宇宙傳送門: 2.21

現時應該仲係朝頭早，平時唯一睇到時間嘅就只有家姐部電話，而家部電話已經成為咗棵巨樹嘅一部分。

係呢個令人不停出汗嘅環境下，所有裝備同物資都歸零嘅我哋，首要任務係要揾咗水先。

由巨樹嗰度逃走出嚟，感覺上已經過咗幾個鐘頭，我哋唔單止冇咗時間觀念，就連中午同黃昏都難判斷到，因為太大霧。

我哋係又熱又口渴嘅狀態低下，彷彿見到海市蜃樓咁，因爲我見到前面好似有間便利店，一間着晒燈嘅便利店。

我急急腳咁行過去，幻想住冷氣同嘢飲為我帶嚟嘅爽快感，同時都出現埋幻聽，聽到舖頭入面好似有人為我歡呼咁。





但我呢個幻想俾入面嘅幾個人中斷咗，我企係便利店嘅玻璃門前，透過玻璃門可以清楚咁見到入面總共七個人。

呢七個人當中，有五個相信就係之前見過嘅面具人，佢哋戴住各色各樣嘅面具、護具，仲手持長刀。

而剩低嘅兩個人，好可惜地，都係我見過嘅人，就係住係我隔離單位嘅李生同李太。

而家我面前嘅情況，其中兩個面具人係角落毆打緊李生，李生雖則有反抗同掙扎，但都完全冇用。

再另外兩個面具人，一人一邊撳住咗係地下，面朝天嘅李太。最後一個面具人就係李太面前強行擘大佢兩邊大髀。





懷有身孕嘅李太，俾三個人控制住，撕裂嘅慘叫聲、喊聲、求救聲，覆蓋咗所有嘅聲音。

睇呢五個面具人嘅體格，應該係五個男人嚟。

當時可能因為嗰個係李太，所以我完全冇諗過應該要點做，只係隔住道玻璃門向佢哋大叫「喂！」

我唔叫出聲，入面五個面具人都冇留意到我嘅出現。

我喂完一聲之後，全部人嘅注意力都放咗係我身上。





分別捉住李生同李太嘅四個面具人只係望過嚟，但仍然捉實獵物，並冇追加嘅行動。

只有原本踎低係李太面前嘅一個面具人對我有所行動，佢企咗起身，將佢把長刀放係膊頭，面對住我。

我由呢個面具人嘅氣場同佢原本嘅位置可以判斷到，佢應該係五個面具人之中嘅大佬。

我撳一撳個玻璃門嘅感應器，踏入咗便利店。

「咩事….？」家姐應該都係我後面，掌握緊情況。

面具大佬望住我，左右咁側頭「噢～又會咁啱。」

佢把聲，好似係邊到聽過咁，加埋佢呢句又會咁啱，我哋係識嘅？佢成塊面因為戴住面具，我淨係睇到佢對眼，暫時係冇印象邊個嚟。

李太濕潤嘅雙眼，急切嘅眼神盼望住我。李生就俾個面具人踩住塊面，見到佢都係冇放棄過反抗，但根本抬唔起頭。





「放開佢哋。」

「哼，哈哈。之後呢？你咁講完我哋就照做？你懵撚咗吖？定你係睇唔出而家咩情況呀？」

我當然睇得出而家咩情況啦，五個對兩個，對方仲有兩個人質，就算家姐幾好打都好，都唔會夠五個男人打。我可以點做？

面具大佬當然唔會等我係度諗計仔「都好耐冇玩過啦我哋，係咪吖？」佢將把長刀遞咗俾後面一個面具人，然後向我出拳。

呢一拳我彎腰避開咗，打咗幾場交之後，我都有啲經驗值係度。

「噢～」面具大佬對我嘅躲避好似有啲訝異。

但係，避到第一拳，避到第二拳，避唔到第三拳，對方又係一個打交高手。





就算我可以反擊都好，佢成身護具，我打落去佢都係冇乜反應，戰況都係淪落到我係度挨打。

家姐見我處於劣勢，梗係唔會袖手旁觀，佢都立即上前參戰。

比起頭先我同面具大佬打，家姐同佢打先似返場打鬥。

家姐就算着住恤衫西褲，但都仍然身手敏捷，完全可以避開啲攻擊。雖然面具大佬都唔差，但比起之前個眼鏡佬，今次家姐稍佔上風，可以見到勝利嘅曙光。

但我好似一下子忘記咗而家咩情況，俾家姐呢個上風誤導咗。

「夠啦～再打呢兩個就冇命。」後面其中一個面具人把刀放咗係李太條頸前。