宇宙傳送門: 3.6

現時凌晨唔知幾多點，復仇之戰打到一半，林日辰唔知去咗邊，由我一個對付剩低嘅三個人。

對面兩個人，兩隻手，兩把武器，一同斬落嚟我度。由我個天靈蓋，一路斬到落腹部嘅位置。

係我身上出現嘅唔係兩條斬痕或者傷痕，而係兩條極光出現係佢哋攻擊嘅軌跡上面。

我由眼角嘅餘光望到我面上嘅極光，再望到胸口同個肚嘅兩條極光，我大概估到係然人嘅幫忙。

仲係幾日前，我個身出現極光嘅時候都一定會覆蓋全身，但今次應該係多得然人，可以局部咁用呢個能力。





如果早啲遇到然人，我就唔使俾人斬咗隻右腳。

跟住，我身上嘅極光完全消失，剩低嘅係一件爛咗兩條邊嘅衫係我身上。除此之外，並冇出現任何傷口，既不痛也不癢。

我唔知上次對面兩條友係便利店有冇見識過我嘅能力，但佢哋個樣同樣都係呆咗係度。

佢哋望一望自己手中嘅武器，發現只係剩低個手柄係度。

佢哋手握住個手柄，武器嘅上半部份消失咗，係手柄嘅頂端，即係用嚟攻擊我嗰個方向，出現有燒燶嘅痕跡，仲有少少煙冒出嚟。





見到咁樣，我估會唔會係任何物理攻擊都對我無效？除咗人嘅肉體之外，即係冇嘢可以傷到我？

佢哋面對住呢個咁荒謬嘅畫面，都滴晒冷汗，佢哋彼此用驚恐嘅表情交換咗眼神。

對住我呢個”怪物”，睇嚟佢哋都係冇乜對策，因為佢哋之後嘅行動就係將手中剩低嘅兩個手柄大力咁揼向我。

同樣嘅事情再次發生，今次我都係完全冇迴避，係兩個手柄即將要擊中我身體嘅時候，極光出現，兩個手柄連隨極光消失係我身上。

對面兩個都已經係無言以對，而且係呢個時候，我終於抽返起隻雀腳，然後馬上衝過去，開始反擊。





佢哋兩個精神上似乎受咗啲衝擊，反應變慢咗。

我衝上去一拳打落左邊嗰個人塊面度，然後諗住右一拳揮向右邊個人度，但俾佢擋住咗。

過咗兩招之後，佢兩個嘅魂魄開始返嚟，連同啲速度都返咗嚟。

我哋三個拳腳來往，縱使係二個對一個，我都唔太輸蝕。

我嘅能力唔只係極光，仲有我由細到大被迫練返嚟，超乎常人嘅抗打能力。

我隻雀腳將我穩定咁鎖係地面，令我唔容易跌倒，加強咗我嘅平衡力。

而且，佢哋嘅力量都唔算大，我咬實牙根咁將佢哋嘅每一拳全部接落嚟，完全冇跪低。

佢哋打我一拳，我就還返兩拳出去。





係我哋打得火熱嘅時候，我嘅右手前臂內側突然發出極光，一個刀尖開始係極光當中伸出嚟，直到一把刀刃係我手上出現。

不過，刀刃仍然未離開右手，似乎係卡住咗。

係電光火石之間，我冇諗咁多，右手大力一揈，將卡住嘅刀刃揈出現，一把刀完整咁係半空轉動，然後我右手捉實刀柄，一嘢就插向左邊嗰個人嘅腹部。

我插完把刀先至意識到自己嘅行動，然後放開手，嗰個人撳住傷口嘅位置，慢慢向後倒退幾步，之後就仆低咗。

另外，右邊嗰個人只係心寒咁望住地下嗰個垂死嘅人，然後佢又驚慌咁望向我。

剩低嘅呢個人，其實就係以前中學，群埋郭俊言嘅同學。我望住佢驚慌嘅眼神，我知道佢明白自己將會係咩下場。

「砰！」忽然，一下槍聲。





面前呢個人中槍，子彈由佢背後射出，仆低之後，佢嘅身後係拎住枝槍嘅郭俊言。

「夠啦。…..唔想死嘅，手放頭後面，跪低。」郭俊言用枝槍指向我，佢再用另外一隻手抺一抺額頭嘅汗。

佢頭先應該睇到晒發生咩事，所以佢應該知道佢把槍有可能冇用。

雖然我都幾好奇佢究竟邊到嚟一把槍，但我見到佢眼神裏面存在住恐懼，對我嘅恐懼。

「然人，你要企正係我後面。」我慢慢咁將雙手舉起。

「已經企咗啦。你可以放心你自己。」我身後傳嚟然人把聲。

見到有槍，其實唔算驚訝，半日前嘅我都仲會驚槍，但而家嘅我，只要有然人係度，可以話係無敵。

我先聽從郭俊言嘅說話，雙手已經舉到自己耳仔嘅高度「你頭先應該睇到發生咩事，你確定你把槍會有用？」





「收聲！我唔理你係咩撚嘢人嚟，你夠膽就試下，一粒子彈你就可以玩完！」聽得出郭俊言開始有啲心急。

我無視郭俊言嘅警告，以舉起雙手嘅狀態踏前咗一步。

「喂！咪行埋嚟吖！仆街！手放頭後面跪低吖！」

「集中精神，把槍就可以係你嘅。」然人係我身後細聲咁講咗一句。

然人嘅意思係想我用極光嘅能力，拎走郭俊言把槍？

我先繼續無視郭俊言，再踏前一步，雙目注視住佢把槍，然後心諗：俾我，俾我…..

係我集中緊精神嘅時候，郭俊言始終不敵佢心中嘅恐懼「啊～！」向我開咗一槍





「砰！」槍聲環繞整個空曠嘅空間。

呢一槍，徹底可以證明我係咪無敵嘅存在。其實我都唔太肯定係咪得，所以郭俊言一開槍，我合埋咗眼。

過咗幾秒之後，槍聲完全消失係空中，而我亦都完全冇事咁企咗係度。

我開返眼，眼前嘅郭俊言放低咗佢把槍，佢心中嘅恐懼並冇消失，反而係壯大咗，因為係佢面前嘅，係一個連子彈都殺唔死嘅人。