宇宙傳送門: 2.19

現時凌晨唔知幾點，我係鋼門前奶咗嘢，成艘木船將要俾生出嚟嘅樹根所吞噬，包括我同家姐。於是我對家姐採取咗最後嘅手段。

「唔好意思啦家姐，剩返最後一個手段啦。」講完我就錫咗落去。

呢一錫並唔係咩色情嘅濕吻，冇脷，冇開口，冇口水嘅交纏，只係嘴脣掂嘴脣。

雖則係為化解危機嘅一吻，但當中亦都包含咗我自己嘅個人感情。而且都係特別嘅一吻，因為係我嘅初吻嚟。

周圍嘅環境雖然係充滿住危險，周圍生嘅樹根，斷開嘅地面，墜落嘅碎片，但係而家我嘅腦海裏面，完全冇以上所講嘅危機，而係滿天綻放嘅煙花，同埋充斥住掌聲同歡呼聲。





簡單嘅一吻，短暫嘅慶典，足夠令我嘅心跳加速至光速。

我開始感覺到自己要嚟料，我拎走自己個嘴脣「記得唔好掂到我，但要跟實我。」話語一落，我就轉身開始跑。

全力奔跑嘅期間，身體釋放出極光，輪到我去將呢一切吞噬，食出一條生口。

跑多兩步之後，我漸漸感覺唔到地面，只係感覺到地心吸力。係完全發動能力嘅最後一瞬間，我向前奮力咁跳起，衝向樹根。

果然，我穿過咗啲樹根，穿過埋面前嘅所有物質，最後衝出咗木船，成功開咗條生路出嚟。





不過，終於出到去出面嘅時候先發現，我而家嘅高度已經係嚟到差唔多有十層樓咁高。

我向後轉身，想睇家姐咩情況。講真嗰句，我都冇諗過我開咗條路之後嘅嘢，家姐可唔可以跟到出嚟係一個問題。

係空中轉身之後，我就已經見到家姐塊面，原來佢跟到我實一實，仲一齊跳埋出嚟。

我下意識伸手想捉住家姐，但嗰一刻忘記咗自己係一個消滅世間所有嘢嘅狀態。

呢個時候我想收返隻手已經太遲，最後家姐都伸咗佢隻手出嚟，捉住咗我隻手。





而家終於知道，我係發出極光嘅情況下，感受到家姐隻手，可以好實在咁捉實佢，原來我嘅能力係唔包括人類。

家姐嘅另一隻手原本係抱住圈圈，但一時唔小心鬆開咗佢，圈圈一隻唔識飛嘅鴨，漂浮咗係空中。

好彩家姐反應夠快，係一隻手捉實我嘅狀態下，另一隻手連同身體一齊伸展，及時捉返向上漂嘅圈圈。

我見圈圈已經捉返，就拉近家姐，家姐背脊向我咁俾我抱實，大家一齊向下墜。

出就出返嚟，問題係點樣冇事咁降落。上次我由幾層樓高跌落地下都冇死到，今次應該都唔會例外，而家姐有我嘅不死身墊底都應該冇問題。

每一次出現極光嘅時間都唔會過一分鐘，而家我背對住地面咁下墜，根據附近嘅建築物可以判斷到仲有兩、三秒就到地面。

下墜嘅時候，我望到木船已經消失咗蹤影，樹根將木船完全咁吞噬咗，變咗做一棵超巨型嘅樹，一路向上延伸，根本望唔到個樹頂。

我臨落地前合埋咗眼，由於我除咗家姐，咩都感覺唔到，所以落到地我都唔知。





直至我感受到背脊嘅痛楚，我就知道已經落地，同埋我嘅能力都消失咗。

我第一時間想確定下家姐嘅安全。

「啊～～」

聽到家姐嘅叫聲，我先係放咗心，起碼佢冇死到，或者冇暈咗，唔理佢有冇受咩傷，佢仲有意識我已經當自己成功咗。

嗯？而家能力消失咗，身體可以再次感受到所以嘢，但係我而家可以感受到嘅呢種觸感係…？

呢種感覺，係皮膚與皮膚之前零距離嘅接觸，我嘅能力令到我嘅衫褲全部消失，俾我攬住嘅家姐，佢俾我接觸到嘅衣服都消失咗。

我而家係攬住家姐完全赤裸嘅背面，完全感受到佢白滑有彈性嘅肌膚。





十分偶然咁，三次見到家姐嘅祼體，都係背面。如果係正面，我應該會一路下墜去地心。

我係有任何生理反應之前，一嘢將家姐推開，揼埋咗去一邊。唔係話要扮君子，係想避免再次心跳加速而發動能力。

「啊～～咩料呀你？」

我係地面自製嘅窿度起返身，馬上遮住自己條嘢，擰轉身，背向咗家姐。老實講，我已經開始有生理反應，而家係努力咁撳低緊佢。

「你..你..啲衫俾我整唔見咗。」

我背後嘅家姐，可以聽到佢徬徨嘅叫聲，估計係發現咗自己背面衫褲嘅狀況。

「…..」目前迎嚟嘅係無人講嘢嘅尷尬時間。