宇宙傳送門: 1.15

現時夜晚六點四十九分，我同少女係飯枱前，我問佢關於佢穿越嘅方法。

少女凝視住我「點解咁問嘅？」

我仲係猶豫緊講唔講出嚟「我好奇啫。」

佢放低咗飯碗「我都唔太肯定，但有一次我應該係未死嘅狀態傳送咗。」

我好認真咁聽，話唔定下一次就可以阻止到。同埋雖然唔係好重要，但原來佢叫呢啲做傳送。





佢繼續講埋落去「我記得係嗰次俾….，即係處於一個危險嘅狀態，我記得係好驚好驚，心跳係前所未有咁快，我合埋咗眼。當時嘅我係必死無疑，但最後我開返眼，已經傳送咗去第二度。」

危險嘅狀態、心跳，根本就係對應咗我頭先嘅情形。不過，都好似冇最確實嘅一點。

其實我講俾佢聽都應該係冇問題，對我都冇任何嘅不利。

然而，有樣嘢我都想問埋「你遇到咩危險？係咪就係你之前講嘅嘢，留係度太耐嘅話？」

佢諗咗一陣「嗯～～～係。」「我簡單啲咁講啦。如果我留太耐嘅話，宇宙之間嘅嘢會強制傳送，就係你哋所講嘅極光事件。」





「….」

「不過呢度都未到好嚴重，仲未出現人嘅傳送。但你放心，我唔會留太耐，我好快會走㗎啦。」佢表情充斥住可惜同無奈。

我靜咗一陣「已經有啦。」

「嗯？」

「我頭先…」我由過馬路開始，到冇咗啲衫褲為止都講咗出嚟。





唔知係咪受咗衝擊，佢一時之間都講唔到嘢。

「叮噹！」呢個如此認真嘅時刻，俾一個門鐘聲打擾咗。

門口由冇咁大打擊嘅我去開，原來係隔離單位大咗肚嘅李太。

「細佬吖，呢度整多咗啲豉椒排骨，你攞去食啦。」李太遞咗個食物盒俾我。

「吓？我…呢個…。多謝。」我禮貌上，首先接住咗個盒。

「嗯。慢慢食，個盒慢慢先還。……」佢望住我，欲言又止咁。

「嗯。多謝你，咁我唔客氣。」睇得出佢真係想關心我嘅。

李太兩公婆今年應該先三十幾歲，幾年前先第一次見李太，李生就由我搬入嚟就已經係度。同佢哋唔太熟，從來只係出入打下招呼。





「得啦，慢慢食。我返入去先啦。」李太轉身離開。

我攞住盒豉椒排骨入返屋，都算係人間温暖嘅。

雖然本身今餐都多餸，但我都將盒排骨放埋係枱面加餸。

「隔離俾咗啲排…」我行返飯枱，見到少女頭耷耷咁，表情好嚴肅。

「估唔到今次咁快，又係因為我..，睇嚟我唔可以再留低。」

「食咗飯先，食完再講，就嚟凍晒。」

佢無可奈何咁再次拎返起雙筷子，見到佢咁都知佢冇晒胃口。





假設真係所有平行宇宙嘅林日星都有呢個能力，對於啲變態殺人犯林日星嚟講，呢個能力就係一個通行證，可以唔負責任咁做盡壞事。

而對於我面前嘅呢個林日星嚟講，就只係一個無窮無盡嘅地獄。

雖然以上兩者都係以死嚟傳送自己，然而殺人犯嘅林日星好似唔當係一回事。

我諗起嗰個痴線佬，佢係臨跳落去之前，佢嗰個表情同眼神，係有種享受嘅感覺。

「我聽日會走。」少女打斷咗我嘅思考。

絕對成功嘅方法係死，即係聽日佢要自殺。「聽日？即係你要…」

「唔可以再拖啦。你唔使知點樣，亦都唔使知幾時。」佢個樣微笑緊，我都未見過有咁痛苦嘅微笑。

「或者，唔係關你事。你確定係因為你？」





「我係最合理嘅解釋。」

「就算你傳送咗，你都唔會知嗰個世界咩事㗎之後。」

「如果再拖，就會有更加多嘅人強制傳送，之後其他宇宙嘅嘢會強制傳送過嚟。最後一定係隕石，世界未日。」佢講完之後，繼續食嘢。