗一陣，估唔到就响嗰到見到你，我仲好大聲同你講聖誕快樂，其實我本來都唔夠膽，但响聖誕節入面，對任何人講聖誕快樂都唔會尷尬嘅，所以我先夠膽講。可惜咁岩周圍大嘈，可能你聽唔到。
好景不常，估唔到我响除夕嘅晚上，我突然暈低咗，醫生話可能病情惡化，要等報告。我好驚，我真係好驚，我真係唔想做手術。响你好大陣煙味嗰日，我真係好驚，同埋好需要溫暖，所以我好早就黐住你訓著咗，不過我無咩特別意思，唔好誤會。多謝你比咗啲溫暖我，因為我真係好驚。
响第五波疫情之前，你望住我啲眼神有啲唔同，好似好想同我傾計咁，但果時我真係無心情同你傾，因為報告出咗，真係有變化，再唔做手術會有危險，可能會變癌症。但係又要比手術費，住院等等，差唔多成二十幾萬，所以真係好煩又好唔開心。
最後，男朋友決定咗，遲啲先結婚，決定咗用婚禮嘅錢比我做咗手術先，我都唔介意，因為疫情期間都無得辦婚禮。所以我真係好愛佢，亦好幸福有個咁好嘅男朋友。所以疫情依段時間，成日都要出出入入醫院，真係好辛苦。
我第一次見到我光頭個樣，我真係喊咗出黎，但係都無辦法，我只可以堅強去面對。之後男朋友幫我搵咗假髮公司，整咗一個同我之前一模一樣嘅假髮，我真係好開心，突然覺得好似一切都無變咁。
做完檢查後，醫生話手術如果無咩意外，大概有60%-70%嘅成功率，都算係可觀嘅，所以就排期响三個月後做手術，咁所以我都係照正確咁返工，做返個正常人。
疫情之後，估唔到仲見得返你，仲以為你已經轉咗工，都差唔多三個無見，疫情下你真係肥咗；反而，我因為要保持體重做手術，所以都瘦咗。而我之前已經轉咗另一隻藥，就無再好似之前咁迷糊。
後來，發現你好似坐多咗响我隔離，我知道你應該係想認識我。做手術之後會點，無人會知道，所以如果你想認識我，我都唔介意同你做朋友，而且識多一個朋友支持下，其實都係一件好事。再者之後都唔知仲有無機會。
但係你從來都唔開口，我都唔知好嬲定好笑，比咗啲機會你又唔珍惜，所以我決定逃開你。我已經無時間，你成日咁樣唔得架，無女仔鐘意懦弱嘅男人架。
估唔到，最後你都攞返啲勇氣出黎，我以為我以後都見唔到你，你已經幾日無再坐依班車。而且，我星期三就要入院，星期五就做手術，我都想見多你最後一次，無諗過你真係出現咗，仲同你食早餐，真係好感動。
終於見到你真實嘅樣貌，的確係一位哥哥。嗰日其實我仲驚緊做手術嘅事，我都唔知點同你講好，而且我地又只係岩岩認識。所以你比完信我之後，我其實好感動，真係想同你擁抱一下，因為你真係好溫暖，比到鼓勵我去面對手術。所以好多謝你。
無人知道將來會發生咩事，手術係咪成功，話唔定出咗意外，我做完手術就死咗，無人會知。所以我寫咗兩封差唔多嘅信。
一封，係如果我做完手術，無咩大礙嘅話，話你知我無事。
而另一封，就係萬一出現不測，話你知我已經死咗。
而依一封就係另一封嘅信，你收到之後，請你唔好傷心，起碼我地都做咗一日朋友，你永遠都係我嘅好哥哥。
雖然我覺得你都唔會睇到依封信，因為我覺得自己應該無事嘅。點都好啦，有準備總好過無準備。
唔好食咁多煙，因為癌症真係好辛苦。
萬一，你真係睇到依封信的話，我地就永別喇，唔好再記住我，而且你身邊都有一個好好嘅女朋友等緊你，我做首飾維修架，你隻戒指應該都戴咗五年以上，請珍惜你身邊嘅人，永別！
陶美
Yanis」
當我看完這一封信後，巴士已經到達了大欖隧道，我看到「死咗」二字已經忍不住淚水，馬上跑下車，陶美不就是在和合石看到的那個墓碑嗎？不是真的，一定不是真的。
我已經失去理智，完全沒有理會身邊的車輛，便從大欖隧道橫行到對面返回新界的行車線，本以為我應該會被車撞死，但司機們看到我這瘋狂的樣子都馬上收慢油門，剛好有的士經過我便馬上上車了。
墓前的哭泣
大約二十分鐘左右，的士便到達和合石，我戰戰兢兢地一步一步走到那個寫著「愛妻陶美之墓」的墳前，在不遠處的地方，看到一位男士就站在墳前，那位就是上環首飾維修店的那個男店員，相信他就是小美的未婚夫。
當我走到墓前，我的雙眼只看著眼前不知道真實還是幻象的畫面，那張不想看到的大頭黑白照出現了，正正就是小美本人，從來沒有想像過Yannis的中文名字就是陶美，即是小美。
我已經無毫力氣地坐在地上痛哭，而小美的未婚夫沒有理會我，好像在等我說話。
於是我便問道：「你係小美嘅未婚夫？」
未婚夫：「……係啊，就係我將封信放响巴士到。你地嘅事我一直都知道。」
我：「咁點解你上次唔比封信我啊？」
未婚夫：「小美其中一個遺願係，响一個正常嘅工作日，當巴士離開牽晴間站之後，而最後排嘅座位無人，就放低封信。無話過要交比你喎。」
他這樣說也不是完全不合理，而作為未婚夫的他，我開始明白為何他的態度差得這麼厲害。
我：「咁小美嘅第二封信呢？可唔可以比我？」
未婚夫：「依封信？我睇完真係想殺咗你。」
然後，他便拿著打火機燒了小美的第二封信。我馬上站起來阻止他，但是可能傷心過度而且坐在地上太久了，跑了幾步就仆倒在地上。
小美最後的遺物已經化成灰燼，我仆在地上大聲痛哭，喊道：「點解！點解！點解你要咁做？」
未婚夫：「小美嘅野即係我嘅野，我鐘意化比佢有嘜問題？」
我大腦已經完全空白了，只是一直在痛哭，的確我也沒有恨他的理由。
未婚夫：「你响到一陣好喇，唔好阻住雪…小美休息。」
於是，我便一直在小美的墓前大哭，一個又一個跟小美一起時的畫面不斷在大腦重覆播放，一切…一切都完了。
(正值中午…)
當炎熱的陽光再次穿透我的肌膚時，我才回復了意識。大概已經是中午時分，望著小美的遺照，我再沒有打擾她休息的理由。多謝你在我生命中出現，雖然我們只是一日的朋友，但我會永遠懷念著你。
小瑜最後的餘念：「如果我唔係一直就諗多咗，一早就單純地只想同小美做朋友，陪伴佢，鼓勵佢，會唔會一切都可以改變呢？…」
(續)
後記：對了，故事還有短編特別章節，明天更新，感謝各位讀者留意我的作品。