宇宙傳送門: 2.31

現時晏就三點四十一分，我面前嘅殺母凶手，嚟自另一個平行宇宙嘅我，叫做林日辰。

林日辰憶述咗佢嘅童年回憶俾我聽。每當佢講出一個情節，我嘅大腦就會自動播放出嗰個畫面，不過角度唔一樣。

我腦海裏面係以成年嘅我去回望返我兒時嘅記憶。當我失去咗，再漸漸放低之後，我可以睇清楚，林日辰口中講嘅惡魔，亦都係我兒時嘅惡魔。

開始嘅時候，阿媽的確係俾到我當時最需要嘅嘢，母愛。佢係我唯一想依賴同珍惜嘅人。

我腦海嘅回憶，再加埋林日辰嘅旁白，令到我由呢個長期夢當中醒返。





我諗唔係阿媽將我洗腦成功，而係我自己想去相信、希望佢所講嘅就係真，希望呢場夢唔會醒。

「我同嗰個女人都係互相利用大家。佢將佢嘅痛苦發洩係我身上，而我將佢當做呢個世界唯一重要嘅人。」林日辰繼續講。

「夠啦。….點解你要講呢啲嘢俾我聽？你係想我有咩反應？崩潰？發爛渣？」

「我想你醒，想你知道我殺嘅唔係一個母親，係一個摧毁你人生嘅惡魔。我係幫緊你。」

「…你憑乜撚嘢？」





「….」

「就憑你經歷嘅嘢同我好似，你就覺得我同你嘅諗法係一樣？」

「….」

「我唔係你，你亦都唔係我！就算你係平行宇宙嘅我，都唔代表我哋係同一個人！」

「….」





「首先，我冇殺過乜撚嘢小動物。第二，十六歲嗰年，我冇推到老豆落去，亦都冇殺我阿媽，因為我唔係你呢啲心理變態嘅殺人犯，因為我仲有理性。」

「….」

「你講得啱，的確係互相利用。」

「….」

「冇人逼過我要咁做。我知係佢眼中我只係一個發洩工具，但冇咗佢我就真係會一無所有，我唔想一個人。如果可以得到一個阿媽嘅話，我咩條件都可以接受。」

「….」

「我發夢咪發夢囉，我發夢關你撚事吖！？」

「….」





「你之所以講俾我聽，因為你係想揾同伴，你想係我身上攞同情。」

「….」林日辰面上嘅笑意漸漸消失。

我忍住腳痛咁行近林日辰「但真係唔好意思，我唔係你，我亦都唔係你朋友。俾人摧毀人生嘅係你，唔係我！」

「….」

「係我眼中，你只係一個孤獨又可憐嘅殺人犯！」

「….」

「呢個就係我同你嘅差別。」





林日辰默默無言咗一陣「我諗你需要一啲時間去消化同冷靜。」講完，佢就打開門離開咗房。

個爆炸頭細路望住我對手，然後我雙手綁住嘅繩自己自動咁鬆開咗。

呢個細路識超能力？

之後個爆炸頭細路抱住圈圈一齊出咗房門。

房門打開咗，門外企咗家姐係度，佢嘅表情話俾我知，佢聽到晒頭先嘅對話。

我哋互相對望咗一陣，我心裏面嘅感情好複雜。我依家好諷刺地，只係想一個人。

於是，我閂埋咗房門。

得返我一個人係間房，我坐低係地下，兩腳伸直，背脊挨住床邊，沉思。





當時我媽真係有叫我推老豆落去，但我冇做到，嗰次係我第一次拒絕阿媽，因為我真係唔想做。

十六歲嗰年係中四，正正係我由李浩朗身上學識反抗嗰年。

我同林日辰之間多咗一個變數，就係李浩朗。如果冇李浩朗，或者可能我真係會變成林日辰咁樣。

或者呢個就係點解我同林日辰係二個唔同嘅宇宙。

第一次拒絕完我媽之後，情況開始慢慢咁改變。老豆冇幾耐就走咗佬，剩返我同我媽。

之後，一直以嚟折磨我媽嘅根源走咗，我媽都開始變，我哋可以開始慢慢咁正常生活。

雖然生活正常咗，但我其實感覺到，阿媽根本已經冇再當我係佢個仔，我亦都估到佢背後暪住我嘅一啲壞習慣，佢只係想要錢先繼續留低，扮係我媽。





大家互相利用。