宇宙傳送門: 1.17

現時朝頭早八點二十八分，少女林日星企係門口，而門口外傳嚟一個男人嘅尖叫聲。

「～～～～～啊！」「點解？點解你？你，你，女，波….」門口嗰把熟悉嘅聲音充滿咗驚訝。

我都行埋出嚟睇，毫無意外地就係李浩朗。

佢見到我係少女後面行出嚟，再次嚇親「啊～～～～～！」我即刻將佢拉入屋，但佢都冇收聲，我就打咗佢一巴掌「夠啦！晨咁早你叫咁耐。」

呢一掌好似稍為將佢冷靜咗落嚟，佢一手護住自己被打嘅面頰，一手護住受衝擊嘅心靈。





李浩朗無言咁左右來回望我同少女。我一邊拉住佢去梳化坐低定下驚，一邊介紹李浩朗俾少女識。

「放心，佢已經知道晒其他嘢。」

李浩朗坐低咗，呼吸急速，對眼碌到勁大。

我大約咁同佢講面前呢位同我似樣嘅少女係邊個。

「所以，我哋之前講嘅嘢都係真嘅？Marvel都係真㗎？」佢將隻手放係我塊面度真誠咁問。





我攞開佢隻手，認真咁答返佢「係，但Marvel係咪我就唔知。」我未知李浩朗點睇，而家嘅我可以話係接受咗呢個奇怪嘅現實。

李浩朗嘅表情略顯微妙，佢係咁望住少女。令到少女好唔自在，唔好意思咁避開咗佢對眼。

我見到咁，一拳打落李浩朗個手臂度「𥄫完未呀？」

「啊！Okay,okay。」李浩朗拉住我隻手，細細聲同我講「去你間房傾下先。」

我示意叫少女係度等等我哋，然後我同李浩朗入咗我房。





我閂埋咗道門「你晨咁早嚟做咩吖？」我帶有少少唔歡迎嘅語氣。

「嘩！我都係擔心你啫，你尋夜咁樣打嚟。但係，而家呢個係重點咩？」李浩朗雙手指住門口，想指出面客廳坐住嘅另一個林日星。

「我知一時係難接受，我都知係好天方夜譚。」我慢慢咁安慰佢。

李浩朗突然雙手捉住我膊頭，用熾熱嘅眼神望住我「我，真係估唔到，都可以喎。」

我充滿咗疑惑「咩可以呀？」

李浩朗有點猶豫要唔要講出嚟「…..女人版本嘅你。」

「……」

佢開始毫無顧忌咁講埋落去「第一眼望落去，我以為就係你嚟，但望多幾眼，又好似冇乜違和感，而且又…唔反感喎。吓？你覺得呢？」





我馬上用兩隻手推開佢「咩撚嘢事呀你個變態佬？」

「咩呀？大家做兄弟嘅，吓？要be honest 㗎嘛。雖然我從來都冇以呢個角度諗過。」李浩朗用奇怪嘅眼神，將我全身由上掃望到下。

面對呢個變態佬，我係枱面個筆筒抽咗把長間尺出嚟，指住佢「你望乜撚嘢呀？收埋你對眼！」

「我哋要唔要練習下？」佢摸住嘴脣咁講。

「練！練習？！摸嘴？！」我一嘢用把長間尺車落佢個死人嘴度。

「啊啊啊～～！得啦，唔玩啦，講笑講笑。」李浩朗向我求饒。「講返啲正經嘢先啦。」

我暫時放低咗把間尺「咩呀？！」





「佢嚟揾你做咩？」佢問。

「冇乜特別。反正佢等陣都要走，我哋唔會再見到佢㗎啦。」

「走？去邊呀？咁唔係咁好喎，大家都未認識。」

「關你咩事啫？出返去啦，我哋唔得閒㗎。」我講完就開門出去。

李浩朗追出嚟繼續問「唔得閒？你哋暪住我想去邊呀？」

少女聽到，幫手回答「我哋去食早餐。……定係你都一齊食？」相信佢係出於禮貌所以問埋。

「佢都唔得閒㗎啦，係咪？」我盡量截住呢個奇怪人同我哋食嘅可能性。

然而，李浩朗係收埋咗佢個傻仔表情，換咗個我曾經唔想再見到嘅求偶表情出嚟。





佢慢慢行近少女，恭敬咁遞起隻手，向住門口「請。」

少女面對呢個奇怪人，都有啲不知所措，佢都對李浩朗點咗頭，然後一齊走向門口。

我細細聲係李浩朗耳仔邊講「我唔會放過你！」

佢冇開聲回應我，係望住我，手放係嘴脣上面。佢，送咗個飛吻俾我。

吶喊，無聲嘅吶喊，我對住窗口無聲嘅吶喊。我已經唔知道李浩朗係想玩我，定係認真。