宇宙傳送門: 3.8

現時凌晨唔知幾多點，復仇之戰現正進行最終目的，我係度享受緊我嘅戰果，但似乎有啲走火入魔。

我要每隔十秒，就斬斷郭俊言一隻手指。但斬到第五隻手指，郭俊言就失去咗意識。

於是我就問然人「用你嘅超能力，應該可以叫醒佢吓話？」

「……….可以。」

「咁你幫我叫醒佢。」





「……….真係有呢個必要？」

「……」

我係度等咗十幾秒鐘都未見然人有任何嘅行動「….你都聽過，佢係一個咩人，做過啲咩。而家只係要佢自己受返，好合理，好公平。」

「….」

「所以，你快啲，叫醒佢。」





我而家見唔到自己個樣，但我透過然人嘅表情大概可以想像到。

我好似俾郭俊言講中咗，我同佢係同一類人。係我變咗？定係本來我就係咁嘅人？

然人無奈咁望向昏迷嘅郭俊言，估計係用緊佢嘅能力。

我都注視返郭俊言，等待住佢嘅清醒。

然後再過十幾秒，郭俊言忽然擘大雙眼，吸咗一大啖空氣，從瀕死當中回生「啊，點解…..？」





「仲未完㗎。」我跨過佢對腳，嚟到佢嘅左手邊，同樣攤開佢啲手指「10、9、8……」

郭俊言慢慢、辛苦咁舉起佢右手嚟睇，係佢眼前佢見到一隻剩低手心，冇晒手指，血淋淋嘅右手「啊，啊，啊…..」

手起斧頭再落，斧頭將中指同左手手掌徹底咁分開，郭俊言嘅左手只剩低無名指同尾指相伴，連帶有大量嘅血液相隨。

「10、9、8……..又…」

郭俊言再次進入昏迷狀態，面無血色，而地下嘅血不停咁擴大自己嘅領土。

我再一次用眼神向然人尋求幫助。

今次然人有啲猶豫「夠啦….…」

「仲有兩隻手指，仲有兩隻！」我伸出左手，向然人舉起我嘅無名指同尾指。





有冇呢個必要？我都想問自己，我諗嚟諗去，答案都係有，郭俊言需要有咁嘅下場。

「…..我已經冇乜力啦。」然人稍微咁將腳步向後退。

我慢慢咁企起身，踎耐咗，腳有少少麻痹「你仲可以…..」我用唔耐煩嘅語氣繼續請求然人。

但係呢個時候，係然人嘅身後，嗰個漆黑嘅走廊當中，彈出嚟一個人，然後仆咗落地，呢個人就係頭先自己走咗去嘅林日辰。

然人係未聽到聲之前已經轉身，將電筒嘅光線轉移過去走廊嗰邊。

地下嘅林日辰成面傷痕，衫褲都爛埋，接近垂死嘅狀態，佢連好好地望我哋一眼都做唔到。

然後係林日辰嘅身後，走廊嘅出口再行出嚟一男一女。





見到呢個兩個人先發覺自己完全忘記咗仲有敵人未解決。

但係，我可以專心咁報復郭俊言，都係因為我確信林日辰可以自己解決剩低嗰兩個人。如今，仆係地下嘅竟然係林日辰。

呢一男一女，兩個都係其他平行宇宙嘅我。

女嘅，長曲髮，精緻嘅五官，充滿曲線嘅身材，係性感版嘅少女林日星。

男嘅，普通林日星樣，唔係大隻，但骨架異常地闊大，而且右手揸住把劍擊用嘅花劍。

然人見到呢個畫面，表現得有啲震驚，雖然佢可以人肉定位，但可能頭先集中咗係我同郭俊言身上，過分衝擊嘅畫面令佢暫時忽略咗林日辰嗰邊。

「呵呵，你？就憑你？」花劍佬望到地下四散嘅屍體，然後望向我。

「你係咪呢個宇宙嘅我？」性感林日星問。





點解每個平行宇宙嘅我，開場白都係一樣？大家都好想揾到我咁，但我真係佢哋離開呢個宇宙嘅鎖匙咩？

「係嘅話，可唔可以話俾我哋知，呢個宇宙係乜嘢事？仲有，點解你仲可以留係自己宇宙㗎呢？」性感林日星追問。

「…..走…..」瞓係地下嘅林日辰，無乜力氣咁講。

花劍佬聽到林日辰呢句，大約可以估到我就係呢個宇宙嘅林日星「就係佢啦，妹。」佢向下揮一揮把花劍，花劍劃過空中發出輕巧嘅聲音。

佢叫個性感林日星做阿妹？兄妹？定龍鳳胎？

「係咪你唔肯放我哋走吖？」性感林日星問我。

「我唔知你哋講咩。」