宇宙傳送門: 2.10
現時夜晚七點二十分，我同家姐決定今晚先係呢間戶外用品舖頭過夜。
呢間舖頭有齊晒啲露營用品，吹兩個床墊同枕頭出嚟，都已經可以好舒適咁瞓一覺。
雖然冇地方可以沖個涼，但都可以去後樓梯個廁所抺個身。
由於舖頭出面個玻璃門俾人打爛咗，我哋就將個瞓覺位置安置咗係舖頭入面一間儲物房，將道門鎖住。
家姐應該係太攰，一瞓低冇耐就熟睡咗。
唔知道李浩朗同少女佢兩個點，會唔會好似我哋咁，希望我哋四人都可以安然無恙咁再相遇返。
然後，我都慢慢咁合埋雙眼，準備入睡。
殊不知，我瞓下醒下咁，輾轉反側都做唔到家姐咁熟睡。
我望一下家姐部電話，現時係凌晨嘅三點十七分。我好似已經冇乜睡意，所以決定起身。
我好小心咁開門出去，點知嘈醒嘅係圈圈，佢點都要跟我一齊出去，橫掂大家都唔瞓就帶埋佢一齊。
我拎咗一個空嘅背囊、電筒同少少擸雜嘢，諗住落樓下附近兜一兜睇下會唔會有咩。
我臨走之前，擔心留低熟睡嘅家姐係度會唔安全，於是我開始周圍揾嗰間房嘅鎖匙，如何冇嘢可以鎖住道門，我就放棄出去。
都唔知係行咩運，竟然真係俾我揾到間房嘅鎖匙。
道門鎖好之後，我將條鎖匙由門罅揼咗入房。橫掂我唔會去太遠、太耐，應該唔會有咩事。
落到嚟樓下，原本今朝嘅嗰道烈風將呢度嘅霧都吹走晒，但而家又重新充滿咗迷霧。
我左手開着個電筒，右手抱住圈圈。然後左照右照，其實都唔係照到好遠。
本身都已經係天黑得嚟又大霧，仲要冇街燈，睇嚟係真係唔可以行遠，我同自己講行幾分鐘好啦，唔好揼低家姐一個人呀。
我先係向右行，沿路上我用Marker做咗啲小小嘅記號，以防萬一真係迷路。
大概每三至四米就係牆上面畫個圓圈，一直路咁畫到第六個圈圈，面前出現一間冇見過嘅超市。
睇呢間超巿嘅狀態，啲人應該開始意識到呢個世界發生咩事，貨架上嘅嘢食幾乎係空嘅，剩低嘅就係啲冇乜人鍾意食嘅嘢，超勁辣口味嘅食物之類。
我避開住散落一地嘅雜物，行入呢間超市嘅內部。
雖然我唔鍾意食，但我都抱住食得就唔好晒嘅精神，拎咗幾個冬陰功味嘅杯麵。
搜索完出邊貨架嘅嘢食，我打算睇埋佢個倉庫就返去。
入到倉庫，呢度嘅情況同出面差唔多，但俾我好彩咁揾到有三罐粟米湯。終於出現啲我享受食嘅嘢，我即刻將呢三罐寶物放入背囊。
然後我用電筒照埋其他地方之際，我聽到一啲微弱嘅聲音，於是我照過去聲音嘅來源。
電筒嘅光線盡頭出現一個男人，佢兩腳伸直，無力咁坐咗係角落頭。
呢個男人個樣已經係奄奄一息，面色蒼白，不時會發出微細嘅伸吟聲。
但我面對住佢嘅右邊，睇唔到有任何嘅外在傷勢。
呢個男人都仲會對我射出嚟嘅光線有反應，表情用力，緩慢咁遞高手同轉個頭過嚟。
我原本諗住稍為放低個電筒，但當佢塊面轉過嚟嘅時候，我重新用電筒照返住佢。
呢個男人嘅另一半面生有好多不規則嘅透明石頭，呢啲透明石頭俾我嘅電筒照完，光線折射到周圍都係。
我行近佢正面睇，原來佢成個左邊身都係咁，大大小小嘅透明石頭，睇落又唔似係鑽石，係咩顏色都冇。
生有呢啲石頭嘅位置，附近嘅皮膚都浮現出紫色嘅血根。
開頭仲以為係眼花，但原來佢身上嘅透明石頭係度慢慢咁變大緊，我都唔知我接觸到會唔會傳染。
呢個男人而家嘅狀態，衰啲講句就係係度等死，好痛苦地等死。
定係我應該幫佢盡快解脫？
正當我思考緊嘅時候，呢個男人嘅呻吟聲變大咗，我貼近啲個耳仔嘗試去聽下佢講咩。
「..入….老婆…」
「老婆？」
「嘩你老母，咩料吖？Disco吖？」呢個時候，另一個人係出面入嚟，佢見到由透明石頭折射出嚟嘅光。
啱啱入嚟嘅呢個人戴住個卡通嘅面具，但根據佢嘅身型同聲音，可以得知係個男人。
面具男都行過嚟睇係角落頭嘅透明石頭人「哈？哈…哈哈…」佢一路笑一路伸手向身後，然後抽咗把刀出嚟。
我見到把刀，即刻向後彈開咗。
面具男一刀插向透明石頭人條頸，可以聽到刀尖撞到硬物嘅聲音。佢掹出把刀之後又再補多刀。
透明石頭人流出嚟嘅都唔知係咪血，只係紫色嘅液體。
我以驚訝嘅表情望住呢個場面。
「我都係幫下佢啫，唔係咩？」面具男抺乾淨把刀，重新放返係身後。
「做咩好似望殺人犯咁望我呀？你有問題吖？」
我只係吞咗淡口水，冇回答到佢嘅問題。的確提早解脫個石頭人係比較人道嘅做法，但我睇佢唔係幫緊人，似係享受。
面具男見我冇出聲「係囉。」佢行向其他貨架嘅位置。
面具男每向邊個方向行前一步，我就相應向反方向行。
「咁緊張做乜撚嘢啫你？Relax～上帝準備咗個party俾我哋吖，enjoy～」
然後面具男望向空空如也嘅貨架「你條仆街係咪拎走晒嘅好嘢吖？咁撚柒自私㗎咩？」佢停低咗腳步。
我同樣冇答到佢嘅問題，只係望住佢。
「喔….原來啞撚嚟嘅。好啦，放低你身上嘅所有嘢，我就俾你走。」面具男又再抽佢把刀出嚟。
如果同佢打，就算真係嬴咗，我都係嬴幾個杯麵同粟米湯，又好似唔係好抵，都係費事係度晒力。
「Tang、Tang、Tang」面具男用刀敲隔離個貨架「快撚啲啦～」
我嘆咗口氣之後，放低我個背囊同電筒係地下，然後轉身諗住快啲返去算。
呢個時候「喂～」面具男叫住咗我。佢用把刀指住我手上抱住嘅圈圈。
「我話，所、有、嘢吖！」