宇宙傳送門: 2.4

現時晏就一點三十三分，我同李海嵐目擊到一個凶殺現場，兇手係新登場嘅另一個我。

「跑。」我拉住家姐手臂。

目前為止，只有少女日星係平行宇宙嘅我嚟講，唯一一個正常又唔會想殺我嘅人。

而家仲要俾我見到呢個眼鏡佬殺人，當然係走為上策。

我同家姐轉身跑走，係迷霧當中逃跑，希望迷霧可以幫我哋走得甩。





跑走期間，由後面擲過嚟一樣嘢，應該係佢個錘仔。錘仔擲中我背脊個背囊，由於我個背囊裝滿咗嘢，又有兩件外套係度，減輕咗個錘仔嘅衝力。

得到個背囊嘅緩衝，我只係有半秒失去咗平衡，但馬上就回復返跑步嘅姿勢。

我同家姐開始向左轉，因為直路跑太容易俾佢揾到。

之然我哋轉左又轉右，跑咗幾個街口，加上又有迷霧嘅遮掩，應該可以搣甩佢。

我慢慢減低步速「應該夠㗎啦。」





家姐跑係我前面，佢都停低咗，望向後方「好似冇追嚟喎。」

「唔會揾到啦，咁大霧………」呢個時候，我留意到家姐嘅後上方，出現一道極光。

極光約有四米高，我用手指指出之際，極光之中衝出嚟一架車，車型類似普通私家車，但又唔完全係，因為只有三個車轆。

「家姐！」我即刻跑上前，家姐都向後望。

衝出嚟嘅車，照個拋物線咁睇，會跌向家姐。





架車愈嚟愈接近家姐，而個時候嘅家姐先完成轉身，望到嚟至上方嘅危機。

家姐企咗係度，根本唔夠時間反應。但我已經嚟到家姐嘅身後，於是我就利用自己跑過去嘅衝力，雙手推走家姐。

家姐同佢懷中嘅圈圈俾我推走，身體向前仆，已經離開咗危險嘅範圍。

佢兩個確保安全，不過我唔係。我眼珠向上碌，架車已經到咗我頭上面。

成個車頭佔據咗我整個視野。呢一刻，我嘅諗法係「啊…點解我頭先唔係攬住家姐，然後一齊向前跳…」

捱咗咁耐，竟然係咁樣死法。

臨死前嘅一刻，成個空間變得好靜，淨係聽到自己嗰個快速嘅心跳聲。

雖然冇用，但我都下意識雙手舉起，護住個頭。





眼前由車頭變成我自己對手，我自己對發緊極光嘅雙手。嗯？

架車已經衝咗落嚟我身上，經過咗我，衝落地下，然後聽到衝擊落地下嘅幾聲巨響。

我放低雙手，發現我個人係冇事咁企咗係度，極光都消失咗。

我向下望，地下照舊俾我整咗個窿出嚟，只係有半米深。我望一望自己，摸一摸自己，不痛不癢。

Yes~!我冇事。但係我又變咗做完全裸體嘅狀態。

我爬返出個窿，見到前面嘅家姐用不可思議嘅眼神望住我，我即刻雙手遮返個重要部位。

我向後轉身，超級好奇架車變成點。





地下架車成個車身嘅中間俾我熔開咗，不過我唔夠高，如果唔係成架車就會俾我切開咗兩邊。

估唔到極光竟然救咗我，但都好彩及時停咗，如果唔係又唔知跌到落邊到。

之前同少女講過，佢都冇遇過我呢個情況。唔通呢個係我獨有嘅能力？

「竟然有啲咁嘅事。」一把男聲出現。

男聲就係架車嘅殘骸隔離，係頭先個眼鏡佬。

我全部專注力放咗係架車度，完全冇留意到佢一早企咗係度。

眼鏡佬一睇就知又係另一個平行宇宙嘅我，身高一米九，着住紅色嘅Adidas 運動套裝，外套綁係腰間。

五五分界嘅髮型，戴住眼鏡，仲有好厭世嘅眼神。





眼鏡佬右手將錘仔舉起，放係佢寬闊嘅膊頭上面「你係呢個世界嘅我？」

佢係聽到頭先架車啲聲，所以先揾到我哋？但有冇咁快呀？

我警戒住佢，右腳先向後退一步，準備第二次嘅逃跑。