宇宙傳送門: 2.8

現時晏就三點五十五分，前方嘅迷霧稍為散開，強烈嘅壓迫感來襲。

「….聽到。」

我哋聽到嘅聲音嚟自前方，呢種聲音就好似某啲猛獸嘅咆哮聲，某啲大型嘅猛獸。

前面嘅迷霧忽然之間，一下子打散咗，衝過嚟一道強風。

我推住家姐「快。」我哋跑到隔離一條後行，一條掘頭路嚟，但我哋已經冇時間再出返到，唯有係跑到去最盡頭。





呢個咆哮聲已經大聲到要撳住耳仔嚟保護返個聽覺。

我哋嘅視線範圍己經係得返前面一條長方形嘅出口。

呢道咆哮聲嚟到出口嘅位置，強烈嘅暴風劃過，形成一個無形嘅衝擊波。

我哋嘅位置離出口位有十米，但都可以感受到強烈嘅壓迫感。

周圍嘅建築物都出現細微嘅搖晃，呢下衝擊波，吹起咗好多街道嘅雜物，中間仲好似見到有幾個人。





就算我哋行到咁入，唔多唔少都會波及到，一陣烈風吹入嚟後行，冇出面嘅咁強烈但都足夠令我哋企唔穩。

啲風仲差啲吹走埋家姐件外套，我死都夾實件外套，呢件都冇埋我就真係好尷尬。

無形嘅衝擊波持續咗有八秒，我哋嘅聽力一時之間只係得一陣we～嘅聲音。

我哋由後行出返嚟，呢條街一直線嘅霧完全消失咗，前後嘅景物清晰晒。

唔單止地面，就連牆身都出現裂痕同剝落。就連電燈柱都連根拔起，九成嘅玻璃窗都爆咗，玻璃碎都冇埋。周圍一地都係前面吹過嚟嘅雜物。





事隔一日，終於睇得返個天，不過而家天空多咗嘅係一個又一個嘅人。

就好似我哋頭先見到嘅嗰幾個空中漂浮嘅人咁，但而家唔只係六個，就咁睇大約都有四、五十個呢啲漂浮嘅氣球人，填滿咗呢條街嘅上空。

然而，有一樣嘢唔同嘅係呢啲氣球人已經係冇咗氣息，有啲係面色蒼白，有啲係反晒白眼，但一樣嘅係大家都已經冇晒反應。

而家有一大堆屍體四散咁漂流係空中，睇到令人心寒。

事情發展到呢個地步，所有奇怪嘅，不可思議嘅嘢，都可以用強制傳送嚟解釋，但已經唔知係傳送咗啲咩。再係咁落去，睇嚟真係會世界末日。

我望上天空，擔心住少女之前所提及過嘅隕石。

面對住呢啲咁荒謬嘅事，我哋唯有係帶住無奈同不安嘅心情繼續前進。呢個時候嘅聽覺都差唔多回復正常。

往好嗰方面諗嘅話，起碼而家暫時啲霧散開晒，而且仲涼咗好多。





而家可以大範圍咁觀察邊度會有我哋需要嘅物資。

我哋嚟到一棟商業大廈嘅門口，查一查地下嘅門牌，見到兩間嘅戶外用品舖頭，仲有好幾間鞋舖同衫舖，我終於有衫可以着，而且我諗家姐都需要換下衫，又血又汗咁。

行入大樓嘅一個迷你大堂，一個人都冇，看更都唔例外。

而且睇嚟都仲未斷電，希望水都係一樣啦。

我哋搭𨋢上六樓，先去咗其中一間賣衫嘅舖頭睇咗先。

一出到𨋢，到走廊為止都係正常，一旦經過啲舖頭嘅門口，就可以見到啲賊仔殘留嘅痕跡。有啲應該係爆門失敗，有啲就成道門都冇咗，但望入去應該只係偷走咗啲錢，同埋一啲價格高嘅嘢。

睇嚟趁火打劫嘅人，無論係幾時或者邊度都會存在。照而家嘅規模嚟講，都應該仲係啱啱開始。





而且呢啲人都係偷啲值錢嘅嘢，佢哋好似仲未意識到世界要未日，未搞清楚真正嘅敵人係邊個。

嚟到其中一間賣衫舖，舖頭裏面仲有一個阿嬸，佢口腫面瘀咁係度執緊地下啲嘢。

呢個阿嬸見到我哋之後，好淡定咁講「冇嘢拎㗎啦已經。」

然後佢見到我打扮，由頭望到落腳「你都係同路人？」

「同路…？唔係唔係。」我而家咁嘅樣都難怪佢會誤會我係俾人打劫。

「呢套幾錢吖？」家姐摸住其中一套衫問。

「….」阿嬸有啲愕然「$399吖。」

家姐拎咗部電話出嚟，諗住用信用卡「你唔揀呀？」





我望下間舖有嘅衫「唔使啦唔該。」

「咁挑剔㗎咩？」

「全…全部女裝嚟㗎喎。」

「有咩問題？你都carry到吖。」家姐指住我條腰嗰件女裝外套。

我望一望自己下面「唉～真係。」本來我仲以為家姐想玩我，但我見到佢嗰個超級認真嘅表情「你認真㗎？」

「收唔到卡呀，要現金。」阿嬸部機跌壞咗。

家姐拎個銀包出嚟望下「咁我淨係要件T-shirt。」





家姐買完件T-shirt之後，我哋離開間舖頭，繼續行埋其他。

「其實出面變成咁，就算俾錢佢都未必用得着。」如果唔係呢個阿嬸係度，我可能就咁攞走幾件衫，有男裝嘅話。

「就係咁先令我覺得呢個世界暫時仲係正常。」

同家姐相處咗一陣之後，覺得佢同李浩朗果然係兩姐弟。尤其係李浩朗，佢會有種莫名其妙嘅正能量影響住人。