宇宙傳送門: 3.3

現時凌晨十二點三十三分，復仇之戰因為有然人同林日辰嘅在場，好輕鬆咁搞掂咗門口嘅一個守衛，然後剩低所有嘅敵人都係三樓以上。

面對住林日辰一時時嘅挑釁行為，係呢個時勢我只能啞忍，繼續前進。

我哋開始由樓梯行上去樓上，荒廢嘅樓宇裏面，殘舊嘅牆壁，散落一地嘅雜物，剝落嘅石屎，漆黑嘅環境，仲有絕對嘅寧靜，可以聽到嘅就只有大家嘅腳步聲同呼吸聲，令人感覺好似會有嘢隨時彈出嚟咁。

雖然我哋有個人肉雷達係度，可以保證三樓以上先會有人，但無奈呢個環境實在係令我緊張兮兮。

我哋依靠一個電筒，避開地面嘅雜物，小心翼翼咁前進。





嚟到第二層同第三層之間所連接嘅樓梯，我示意拎住電筒嘅然人閂咗我哋唯一嘅光源，以免提前暴露我哋嘅位置，加上都可以俾我哋對眼提前適應下漆黑嘅環境。

雖然話俾啲時間人眼就可以適應昏暗嘅環境，但係呢棟樓入面實在太黑，加上出面有啲霧遮擋咗其他光源嘅進入，就算對眼適應到，都最多只可以望到自己周圍半米嘅範圍。

我哋係呢個伸手不見五指嘅地方，摸住牆，慢慢咁行上通往三樓嘅樓梯。

感覺差唔多要到達第三層，大家都處於一個非常安靜，謹慎嘅狀態，以免驚動敵人。

林日辰係最前面，我係中間，然人抱抱圈圈行係最後。





我感覺到林日辰停咗落嚟，應該係到咗第三層。

不過呢個時候，我冇點去留意自己嘅腳步，前腳係向上踏嘅時候，唔小心撠到上一級嘅樓梯，重心稍為失平衡咗半秒，但好快又踏實返腳步。

但係，因為一下子嚇親嘅關係，左手不慎鬆開，呢一刻，我知道自己跌咗手上嘅刀。

係呢一瞬間，我嘅心跳好似暫時停頓咗咁，知道把刀要跌落地，但我係呢個睇唔清楚嘅環境底下，又接唔住把刀，唯有係由把刀跌落去。

係把刀要著地嘅呢一秒，我有好多想法走出嚟。死啦死啦死啦，點會犯啲咁無聊嘅錯誤。





把刀一落地，產出清脆嘅聲音，係呢個咁空曠又寂靜嘅空間，刀落地嘅聲音就會被無限放大，一發不可收拾。

我睇唔到其餘兩個人個樣，但都估到林日辰同然人會係咩表情。

事情唔發生都發生咗，啲聲音就唔會收得返，係睇下應該要點應對。

話雖如此，我仍然係成個人郁都唔郁，周圍又漆黑一片，根本唔會知道呢層其餘嘅人係咩反應。

刀落地嘅聲音係整個空間徘徊咗大約有三秒，係呢個聲音消失之後，又再次迎嚟幾秒嘅寂靜，空氣都凝結咗咁。

我成個人出晒冷汗，加上咩都睇唔到，令我仲加緊張。

當正常人失去咗清晰嘅視野之後，就會將精力集中係其他嘅感官。呢個時候嘅我，聽覺就會變得異常靈敏，可以更加容易去捕捉微細嘅聲音。

我開始聽到有其他嘅聲音，係人嘅聲音，而且並唔遠，就離我哋只有幾米嘅距離，唔止係一個人嘅聲音。睇嚟我係將佢哋全部嘈醒咗。





呢下應該點算，臨門一腳先嚟奶嘢，可以點應對，對方可能已經知道我哋嘅存在同位置。

係呢個黑暗嘅環境，起碼大家嘅條件都一樣，就算求其一方先開燈，大家都係需要幾秒時間去適應。

就係我瘋狂思考對策嘅時候，我聽到係我面前嘅林日辰突然嚟個襲擊，佢衝咗過去。

「走。」

聽到林日辰好突然嘅一聲令下，我自己都下意識咁拔腳，跟住一齊跑咗出去。

跑咗兩步，仍然係睇唔清楚個環境同啲人係咩位置，林日辰簡直就係亂咁嚟，呢下我覺得我哋嘅勝算不高，因為要係黑暗底下作戰。

不過呢個時候，一道光線射咗出嚟。





係我身後嘅然人都跟住跑咗出嚟，佢仲開咗電筒，由我身後射出嚟。

黑暗嘅戰場突然迎嚟一線光明，大戰一觸即發。